ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵎⵓⵔⴰ ⵜⵉⵏⵙⴻⵍⵎⴻⵏ ⵢⴻⵙⵙⴻⴼⴽ ⴰⴷ ⴼⴽⴻⵏⵜ ⴰⵣⴰⵍ ⵉ ⵜⴻⵎⵙⴰⵍⵜ ⵜⴰⴼⴰⵍⴻⵙⵟⵉⵏⵉⵜ (ⵜⴰⵍⴱⵉ)
ⵍⴷⵣⴰⵢⴻⵔ ⵜⴰⵎⴰⵏⴻⵖⵜ – ⵜⵉⵎⵓⵔⴰ ⵜⵉⵏⵙⴻⵍⵎⵉⵏ ⵢⴻⵙⵙⴻⴼⴽ ⴰⴷ ⴼⴽⴻⵏⵜ « ⴰⵣⴰⵍ ⴷ ⴰⵎⴰⵥⵍⴰⵢ » ⵉ ⵜⴻⵎⵙⴰⵍⵜ ⵜⴰⴼⴰⵍⴻⵙⵟⵉⵏⵉⵜ ⴷⴻⴳ ⵡⴰⵙⵙⴰⵖⴻⵏ-ⵏⵙⴻⵏ ⵉⴳⵔⴰⵖⵍⴰⵏⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⵓⵏⵎⴰⵣⵓⵍ ⵏ ⵓⵙⴻⵍⵡⴰⵢ ⵏ ⵜⵉⴷⴷⵓⴽⵍⴰ ⵏ ⵢⵉⵎⴰⵙⵙⴰⵏⴻⵏ ⵉⵏⵙⴻⵍⵎⴻⵏ ⵉⴷⵣⴰⵢⵔⵉⵢⴻⵏ, ⴰⵎⴰⵔ ⵜⴰⵍⴱⵉ.
«ⵜⵉⵎⵓⵔⴰ ⵜⵏⵙⴻⵍⵎⵉⵏ ⵢⴻⵙⵙⴻⴼⴽ ⴰⴷ ⴼⴽⴻⵏⵜ ⴰⵣⴰⵍ ⴷ ⴰⵎⴰⵥⵍⴰⵢ ⵉ ⵜⴻⵎⵙⴰⵍⵜ ⵜⴰⴼⴰⵍⴻⵙⵟⵉⵏⵉⵜ ⴷ ⵓⵃⵓⴷⴷⵓ ⵏ ⵜⵎⴻⵙⴳⵉⴷⴰ ⵏ ⵍⴰⵇⵚⴰ ⴷⴻⴳ ⵡⴰⵙⵙⴰⵖⴻⵏ-ⵏⵙⴻⵏ ⵉⴳⵔⴰⵖⵍⴰⵏⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵜⴰⵍⴱⵉ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵜⵎⴰⵀⴻⵍⵜ ⵏ ⴼⴰⵍⴻⵙⵟⵉⵏ ⴷⴻⴳ ⵍⴷⵣⴰⵢⴻⵔ ⵉ ⵍⵎⴻⵏⴷ ⵏ ⵓⵙⵎⴻⴽⵜⵉ ⵡⵉⵙ 46 ⵏ ⵓⵙⵙⴻⵔⵖⵉ ⵏ ⵜⵎⴻⵙⴳⵉⴷⴰ ⵏ ⵍⴰⵇⵚⴰ.
ⴷⵖⴰ, ⵉ ⵍⵎⴻⵏⴷ ⵏ ⵡⴰⵢⴰ, ⵉⴳⴻⵔ-ⴷ ⵜⵉⵖⵔⵉ ⵉ ⵓⵙⴷⵓⴽⴽⴻⵍ ⵏ ⵍⵎⴻⴵⵀⵓⴷ ⵉ ⵍⵎⴻⵏⴷ ⵏ ⵓⵃⵔⴰⵣ ⵏ ⵜⴳⴻⵎⵎⵉ ⵜⵉⵏⴻⵙⵍⴻⵎⵜ ⴷⴻⴳ ⵢⵉⴽⴰⵍⴻⵏ ⵢⴻⵜⵜⵡⴰⴹⴹⴼⴻⵏ, ⵍⴰⴷⵖⴰ ⴷⴻⴳ ⵜⵎⴻⵙⴳⵉⴷⴰ ⵏ ⵍⴰⵇⵚⴰ.
ⵉⴳⴻⵔ-ⴷ ⴷⴰⵖ ⵜⵉⵖⵔⵉ ⵉ ⵜⵓⴷⴷⵙⵉⵡⵉⵏ ⴷ ⵢⵉⵎⵓⵙⵙⴰ ⵉⵏⵙⴻⵍⵎⴻⵏ ⴷ ⵡⵉⴷ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⴷⴻⴳ ⵓⵎⴰⴹⴰⵍ ⵙ ⵍⴻⴽⵎⴰⵍ-ⵏⵏⴻⵙ ⴰⴽⴽⴻⵏ « ⴰⴷ ⴳⴻⵏ ⵍⵎⴻⴵⵀⵓⴷ ⵉ ⵓⵃⵔⴰⵣ ⵏ ⵍⵃⵓⴱⵓⵙ ⵉⵏⵙⴻⵍⵎⴻⵏ ».
ⵉⵎⴽⴻⵍⵍⴻⴼ ⵙ ⵜⵖⴰⵡⵙⵉⵡⵉⵏ ⵏ ⵜⵎⴰⵀⴻⵍⵜ ⵏ ⴼⴰⵍⴻⵙⵟⵉⵏ ⴷⴻⴳ ⵍⴷⵣⴰⵢⴻⵔ, ⵀⴰⵢⵜⵀⴰⵎ ⴰⵎⴰⵢⵔⵉ ⵢⴻⵔⵔⴰ, ⵙⴻⴳ ⵢⵉⴷⵉⵙ-ⵏⵏⴻⵙ, ⵜⴰⵊⵎⵉⵍⵜ ⵍⴷⵣⴰⵢⴻⵔ ⴰⵢ ⵢⴻⵣⴳⴰⵏ ⵜⴻⴱⴷⴻⴷ ⵖⴻⵔ ⵢⵉⴷⵉⵙ ⵏ ⵢⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ.
ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⴳⴻⵔ-ⴷ ⵓⴷⵉⵒⵍⵓⵎⴰⵜⵉ-ⴰ ⴰⴼⴰⵍⴻⵙⵟⵉⵏⵉ ⵜⵉⵖⵔⵉ ⵉ ⵜⵓⴷⴷⵙⵉⵡⵉⵏ ⵏ ⵓⵃⵔⴰⵣ ⵏ ⵜⴳⴻⵎⵎⵉ ⵜⴰⵎⴰⴹⵍⴰⵏⵜ ⴰⴽⴽⴻⵏ ⴰⴷ ⵃⴻⵔⵣⴻⵏ ⵜⴰⵎⴻⵙⴳⵉⴷⴰ ⵏ ⵍⴰⵇⵚⴰ ⴰⵢ ⵍⴰ ⵄⴻⵔⵔⴹⴻⵏ, ⴰⵙⵙ-ⴰ, ⴰⴷ ⵜⵜ-ⵙⴷⴻⵔⵎⴻⵏ ⵏⴻⵖ ⴰⴷ ⵜⵄⴻⴷⴷⵉⵏ ⵖⴻⴼ ⵍⵃⴻⵕⵎⴰ-ⵏⵏⴻⵙ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⴰⵡⴰⵏⴰⴽ ⴰⴼⴰⵍⴻⵙⵟⵉⵏⵉ ⴰⵜⴰⵏ « ⵉⵄⴻⵡⵡⴻⵍ ⴰⴷ ⵉⵛⴰⵕⴻⵄ ⵉⵖⴰⵍⵍⴻⵏ ⵉⵙⵕⴰⵢⵉⵍⵉⵢⴻⵏ ⵏ ⵜⵓⴹⴹⴼⴰ ⴷⴻⴳ ⵛⵛⵔⴻⵄ ⵏ ⵓⵄⴰⵇⴻⴱ ⴰⴳⵔⴰⵖⵍⴰⵏ ⵖⴻⴼ ⵜⴻⵊⵔⵉⵎⵉⵏ ⵎⴳⴰⵍ ⵜⴰⵍⵙⴰ ».
ⴷⴻⴳ ⵜⴻⴷⵢⴰⵏⵜ ⵏ ⵓⵎⵎⴻⴽⵜⵉ-ⴰ, ⵙⵄⴻⴷⴷⴰⵏ-ⴷ ⵢⵉⵡⴻⵏ ⵏ ⵓⵙⴰⵔⵓ ⴰⴼⴻⵜⵔⴰⵡ ⵖⴻⴼ ⵜⴻⵊⵔⵉⵎⵉⵏ ⴰⵢ ⴳⴰⵏ ⵢⵉⵖⴰⵍⵍⴻⵏ ⵉⵙⵕⴰⵢⵉⵍⵉⵢⴻⵏ ⵏ ⵜⵓⴹⴹⴼⴰ ⴷ ⵜⴰⵔⵔⴰⵢⵉⵏ ⴰⵢ ⵙⵙⴻⵇⴷⴰⵛⴻⵏ ⵢⵉⵖⴰⵍⵍⴻⵏ-ⴰ ⵉ ⵓⵙⵙⴻⴷⵔⴻⵎ ⵏ ⵜⵎⴻⵙⴳⵉⴷⴰ ⵏ ⵍⴰⵇⵚⴰ ⴷ ⵜⵓⴹⴹⴼⴰ ⵏ ⵍⵃⵓⴱⵓⵙ ⵉⵙⵍⴰⵎⴰⵏⴻⵏ ⴷⴻⴳ ⵡⴰⴽⴽ ⵉⴽⴰⵍⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⵢⴻⵜⵜⵡⴰⴹⴹⴼⴻⵏ.
