Asebter amenzawi
Assileɣ i yineɣmasen ixeddmen s tmaziɣt seg 1 ɣer 5 Ctembeṛ
LEZZAYER – Ad d-yili ussileɣ d umbaddel n ttejṛibat i lfayda n yineɣmasen ay ixeddmen s tmaziɣt deg ttawilat yemgerraden n yisalan gar 1 d 5 Ctembeṛ deg Temkarḍit Taɣelnawt n Lezzayer Tamaneɣt, ɣef wakken ay d-nnan wid ay d-yelhan d ussuddes n ussileɣ-a.
Assileɣ-a d win aydeg ara ttekkin azal n 100 n yineɣmasen yerna ad d-lhun yes-s yisdawanen (iselmaden d yimnadiyen deg tɣemsa d yidles amaziɣ), am wakken ara ḥedṛen deg-s wudmawen yettwassnen deg yidles d ttawilat iɣelnawen d yibeṛṛaniyen n yisalan, ɣef wakken ay d-yenna Useqqamu Unnig i Timmuzɣa ay d-yessuddsen assileɣ-a.
« Assileɣ-a ara yilin daɣ d tagnit i umbaddel n ttejṛiba d azwur amezwaru i beddu n ukala ara yettkemmilen i lmend n uɛawen n yineɣmasen ay ixeddmen s tmaziɣt. Tiɣimit-a n ussileɣ ad tt-id-ḍefrent tɣimiyin niḍen seg-a ɣer da », ɣef wakken ay d-yenna Useqqamu Unnig i Timmuzɣa deg yiwen n ulɣu, am wakken ay d-yerna d akken « tamaziɣt, ay la yettwasseqdacen deg ttawilat n yisalan (ṛṛadyu, tiliẓri, taɣemsa yuran) adennit (labudd) ad tennerni mliḥ deg ttawilat-a ».
Iswi n tɣimit-a n ussileɣ netta d « tamussni n tegnit aydeg tella tɣemsa s tutlayt tamaziɣt d tegnit n usseqdec-nnes s tmussni n ttejṛibat n yal ṣṣenf n ttawilat n yisalan ay tt-yesseqdacen, am wakken ara yettwassen wayen ay d-yettwakesben deg unrar-a d wayen ay ixuṣṣen ladɣa deg ussileɣ, ttawilat n tutlayt d umɛawen », ɣef wakken ay d-txebber teɣbalut-a.
Assileɣ-a ad d-ilint deg-s 4 n temsal, yal yiwet s usentel-nnes, ad d-ilint ɣef « tmussniwin d telɣa n uɛawen yerna ad ttekkin deg-sent yimuzzag (isdawanen d yimsaduren) deg tɣemsa d ttawilat n yisalan am wakken ara yilin gar-ase yiselmaden d yimnadiyen deg tutlayt d yidles amaziɣ ».
Iswi n umyager-a netta d « beddu n umahil (axeddim) ɣef umawal imsisfses ara qqlen yineɣmasen ad t-sseqdacen, yerna ad yili daɣ umyager-a d llsas i wahil n ussileɣ ara yeḍḍfen acḥal n yiseggasen i lmend n usselhu d ussezgi n uswir » n yineɣmasen, ɣef wakken ay d-yerna Useqqamu Unnig i Timmuzɣa ay d-yessuddsen assileɣ-a deg ukatar n wahil-nnes n urmud i usmal d usseqdec n tmaziɣt deg twennaḍt s umata d ttawilat n yisalan s lxuṣuṣ.
