ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴷ ⵍⵓⵍⵓⴼ ⵏ ⵢⵉⵎⵉⵏⵉⴳⴻⵏ ⴰⵢ ⵍⴰ ⵢⴻⵜⵜⵄⴻⴷⴷⵉⵏ ⵙⴻⴳ ⵎⴰⵙⵉⴷⵓⵏⵢⴰ ⴷ ⵙⴻⵔⴱⵢⴰ ⵖⴻⵔ ⵜⵓⵕⵓⴼⵜ ⵜⴰⵖⴻⵔⴱⵉⵜ

ⴳⴻⵠⴳⴻⵍⵉⵊⴰ (ⵎⴰⵙⵉⴷⵓⵏⵢⴰ) – ⴷ ⵉⴳⵉⵎⴰⵏ (ⵍⵓⵍⵓⴼ) ⵏ ⵢⵉⵎⵉⵏⵉⴳⴻⵏ ⵢⴻⴼⴼⵖⴻⵏ ⵉ ⵍⵇⴰⵏⵓⵏ, ⴳⴰⵔ-ⴰⵙⴻⵏ ⴰⵟⴰⵙ ⵏ ⵢⵉⵣⵔⵓⵣⴰⵖ ⵉⵙⵓⵔⵉⵢⴻⵏ, ⴰⵢ ⵢⴻⵍⵍⴰⵏ ⵜⵜⴻⴷⴷⵓⵏ ⵖⴻⵔ ⵜⵓⵕⵓⴼⵜ ⵜⵓⵜⵔⵉⵎⵜ ⴷⴻⴼⴼⵉⵔ ⵎⴰ ⵜⵜⵡⴰⴹⴹⴼⴻⵏ ⴰⵛⵃⴰⵍ ⵏ ⵡⵓⵙⵙⴰⵏ ⴷⴻⴳ ⵜⵍⵉⵙⴰ ⴳⴰⵔ ⵍⴻⴳⵔⵉⴳ ⴷ ⵎⴰⵙⵉⴷⵓⵏⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⴰⵙⵙ ⵏ ⵍⵃⴻⴷⴷ.

ⵓⴳⴰⵔ ⵏ 3.500 ⵏ ⵢⵉⵎⴷⴰⵏⴻⵏ, ⴳⴰⵔ-ⴰⵙⴻⵏ ⵍⵍⴰⵏ ⵓⵍⴰ ⵉⴳⴻⵔⴷⴰⵏ ⴷ ⵜⵍⴰⵡⵉⵏ, ⴰⵢ ⵢⴻⵙⵙⴰⵡⴹⴻⵏ ⴰⵙⵙ ⵏ ⵙⵙⴻⴱⵜ ⴰⴷ ⵄⴻⴷⴷⵉⵏ ⵖⴻⵔ ⵓⵏⵥⵓⵍ ⵏ ⵙⴻⵔⴱⵢⴰ, ⴰⵎⵓⵔ ⴰⵎⴻⵇⵔⴰⵏ ⴷⴻⴳ-ⵙⴻⵏ ⴷⴻⴳ ⵢⵉⴹ, ⵢⴻⵔⵏⴰ ⵎⵉ ⵡⵡⴹⴻⵏ ⵖⴻⵔ ⵜⵎⵓⵔⵜ-ⴰ, ⵉⴷⵓⴱⴰ ⵉⴷⵉⴳⴰⵏⴻⵏ ⵉⵙⴻⵔⴱⵉⵢⴻⵏ ⴱⴻⴷⴷⴻⵏ-ⴰⵙⴻⵏ ⵉ ⵍⵎⴻⵏⴷⴰⴷ ⴷⴻⴳ ⵜⴰⴷⴷⴰⵔⵜ ⵏ ⵎⵉⵔⴰⵜⵧⵠⵛⵉ ⴰⵢ ⴷ-ⵢⴻⵣⴳⴰⵏ ⵖⴻⴼ ⵜⵍⵉⵙⴰ ⴳⴰⵔ ⵙⴻⵔⴱⵢⴰ ⴷ ⵎⴰⵙⵉⴷⵓⵏⵢⴰ ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵍⵉⵥⵔⵉ ⵜⴰⵖⴻⵍⵏⴰⵡⵜ ⵜⴰⵙⴻⵔⴱⵉⵜ ⵔⵜⵙ.

ⴷⴻⴳ ⵢⵉⵡⴻⵏ ⵏ ⵓⵎⴰⵣⵉⵔ, ⴼⴻⵔⵇⴻⵏ-ⴰⵙⴻⵏ ⵢⵉⴷⵓⴱⴰ ⵓⵞⵞⵉ, ⵙⴰⴽⴽⵉⵏ ⵡⵡⵉⵏ-ⵜⴻⵏ ⵙ ⵓⵙⴰⴽⴰⵍ (ⵍⴽⴰⵕ) ⵖⴻⵔ ⵜⴻⵎⴷⵉⵏⵜ ⵏ ⵒⵔⴻⵙⴻⵠⵧ. ⵜⴰⵎⴷⵉⵏⵜ-ⴰ ⵜⴻⴱⵄⴻⴷ ⵙ 20 ⵏ ⵢⵉⴽⵉⵍⵓⵎⵉⵜⵔⴻⵏ ⵖⴻⴼ ⵜⵍⵉⵙⴰ, ⵢⴻⵔⵏⴰ ⴷⵉⵏ ⴰⵢ ⴰⵙⴻⵏ-ⴷ-ⴳⴰⵏ ⵍⴻⴽⵡⴰⵖⴻⴹ ⴰⵔⴰ ⵜⴻⵏ-ⵢⴻⴵⴵⴻⵏ ⴰⴷ ⴽⴻⵎⵎⵍⴻⵏ ⴰⴱⵔⵉⴷ-ⵏⵙⴻⵏ ⵙⴻⴳ ⴱⴻⵍⴳⵔⴰⴷ ⵖⴻⵔ ⵓⴳⴰⴼⴰ ⵏ ⵙⴻⵔⴱⵢⴰ, ⵖⴻⵔ ⵜⵍⵉⵙⴰ ⴳⴰⵔ ⵜⵎⵓⵔⵜ-ⴰ ⴷ ⵎⴰⵊⴰⵕ ⵢⴻⵍⵍⴰⵏ ⴷ ⵜⴰⵎⵓⵔⵜ ⵙⴻⴳ ⵜⴷⵓⴽⵍⵉ ⵜⵓⵕⵓⴼⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.

ⵉⵎⵉⵏⵉⴳⴻⵏ-ⴰ ⴽⴽⴰⵏ-ⴷ ⴰⴽⴽ ⵙⴻⴳ ⵎⴰⵙⵉⴷⵓⵏⵢⴰ ⴷⴻⴳ 24-ⴰ ⵏ ⵜⵙⴰⵄⵜⵉⵏ ⵜⵉⵏⴻⴳⴳⵓⵔⴰ, ⵢⴻⵔⵏⴰ ⵇⴻⵍⵄⴻⵏ-ⴷ ⵙⴻⴳ ⵜⴻⵎⴷⵉⵏⵜ ⵏ ⴳⴻⵠⴳⴻⵍⵉⵊⴰ (ⴷⴻⴳ ⵓⵏⵥⵓⵍ ⵏ ⵜⵎⵓⵔⵜ) ⵙ ⵜⵎⴰⵛⵉⵏⵉⵏ, ⵉⵙⴰⴽⴰⵍⴻⵏ, ⴰⵎ ⵡⴰⴽⴽⴻⵏ ⴽⵔⴰ ⵙⴻⴳ-ⵙⴻⵏ ⴹⴹⴼⴻⵏ-ⴷ ⵓⵍⴰ ⴷ ⵉⵟⴰⴽⵙⵉⵢⴻⵏ.

ⴷⴻⴳ ⴳⴻⵠⴳⴻⵍⵉⵊⴰ, ⴷ ⵜⴰⵎⴷⵉⵏⵜ ⵜⴰⵎⴰⵙⵉⴷⵓⵏⵉⵜ ⵖⴻⴼ ⵜⵍⵉⵙⴰ ⴷ ⵍⴻⴳⵔⵉⴳ, ⴰⵣⴰⵍ ⵏ 1000 ⵏ ⵢⵉⵎⵉⵏⵉⴳⴻⵏ ⴰⵢ ⵢⴻⵍⵍⴰⵏ ⵜⵜⵕⴰⵊⵓⵏ ⴰⵙⵙ ⵏ ⵍⵃⴻⴷⴷ ⵜⴰⵚⴻⴱⵃⵉⵜ ⴰⴷ ⵇⴻⵍⵄⴻⵏⵜ ⵜⵎⴰⵛⵉⵏⵉⵏ ⵜⵉⵎⴻⵣⵡⵓⵔⴰ ⴰⵔⴰ ⵜⴻⵏ-ⵢⴻⵙⵙⵉⵡⴹⴻⵏ ⵖⴻⵔ ⵜⵍⵉⵙⴰ ⵜⵉⵙⴻⵔⴱⵉⵢⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵏ ⴰⴼⵒ.

Iduba imasiduniyen fkan-asen i wazal n 4000 n yiminigen ttesriḥat akken ad kemmlen abrid-nsen deg Masidunya, ɣef wakken ay d-txebber yiwet n teɣbalut n temsulta.

ⴰⵣⴰⵍ ⵏ 200 ⵏ ⵢⵉⵎⴷⴰⵏⴻⵏ ⴰⵢ ⵢⴻⵍⵍⴰⵏ ⵜⵜⵕⴰⵊⵓⵏ ⴳⴰⵔ ⵜⴰⴷⴷⴰⵔⵜ ⵜⴰⴳⵔⵉⴳⵉⵜ ⵏ ⵉⴷⵧⵎⴻⵏⵉ ⴷ ⵜⴻⵎⴷⵉⵏⵜ ⵏ ⴳⴻⵠⴳⴻⵍⵉⵊⴰ, ⴰⴽⴽⴻⵏ ⴰⴷ ⴰⵙⴻⵏ-ⴷ-ⴼⴽⴻⵏ ⵢⵉⵎⵙⵓⵍⵜⴰ ⵉⵎⴰⵙⵉⴷⵓⵏⵉⵢⴻⵏ ⵜⵜⴻⵙⵔⵉⵃ ⴰⴽⴽⴻⵏ ⴰⴷ ⴰⴷⴼⴻⵏ ⵖⴻⵔ ⵎⴰⵙⵉⴷⵓⵏⵢⴰ, ⴷⴻⴳ ⵡⴰⴽⵓⴷ ⴰⵢⴷⴻⴳ ⴷ ⵜⵉⵎⴻⵢⵢⴰⵜⵉⵏ ⵏ ⵢⵉⵎⵉⵏⵉⴳⴻⵏ ⵏⵉⴹⴻⵏ ⴰⵢ ⵢⴻⵙⵙⴰⵡⴹⴻⵏ ⴰⴷ ⴰⴷⴼⴻⵏ ⵖⴻⵔ ⵜⵎⵓⵔⵜ-ⴰ ⵙ ⵢⵉⵙⴰⴽⴰⵍⴻⵏ ⴰⵢ ⴷ-ⵢⵓⵙⴰⵏ ⵙⴻⴳ ⵜⴻⵎⴷⵉⵏⵜ ⵜⴰⴳⵔⵉⴳⵉⵜ ⵏ ⴽⵉⵍⴽⵉⵙ (ⴷⴻⴳ ⵓⴳⴰⴼⴰ) ⵖⴻⴼ ⵍⴻⵃⵙⴰⴱ ⵏ ⵜⴻⵖⴱⴰⵍⵓⵜ-ⴰ.

ⴷ ⵉⴳⵉⵎⴰⵏ ⵏ ⵢⵉⵎⵉⵏⵉⴳⴻⵏ ⴰⵢ ⵃⴻⴱⵙⴻⵏ ⵙⴻⴳ ⵡⴰⵙⵙ ⵏ ⵍⴻⵅⵎⵉⵙ ⵢⵉⵖⴰⵍⵍⴻⵏ ⵓⵣⵣⵉⴳⴻⵏ ⵏ ⵜⴻⵎⵙⵓⵍⵜⴰ ⵜⴰⵎⴰⵙⵉⴷⵓⵏⵉⵜ ⴷⴻⴳ ⵜⴻⵎⵏⴰⴹⵜ ⵏ ⵜⵍⵉⵙⴰ ⴷ ⵍⴻⴳⵔⵉⴳ.

ⵉⵎⵉⵏⵉⴳⴻⵏ-ⴰ ⵓⵔ ⵜⴻⵏ-ⴵⴵⵉⵏ ⴰⵔⴰ ⴰⴷ ⵄⴻⴷⴷⵉⵏ 24 ⵏ ⵜⵙⴰⵄⵜⵉⵏ, ⵙⴰⴽⴽⵉⵏ ⴱⴷⴰⵏ ⵜⵜⴰⴵⴵⴰⵏ-ⵜⴻⵏ ⴰⴷ ⵄⴻⴷⴷⵉⵏ ⵛⵡⵉⵟ, ⵛⵡⵉⵟ, ⴷⵖⴰ ⴷ ⴰⵢⴰ ⴰⵢ ⴷ-ⵢⴻⵙⵏⴻⴽⵔⴻⵏ ⵛⵛⵡⴰⵍ ⴷⵉⵏ.

ⵉⵎⵙⵓⵍⵜⴰ ⵏⵏⵓⵖⴻⵏ ⴷ ⵢⵉⵎⵉⵏⵉⴳⴻⵏ ⴰⵙⵙ ⵏ ⵍⴵⴻⵎⵄⴰ ⵢⴻⵔⵏⴰ ⵡⵜⴻⵏ-ⵜⴻⵏ ⵙ ⵜⴷⴻⴱⴱⵓⵣⵉⵏ ⴷ ⵜⵕⴻⵎⵎⴰⵏⵉⵏ ⵢⴻⵙⵙⴻⵄⵥⴰⴳⴻⵏ ⴰⴽⴽⴻⵏ ⵓⵔ ⵜⴻⵏ-ⵜⵜⴰⴵⴵⴰⵏ ⴰⵔⴰ ⴰⴷ ⴷ-ⵄⴻⴷⴷⵉⵏ ⵉ ⵜⵍⵉⵙⴰ ⵡⴰⵔ ⵜⵜⴻⵙⵔⵉⵃ. ⴰⵙⵙ ⵏ ⵙⵙⴻⴱⵜ, ⴰⵣⴰⵍ ⵏ 1000 ⵏ ⵢⵉⵎⵉⵏⵉⴳⴻⵏ ⴰⵢ ⵢⴻⵙⵙⴰⵡⴹⴻⵏ ⴰⴷ ⴷ-ⵄⴻⴷⴷⵉⵏ ⵉ ⵜⴻⴳⵔⴰⵡⵜ-ⵏⵏⵉ ⵏ ⵜⴻⵎⵙⵓⵍⵜⴰ ⴰⵢ ⵜⴻⵏ-ⵉⵃⴻⴱⵙⴻⵏ ⵢⴻⵔⵏⴰ ⵓⴷⴼⴻⵏ ⵖⴻⵔ ⵎⴰⵙⵉⴷⵓⵏⵢⴰ.

ⵛⵡⵉⵟ ⴽⴰⵏ ⵙⴰⴽⴽⵉⵏ, ⵉⵎⵙⵓⵍⵜⴰ ⴵⴵⴰⵏ ⴰⴽⴽ ⵉⵎⵉⵏⵉⴳⴻⵏ-ⵏⵏⵉ ⵏⵉⴹⴻⵏ ⴰⴷ ⵄⴻⴷⴷⵉⵏ.

ⵓⵇⴱⴻⵍ ⵜⵉⴽⴽⴻⵍⵜ-ⴰ, ⵉⴷⵓⴱⴰ ⵉⵎⴰⵙⵉⴷⵓⵏⵉⵢⴻⵏ ⴵⴵⴰⵏ ⵙⴻⴳ 19 ⵢⵓⵏⵢⵓ ⵢⴻⵣⵔⵉⵏ ⴰⵣⴰⵍ ⵏ 42.000 ⵏ ⵢⵉⵎⵉⵏⵉⴳⴻⵏ (ⴳⴰⵔ-ⴰⵙⴻⵏ 7000 ⵏ ⵢⵉⴳⴻⵔⴷⴰⵏ) ⴰⴷ ⴽⴽⴻⵏ ⵖⴻⴼ ⵡⴰⴽⴰⵍ ⵏ ⵜⵎⵓⵔⵜ-ⵏⵙⴻⵏ.