ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵏⴻⵥⵔⵓⴼ ⵓⵜⵔⵉⵎ: ⵒⵧⵍⵉⵙⴰⵔⵉⵧ ⵜⴻⵙⵄⴰ ⴰⵢⴻⵏ ⴰⵢⵢⴻⵙ ⴰⵔⴰ ⵜⴻⵙⵙⴻⵇⵏⴻⵄ ⵍⴻⴵⵏⴰⵙ
ⴳⴻⵏⴻⵠⴻ – ⵜⵉⵔⵏⵉ ⵏ ⵒⵧⵍⵉⵙⴰⵔⵉⵧ ⵜⴻⵙⵜⴻⵄⵕⴻⴼ ⵙ ⵢⵉⵎⵜⴰⵡⴰⵢⴻⵏ ⵏ ⴳⴻⵏⴻⵠⴻ, ⵢⴻⵔⵏⴰ ⴷ ⴰⵢⴰ ⴰⵔⴰ ⵜⵜ-ⵢⴻⴵⴵⴻⵏ ⴰⴷ ⵜⴻⵙⵄⵓ ⵉⴼⵓⴽⴰⵍ ⵉⴵⴻⵀⴷⴻⵏ ⵓⴳⴰⵔ ⵉ ⵓⵙⵙⴻⵇⵏⴻⵄ ⵏ ⵍⴻⴵⵏⴰⵙ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵜⵉⵍⵉ ⵜⵙⴻⴼⵔⴰⵏⵜ ⵉ ⵓⵣⴰⵔⵓⴳ ⵏ ⵓⵏⴻⵥⵔⵓⴼ ⵓⵜⵔⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⴰⵏⵏⴻ ⵒⴻⵜⴻⵔⵙ ⵢⴻⵍⵍⴰⵏ ⴷ ⵜⴰⵙⴻⵍⵎⴰⴷⵜ ⵏ ⵍⵇⴰⵏⵓⵏ ⴰⴳⵔⴰⵖⵍⴰⵏ ⴷⴻⴳ ⵜⴻⵙⴷⴰⵡⵉⵜ ⵜⴰⵙⵡⵉⵙⵉⵜ ⵏ ⴱⴰⵍⴻ.
« ⵒⵧⵍⵉⵙⴰⵔⵉⵧ ⵜⴻⵙⵄⴰ ⵉⴼⵓⴽⴰⵍ ⵢⴻⵍⵀⴰⵏ ⵓⴳⴰⵔ ⴰⴽⴽⴻⵏ ⴰⴷ ⵜⴷⴰⴼⴻⵄ ⵖⴻⴼ ⵜⵙⴻⴼⵔⴰⵏⵜ ⵉ ⴼⴻⵔⵔⵓ ⵏ ⵓⵣⴻⴽⴽⴰ ⵏ ⵜⵎⵓⵔⵜ-ⴰ. ⴰⵢⴰ ⵢⴻⵣⵎⴻⵔ ⴰⴷ ⵢⵓⵔⴰⵔ ⴷⴷⵓⵕ ⴷ ⴰⵎⴻⵇⵔⴰⵏ, ⵖⴻⴼ ⵓⵎⴻⴷⵢⴰ, ⴷⴻⴳ ⵓⵄⵇⴰⵍ ⵏ ⵎⴻⴷⴷⴻⵏ ⴰⵢ ⵢⴻⵙⵄⴰⵏ ⴰⵣⵔⴻⴼ ⴰⴷ ⴷⴻⵖⵔⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵎⴰⵙⵙⴰⵏⵜ-ⴰ ⵏ ⵍⵇⴰⵏⵓⵏ ⴰⴳⵔⴰⵖⵍⴰⵏ.
« ⴰⵙⵜⴻⵄⵕⴻⴼ ⵙ ⵢⵉⵎⵜⴰⵡⴰⵢⴻⵏ ⵏ ⴳⴻⵏⴻⵠⴻ ⴷ ⴰⵢⴻⵏ ⴰⵔⴰ ⵢⴻⵙⵙⴻⵍⵀⵓⵏ ⴰⵥⴰⵢⴻⵔ ⵏ ⵒⵧⵍⵉⵙⴰⵔⵉⵧ. ⵙ ⵡⴰⵢⴰ, ⵜⴰⵏⴻⴳⴳⴰⵔⵓⵜ-ⴰ ⵜⴻⵣⵎⴻⵔ ⴰⴷ ⴷ-ⵜⴱⴰⵏ ⴷ ⵜⴰⴳⴻⵏⵙⴰⵙⵜ ⵜⵓⵏⵚⵉⴱⵜ ⵏ ⵢⵉⵎⴻⵣⴷⴰⵖⴻⵏ ⵏ ⵓⵏⴻⵥⵔⵓⴼ ⵓⵜⵔⵉⵎ ⴷ ⵓⵣⵔⴻⴼ-ⵏⵏⴻⵙ ⵉ ⵓⴳⴳⵓⵛⵛⴻⵍⵎⴰⵏ. ⴷ ⴰⵢⴰ ⴰⵢ ⵍⴰ ⵙⵙⵓⵜⵓⵔⴻⵏ ⵢⵉⵚⴻⵃⵔⴰⵡⵉⵢⴻⵏ ⴰⵛⵃⴰⵍ ⵏ ⵜⵎⴻⵔⵡⵉⵏ ⵏ ⵢⵉⵙⴻⴳⴳⴰⵙⴻⵏ ⴰⵢⴰ ⵙⴻⴳ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵎⴰⵛⴰ ⵜⴰⵙⴻⴼⵔⴰⵏⵜ-ⴰ ⴰⵢ ⴱⵖⴰⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵎⴰⵣⴰⵍ ⵜⴻⵔⴳⴻⵍ-ⴰⵙ ⴰⴱⵔⵉⴷ ⵎⴻⵕⵕⵓⴽ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⴰⵢ ⴷ-ⵜⴻⴱⴷⴻⵔ ⵜⴻⵔⴳⴰ ⵏ ⵕⵕⴰⴷⵢⵓ ⵏ ⵙⵔⴼ1.
ⵖⴻⴼ ⵍⴻⵃⵙⴰⴱ ⵏ ⵜⴻⵖⴱⴰⵍⵓⵜ-ⴰ, « ⴷⴻⴳ ⵜⴳⴰⵔⴰ ⵏ ⵢⵓⵏⵢⵓ ⵏ ⵓⵙⴻⴳⴳⴰⵙ-ⴰ, ⴰⵎⵓⵙⵙⵓ ⵏ ⵓⵙⵍⴻⵍⵍⵉ ⵏ ⵓⵏⴻⵥⵔⵓⴼ ⵓⵜⵔⵉⵎ, ⵜⵉⵔⵏⵉ ⵏ ⵒⵧⵍⵉⵙⴰⵔⵉⵧ, ⵉⵅⴻⴱⴱⴻⵔ-ⴷ ⴷⴰⴽⴽⴻⵏ ⵍⴰ ⵢⴻⵙⵙⴻⴼⵔⴰⵢ ⴰⴷ ⵢⵓⵖⴰⵍ ⴰⴷ ⵢⴻⵜⵜⵇⴰⴷⴰⵔ ⵉⵍⵓⴳⴰⵏ ⵏ ⵢⵉⵎⵜⴰⵡⴰⵢⴻⵏ ⵏ ⴳⴻⵏⴻⵠⴻ ⵢⴻⵔⵏⴰ ⴰⴷ ⵢⴻⵙⵜⴻⵄⵕⴻⴼ ⵢⴻⵙ-ⵙⴻⵏ. ⵙ ⵢⵉⵙⴻⵎ-ⵏⵏⴻⵙ ⴷ ⵜⴰⵄⴻⵙⵙⴰⵙⵜ ⵏ ⵢⵉⵎⵜⴰⵡⴰⵢⴻⵏ-ⴰ, ⵙⵙⵡⵉⵙ ⵜⴻⴹⴹⴻⴼ-ⴷ ⵢⴻⵔⵏⴰ ⵜⴻⵙⵙⵓⴽⴽ ⵜⵉⵟ ⵖⴻⴼ ⵓⵙⵙⵓⵜⴻⵔ ⵏ ⵒⵧⵍⵉⵙⴰⵔⵉⵧ, ⵢⴻⵔⵏⴰ, ⴰⴽⴽⴻⵏ ⴰⵢ ⴷ-ⵢⵓⵔⴰ ⵓⴳⴻⵣⴷⵓ ⴰⴼⵉⴷⵉⵕⴰⵍⵉ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⵍⵍⴰⵏ-ⴷ ⴰⴽⴽ ⵛⵛⵓⵔⵓⴹ ⵏ ⵍⵇⴰⵏⵓⵏ ⵉ ⵓⵇⴱⴰ ⵏ ⵒⵧⵍⵉⵙⴰⵔⵉⵧ, ⵢⴻⵜⵜⵡⴰⵇⴱⴻⵍ ⵓⵙⵙⵓⵜⴻⵔ-ⵏⵏⴻⵙ ».
« ⵙⴻⴳ ⵢⵉⴷⵉⵙ ⴰⴳⵔⴰⵖⵍⴰⵏ, ⵒⵧⵍⵉⵙⴰⵔⵉⵧ ⴰⴷ ⵜⴻⵙⵄⵓ ⵓⴳⴰⵔ ⵏ ⵜⵜⴰⵡⵉⵍⴰⵜ » (ⵉ ⵓⴷⴰⴼⴻⵄ ⵖⴻⴼ ⵡⴰⵢⴻⵏ ⴰⵢ ⴷ-ⵜⴻⵙⵙⵓⵜⵓⵔ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵕⵕⴰⴷⵢⵓ-ⴰ ⵜⴰⵙⵡⵉⵙⵉⵜ.
ⵎⴰⵛⴰ ⵎⴻⵕⵕⵓⴽ ⵓⵔ ⵜⴻⵙⵜⴻⵕⵃⴻⴱ ⴰⵔⴰ ⵙ ⵕⵕⴰⵢ-ⴰ, ⵢⴻⵔⵏⴰ, ⵖⴻⴼ ⵍⴻⵃⵙⴰⴱ ⵏ ⵕⵕⴰⴷⵢⵓ-ⵏⵏⵉ ⵜⴰⵙⵡⵉⵙⵉⵜ, ⵜⵓⵣⴻⵏ ⵜⴰⴱⵕⴰⵜ ⴷ ⵜⴰⵇⴻⵙⵃⴰⵏⵜ ⵉ ⵓⵏⴻⵖⵍⴰⴼ ⴰⵙⵡⵉⵙⵉ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⴷⵉⴷⵉⴻⵔ ⴱⵓⵔⴽⵀⴰⵍⵜⴻⵔ.
