ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⵉⵍⴻⵖ ⵉ ⵢⵉⵏⴻⵖⵎⴰⵙⴻⵏ ⵉⵅⴻⴷⴷⵎⴻⵏ ⵙ ⵜⵎⴰⵣⵉⵖⵜ ⵙⴻⴳ 1 ⵖⴻⵔ 5 ⵛⵜⴻⵎⴱⴻⵕ
ⵍⴻⵣⵣⴰⵢⴻⵔ – ⴰⴷ ⴷ-ⵢⵉⵍⵉ ⵓⵙⵙⵉⵍⴻⵖ ⴷ ⵓⵎⴱⴰⴷⴷⴻⵍ ⵏ ⵜⵜⴻⵊⵕⵉⴱⴰⵜ ⵉ ⵍⴼⴰⵢⴷⴰ ⵏ ⵢⵉⵏⴻⵖⵎⴰⵙⴻⵏ ⴰⵢ ⵉⵅⴻⴷⴷⵎⴻⵏ ⵙ ⵜⵎⴰⵣⵉⵖⵜ ⴷⴻⴳ ⵜⵜⴰⵡⵉⵍⴰⵜ ⵢⴻⵎⴳⴻⵔⵔⴰⴷⴻⵏ ⵏ ⵢⵉⵙⴰⵍⴰⵏ ⴳⴰⵔ 1 ⴷ 5 ⵛⵜⴻⵎⴱⴻⵕ ⴷⴻⴳ ⵜⴻⵎⴽⴰⵔⴹⵉⵜ ⵜⴰⵖⴻⵍⵏⴰⵡⵜ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵡⵉⴷ ⴰⵢ ⴷ-ⵢⴻⵍⵀⴰⵏ ⴷ ⵓⵙⵙⵓⴷⴷⴻⵙ ⵏ ⵓⵙⵙⵉⵍⴻⵖ-ⴰ.
ⴰⵙⵙⵉⵍⴻⵖ-ⴰ ⴷ ⵡⵉⵏ ⴰⵢⴷⴻⴳ ⴰⵔⴰ ⵜⵜⴻⴽⴽⵉⵏ ⴰⵣⴰⵍ ⵏ 100 ⵏ ⵢⵉⵏⴻⵖⵎⴰⵙⴻⵏ ⵢⴻⵔⵏⴰ ⴰⴷ ⴷ-ⵍⵀⵓⵏ ⵢⴻⵙ-ⵙ ⵢⵉⵙⴷⴰⵡⴰⵏⴻⵏ (ⵉⵙⴻⵍⵎⴰⴷⴻⵏ ⴷ ⵢⵉⵎⵏⴰⴷⵉⵢⴻⵏ ⴷⴻⴳ ⵜⵖⴻⵎⵙⴰ ⴷ ⵢⵉⴷⵍⴻⵙ ⴰⵎⴰⵣⵉⵖ), ⴰⵎ ⵡⴰⴽⴽⴻⵏ ⴰⵔⴰ ⵃⴻⴷⵕⴻⵏ ⴷⴻⴳ-ⵙ ⵡⵓⴷⵎⴰⵡⴻⵏ ⵢⴻⵜⵜⵡⴰⵙⵙⵏⴻⵏ ⴷⴻⴳ ⵢⵉⴷⵍⴻⵙ ⴷ ⵜⵜⴰⵡⵉⵍⴰⵜ ⵉⵖⴻⵍⵏⴰⵡⴻⵏ ⴷ ⵢⵉⴱⴻⵕⵕⴰⵏⵉⵢⴻⵏ ⵏ ⵢⵉⵙⴰⵍⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ ⴰⵢ ⴷ-ⵢⴻⵙⵙⵓⴷⴷⵙⴻⵏ ⴰⵙⵙⵉⵍⴻⵖ-ⴰ.
« ⴰⵙⵙⵉⵍⴻⵖ-ⴰ ⴰⵔⴰ ⵢⵉⵍⵉⵏ ⴷⴰⵖ ⴷ ⵜⴰⴳⵏⵉⵜ ⵉ ⵓⵎⴱⴰⴷⴷⴻⵍ ⵏ ⵜⵜⴻⵊⵕⵉⴱⴰ ⴷ ⴰⵣⵡⵓⵔ ⴰⵎⴻⵣⵡⴰⵔⵓ ⵉ ⴱⴻⴷⴷⵓ ⵏ ⵓⴽⴰⵍⴰ ⴰⵔⴰ ⵢⴻⵜⵜⴽⴻⵎⵎⵉⵍⴻⵏ ⵉ ⵍⵎⴻⵏⴷ ⵏ ⵓⵄⴰⵡⴻⵏ ⵏ ⵢⵉⵏⴻⵖⵎⴰⵙⴻⵏ ⴰⵢ ⵉⵅⴻⴷⴷⵎⴻⵏ ⵙ ⵜⵎⴰⵣⵉⵖⵜ. ⵜⵉⵖⵉⵎⵉⵜ-ⴰ ⵏ ⵓⵙⵙⵉⵍⴻⵖ ⴰⴷ ⵜⵜ-ⵉⴷ-ⴹⴻⴼⵔⴻⵏⵜ ⵜⵖⵉⵎⵉⵢⵉⵏ ⵏⵉⴹⴻⵏ ⵙⴻⴳ-ⴰ ⵖⴻⵔ ⴷⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ ⴷⴻⴳ ⵢⵉⵡⴻⵏ ⵏ ⵓⵍⵖⵓ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ « ⵜⴰⵎⴰⵣⵉⵖⵜ, ⴰⵢ ⵍⴰ ⵢⴻⵜⵜⵡⴰⵙⵙⴻⵇⴷⴰⵛⴻⵏ ⴷⴻⴳ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ (ⵕⵕⴰⴷⵢⵓ, ⵜⵉⵍⵉⵥⵔⵉ, ⵜⴰⵖⴻⵎⵙⴰ ⵢⵓⵔⴰⵏ) ⴰⴷⴻⵏⵏⵉⵜ (ⵍⴰⴱⵓⴷⴷ) ⴰⴷ ⵜⴻⵏⵏⴻⵔⵏⵉ ⵎⵍⵉⵃ ⴷⴻⴳ ⵜⵜⴰⵡⵉⵍⴰⵜ-ⴰ ».
ⵉⵙⵡⵉ ⵏ ⵜⵖⵉⵎⵉⵜ-ⴰ ⵏ ⵓⵙⵙⵉⵍⴻⵖ ⵏⴻⵜⵜⴰ ⴷ « ⵜⴰⵎⵓⵙⵙⵏⵉ ⵏ ⵜⴻⴳⵏⵉⵜ ⴰⵢⴷⴻⴳ ⵜⴻⵍⵍⴰ ⵜⵖⴻⵎⵙⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴻⴳⵏⵉⵜ ⵏ ⵓⵙⵙⴻⵇⴷⴻⵛ-ⵏⵏⴻⵙ ⵙ ⵜⵎⵓⵙⵙⵏⵉ ⵏ ⵜⵜⴻⵊⵕⵉⴱⴰⵜ ⵏ ⵢⴰⵍ ⵚⵚⴻⵏⴼ ⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⴰⵢ ⵜⵜ-ⵢⴻⵙⵙⴻⵇⴷⴰⵛⴻⵏ, ⴰⵎ ⵡⴰⴽⴽⴻⵏ ⴰⵔⴰ ⵢⴻⵜⵜⵡⴰⵙⵙⴻⵏ ⵡⴰⵢⴻⵏ ⴰⵢ ⴷ-ⵢⴻⵜⵜⵡⴰⴽⴻⵙⴱⴻⵏ ⴷⴻⴳ ⵓⵏⵔⴰⵔ-ⴰ ⴷ ⵡⴰⵢⴻⵏ ⴰⵢ ⵉⵅⵓⵚⵚⴻⵏ ⵍⴰⴷⵖⴰ ⴷⴻⴳ ⵓⵙⵙⵉⵍⴻⵖ, ⵜⵜⴰⵡⵉⵍⴰⵜ ⵏ ⵜⵓⵜⵍⴰⵢⵜ ⴷ ⵓⵎⵄⴰⵡⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⵅⴻⴱⴱⴻⵔ ⵜⴻⵖⴱⴰⵍⵓⵜ-ⴰ.
ⴰⵙⵙⵉⵍⴻⵖ-ⴰ ⴰⴷ ⴷ-ⵉⵍⵉⵏⵜ ⴷⴻⴳ-ⵙ 4 ⵏ ⵜⴻⵎⵙⴰⵍ, ⵢⴰⵍ ⵢⵉⵡⴻⵜ ⵙ ⵓⵙⴻⵏⵜⴻⵍ-ⵏⵏⴻⵙ, ⴰⴷ ⴷ-ⵉⵍⵉⵏⵜ ⵖⴻⴼ « ⵜⵎⵓⵙⵙⵏⵉⵡⵉⵏ ⴷ ⵜⴻⵍⵖⴰ ⵏ ⵓⵄⴰⵡⴻⵏ ⵢⴻⵔⵏⴰ ⴰⴷ ⵜⵜⴻⴽⴽⵉⵏ ⴷⴻⴳ-ⵙⴻⵏⵜ ⵢⵉⵎⵓⵣⵣⴰⴳ (ⵉⵙⴷⴰⵡⴰⵏⴻⵏ ⴷ ⵢⵉⵎⵙⴰⴷⵓⵔⴻⵏ) ⴷⴻⴳ ⵜⵖⴻⵎⵙⴰ ⴷ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⴰⵎ ⵡⴰⴽⴽⴻⵏ ⴰⵔⴰ ⵢⵉⵍⵉⵏ ⴳⴰⵔ-ⴰⵙⴻ ⵢⵉⵙⴻⵍⵎⴰⴷⴻⵏ ⴷ ⵢⵉⵎⵏⴰⴷⵉⵢⴻⵏ ⴷⴻⴳ ⵜⵓⵜⵍⴰⵢⵜ ⴷ ⵢⵉⴷⵍⴻⵙ ⴰⵎⴰⵣⵉⵖ ».
ⵉⵙⵡⵉ ⵏ ⵓⵎⵢⴰⴳⴻⵔ-ⴰ ⵏⴻⵜⵜⴰ ⴷ « ⴱⴻⴷⴷⵓ ⵏ ⵓⵎⴰⵀⵉⵍ (ⴰⵅⴻⴷⴷⵉⵎ) ⵖⴻⴼ ⵓⵎⴰⵡⴰⵍ ⵉⵎⵙⵉⵙⴼⵙⴻⵙ ⴰⵔⴰ ⵇⵇⵍⴻⵏ ⵢⵉⵏⴻⵖⵎⴰⵙⴻⵏ ⴰⴷ ⵜ-ⵙⵙⴻⵇⴷⴰⵛⴻⵏ, ⵢⴻⵔⵏⴰ ⴰⴷ ⵢⵉⵍⵉ ⴷⴰⵖ ⵓⵎⵢⴰⴳⴻⵔ-ⴰ ⴷ ⵍⵍⵙⴰⵙ ⵉ ⵡⴰⵀⵉⵍ ⵏ ⵓⵙⵙⵉⵍⴻⵖ ⴰⵔⴰ ⵢⴻⴹⴹⴼⴻⵏ ⴰⵛⵃⴰⵍ ⵏ ⵢⵉⵙⴻⴳⴳⴰⵙⴻⵏ ⵉ ⵍⵎⴻⵏⴷ ⵏ ⵓⵙⵙⴻⵍⵀⵓ ⴷ ⵓⵙⵙⴻⵣⴳⵉ ⵏ ⵓⵙⵡⵉⵔ » ⵏ ⵢⵉⵏⴻⵖⵎⴰⵙⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ ⴰⵢ ⴷ-ⵢⴻⵙⵙⵓⴷⴷⵙⴻⵏ ⴰⵙⵙⵉⵍⴻⵖ-ⴰ ⴷⴻⴳ ⵓⴽⴰⵜⴰⵔ ⵏ ⵡⴰⵀⵉⵍ-ⵏⵏⴻⵙ ⵏ ⵓⵔⵎⵓⴷ ⵉ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵏ ⵜⵎⴰⵣⵉⵖⵜ ⴷⴻⴳ ⵜⵡⴻⵏⵏⴰⴹⵜ ⵙ ⵓⵎⴰⵜⴰ ⴷ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⵙ ⵍⵅⵓⵚⵓⵚ.
