Asebter amenzawi
Majaṛ tenna-d d akken tfuk lebni n ẓẓerb-nnes ɣef tlisa d Serbya
BUDAPEST – Aɣlif amajaṛi n temḥaddit yenna-d ass n ssebt d akken ifuk lebni n ẓẓerb-nnes bu tuccar ɣef tlisa gar Majaṛ d Serbya i uḥbas n wadaf n yiminigen ur yesɛin lekwaɣeḍ.
« Aḥric amezwaru n ẓẓerb-a n tlisa ifuk sin n wussan aya, uqbel wakud ay as-d-ḥudden n 31 Ɣuct », ɣef wakken ay d-yenna uɣlif n temḥaddit deg yiwen n ulɣu.
Ẓẓerb-a deg-s 3 n tnififin yersen ta ɣef ta n ileẓwi bu tuccar yerna ssernsen ẓẓerb-a s teɣzef n 175 n yikilumitren ɣef tlisa gar Majaṛ d Serbya akken ur ttɛeddin ara yiminigen ɣer Makaṛ, ɣef wakken ay d-tenna seg tnegga n AFP.
Ad rnun ad bnun yiserdasen imajaṛiyen ẓẓerb niḍen ɛlayen 4 n lmitrat akken ad tesseǧhed ttawil-a, ɣef wakken ay d-yenna uɣlif n temḥaddit n tmurt-a.
Asenfar-a yeɣtes ad t-yeg uneɣlaf amenzu aɣerfaẓri Viktor Orban, yerna yeqbel-it umur ameqran seg umni amajaṛi deg 6 Yunyu. Lebni-nnes ad yeḍḍef acḥal n wayyuren.
Ẓẓerb-a ara iḥebsen iminigen icuba wid ay yettwebnan deg Legrig, Bulgaṛya d Spenyul ɣef tlisa tibeṛṛaniyin n Tdukli Tuṛufit, maca Serbya ur tt-yeɛjib ara lḥal ɣef waya, ula ma ula d nettat d yiwet seg tmura ay la yessaramen ad tadef ɣer Tdukli Tuṛufit. Ma d tinqiḍin n uzgar n tlisa, ula ma yella ẓẓerb-a, ad qqiment reẓment.
Deg sin-a n yiseggasen ineggura, tuɣal Makaṛ d yiwet seg tmura timeqranin ayɣef ttɛeddin yiminigen ur yesɛin lekwaɣeḍ ay la yetteddun ɣer Tutrict d Lalman (deg Tdukli Tuṛufit), yerna amur ameqran seg-sen usan-d seg Lɛiraq, Afɣanistan, Surya d Kosovo.
Deg dduṛt-a kan, azal n 10.000 n yiminigen ay izegren tilisa gar Majaṛ n Serbya.
Majaṛ tefreq azal n 1000 n yimsulta n tlisa seg yidis-nnes n tlisa, yerna mazal yessefk ad ternu ad tefreq 2000 niḍen seg umezwaru n Ctembeṛ d asawen, ɣef wakken ay d-yenna unabaḍ amajaṛi.
