Asebter amenzawi

Assebded n tnegga tamaynut n yibriden imazzalen

LEZZAYER TAMANEɣT - Tanegga Taɣelnawt n Yibriden Imazzalen (ANA) ad teddukkel d Tnegga Ussefrek n Yibriden Imazzalen (AGA) deg tgara n 2015 akken ad qqlent d yiwen n wudus ara yesɛun isem n Tdzayrit n Yibriden Imazzalen .

Tanegga-a tamaynut ad tesɛu aẓayer n Uɣsur anagdud amguran yerna d amsenzi (EPIC), yerna yerna ccɣel-nnes d lebni d uɣellet n yibriden iruraden n tmurt n Lezzayer. S waya, tanegga-a d nettat « ara yawin amkan snat-nni n tneggiwin yellan yagi, ANA d AGA », ɣef wakken ay d-yenna i Tnegga n Yisalan n Lezzayer Mass Toufik Mossli, anemhal n temsal n lqanun d wuguren deg uɣlif n yimuhal inagduden.

Tanegga n Tdzayrit n Yibriden Imazzalen ad tetteg tizrawin, ad tbennu, ad tettɣellit yerna ad tettetewwil ibriden imazzalen d wayen yeqqnen ɣer-sen, yerna ad tessizdig ama d ibriden-a, ama d ibriden iruraden, am wakken ara tebnu ttawilat n uɣellet n yibriden imazzalen n lexlaṣ.

Yuɣ lḥal, Lezzayer la tessefray ad d-tfak deg 2016 imukan imezwura n lexlaṣ n yibriden imazzalen, ladɣa wid n ubrid amazzal agmuḍ-ataram, yerna ad qqlen yinehhaṛen ad ttxelliṣen ɣef leḥsab n yikilumitren ay ddan deg ubrid-nni yerna ɣef leḥsab n ṣṣenf n tkeṛṛust-nsen.

Seg yidis niḍen, Mass Mossli yenna-d d akken ssebba ay yeǧǧan awanak ad yesdukkel snat-a n tneggiwin netta d idrimen imeqranen ay yettwasseftan seg 2001 deg yimuhal inagduden. S waya, i lmend n ussefrek yelhan n yisenfaren, aɣlif iwekkel naqal Tanegga Taɣelnawt n Yibriden Imazzalen, sakkin yerna iwekkel Tanegga n Ussefrek n Yibriden Imazzalen i uḍman n usnefli igerrzen n yibriden imazzalen n tmurt.

Iswi n tsertit taqburt, ɣef leḥsab n yimḍebber-a, netta d afraq gar lecɣal igejdanen ayyes ara d-lhunt snat-nni n tneggiwin: seg yidis, lebni n yibriden imazzalen, d win ayyes ay d-telha ANA, d ussefrek n yibriden-a ayyes ay d-telha AGA.

Maca, imir-a, mi akka ay qrib ad ifak lebni n ubrid amazzal agmuḍ-ataram (s ufaki d urẓam n waṭas n yibriden imazzalen yessadafen ɣer temnaḍin, « d akud ad nesdukkel snat-a n tneggiwin », ɣef wakken ay d-yenna Mass Mossli.

Ttejṛiba, ɣef wakken ay d-yenna, tessken-d d akken yessefk ad ttwasdukklen lecɣal n lebni d ussefrek ddaw tmasit n yiwet kan n tnegga.

Aya yella-d daɣ imi lecɣal yessefk ad ilin d imellilen yerna ad ddun s tefses, yerna aya ad yeǧǧ, ɣef leḥsab-nnes, « ad yettwasseqdec ttawil akken igerrez ».

Tanegga n Tdzayrit n Yibriden Imazzalen yessefk ad tqader ilugan igraɣlanen n ussuddes d ussefrek akken ad tgerrez tamellilt-nnes ɣef zik lḥal, ɣef wakken ay d-yenna yimḍebber-a.

Deg wayen yerzan ixeddamen asmi ara d-yili usdukkel-a, Mass Mossli yenna-d d akken « akk ixeddamen n tedbelt d ussefrek n tneggiwin n ANA d AGA ad qqlen ad xeddmen deg uɣsur-nni anagdud amaynu », yerna yenna-d d akken Tadzayrit n Yibriden Imazzalen, ma terra tmara, ad tɛawed ad tefreq ixeddamen ɣef yiḥricen yemgerraden akken ad tfaṛes akken igerrez seg ttejṛiba-nsen.

Tanegga Taɣelnawt n Yibriden Imazzalen (ANA) tettwassebded-d deg 1992, yerna tettwakellef ad tebded, s yisem n uwanak (ddula), i wakk lecɣal n lebni n yibriden imazzalen, dɣa d nettat ay d-yettgen tizrawin, tbennu, tessefqad yerna tettḍafar isenfaren n yibride imazzalen.

Deg 2005, awanak tessebded-d Tanegga n Ussefrek n Yibriden Imazzalen i ussefɛel n yiɣawasen d wahilen yeqqnen ɣer ussefrek, aɣellet, assizdeg d uṣeggem n yibriden imazzalen d ttawilat yeqqnen ɣer-sen i uḍman n tɣara i yinehhaṛen ay yetteddun deg-sen.

Sɣur Fouzi KENUC