Asebter amenzawi

Sudan n Unẓul: tiɣri tagraɣlant i ussefɛel uɛjil n umtawa n talwit

LDZAYER TAMANEɣT – Deg tgara, yestenya uselway n Sudan n Unẓul, Salva Kiir, amtawa n talwit deg Juba (tamaneɣt n tmurt), d acu kan, amɣiwan agraɣlan iger-d tiɣri i wakk idisan ay terza temsalt akken « ad qadren amtawa-nni s lekmal-nnes » yerna ad t-sfeɛlen « s tɣawla » akken ad ifak ccwal d tekriḍt ay yesɣen tamurt-a 20 n wayyuren.

Tẓa (9) n wussan deffir ma wemmṛen yiɣewwaɣen amtawa-a, aselway Kiir yestenya-t s uḥdaṛ n yibammasen n IGAD (Adabu agernabaḍ n tneflit n Tefriqt n Ugmuḍ), am wakken ay d-yenna dakken « talwit ayɣef nestenya ass-a llant deg-s aṭas n tɣawsiwin ay yessefk ad tent-nagi (…) Tuqqna n tiṭ ɣef tɣawsiwin am ti ur telli ara i lfayda n talwit tuɣdimt ara idumen ».

Mass Kiir iwet-d deg « yiḥezziben yettḍurrun » n umtawa-a, yerna yefka i yibdammasen d yimḍebbren n tmura n temnaḍt yiwet n teftart n 12 n yisebtar aydeg llan yikukran n unabaḍ-nnes. D acu kan, ur d-yenni ara i tɣemsa d acu-tent tenqiḍin ay yugi, ula ma iwekked-d dakken ur ttɛeḍḍilen ara ad d-banen ttfaṣil ɣef waya.

Amtawa-a ur yelli « la d Tibibelt, wala d Leqran, maɣef ur yezmir ara ad iɛawed ad assukku n tiṭ fell-as? », ɣef wakken ay d-yenna Mass Kiir. « Fket-aɣ-d akud akken ad nẓer amek ay nezmer ad nesseɣtu tiɣawsiwin-a », ɣef wakken ay d-yerna, ula ma ibdammasen nnan-d dakken wa d amtawa aneggaru yerna ur yettbeddil ara.

ɣef leḥsab n yimḍebbren n Sudan n Unẓul, llan sin n wuguren d imeqranen deg umtawa-a. Amezwaru netta d tukksa n yiserdasen seg temnaḍt n Juba, ma d wis sin d agenses ameqran ay yettunefken i yiɣewwaɣen deg ukatar n ufraq n udabu ay d-yellan deg uwanak n Nil Unnig aydeg yella upitṛul.