Asebter amenzawi

Aneẓruf Utrim: Polisario tesɛa ayen ayyes ara tesseqneɛ leǧnas

GENEVE – Tirni n Polisario testeɛṛef s Yimtawayen n Geneve, yerna d aya ara tt-yeǧǧen ad tesɛu ifukal iǧehden ugar i usseqneɛ n leǧnas dakken yessefk ad d-tili tsefrant i uzarug n Uneẓruf Utrim, ɣef wakken ay d-tenna Anne Peters yellan d taselmadt n lqanun agraɣlan deg tesdawit taswisit n Bale.

« Polisario tesɛa ifukal yelhan ugar akken ad tdafeɛ ɣef tsefrant i ferru n uzekka n tmurt-a. Aya yezmer ad yurar dduṛ d ameqran, ɣef umedya, deg uɛqal n medden ay yesɛan azref ad deɣren », ɣef wakken ay d-tenna tmassant-a n lqanun agraɣlan.

« Asteɛṛef s Yimtawayen n Geneve d ayen ara yesselhun aẓayer n Polisario. S waya, taneggarut-a tezmer ad d-tban d tagensast tunṣibt n yimezdaɣen n Uneẓruf Utrim d uzref-nnes i ugguccelman. D aya ay la ssuturen Yiṣeḥrawiyen acḥal n tmerwin n yiseggasen aya seg Yiɣlanen Yeddukklen, maca tasefrant-a ay bɣan Yiɣlanen Yeddukklen mazal tergel-as abrid Meṛṛuk », ɣef wakken ay d-tenna deg yiwet n tseɣrut ay d-tebder terga n ṛṛadyu n SRF1.

ɣef leḥsab n teɣbalut-a, « deg tgara n Yunyu n useggas-a, amussu n uslelli n Uneẓruf Utrim, Tirni n Polisario, ixebber-d dakken la yessefray ad yuɣal ad yettqadar ilugan n Yimtawayen n Geneve yerna ad yesteɛṛef yes-sen. S yisem-nnes d taɛessast n Yimtawayen-a, Sswis teḍḍef-d yerna tessukk tiṭ ɣef ussuter n Polisario, yerna, akken ay d-yura Ugezdu Afidiṛali n Tɣawsiwin n Uzɣar, llan-d akk ccuruḍ n lqanun i uqba n Polisario, yettwaqbel ussuter-nnes ».

« Seg yidis agraɣlan, Polisario ad tesɛu ugar n ttawilat » (i udafeɛ ɣef wayen ay d-tessutur), ɣef wakken ay d-tenna ṛṛadyu-a taswisit.

Maca Meṛṛuk ur testeṛḥeb ara s ṛṛay-a, yerna, ɣef leḥsab n ṛṛadyu-nni taswisit, tuzen tabṛat d taqesḥant i uneɣlaf aswisi n tɣawsiwin n uzɣar, Didier Burkhalter.