Asebter amenzawi
Astenyi n umtawa n ticcurka gar Useqqamu n Timmuzɣa d Tesbeddit Tuṛufit-Taɛṛabt n tezrawin tunnigin
LEZZAYER TAMANEɣT – Yestenya iḍelli deg Lezzayer Tamaneɣt Useqqamu Unnig i Timmuzɣa yiwen n umtawa d Tesbeddit Tuṛufit-Taɛṛabt n Tezrawin Tunnigin i lmend n ticcurka tasdawant d tdelsant gar sin-a n yidisan deg tutlayt d yidles imaziɣen.
Amtawa-a yestenya-t umaru amatu n Useqqamu Unnig i Timmuzɣa, Si El-Hachemi Assad d umaru aslekman n tesbeddit, Inmaculada Marrero Rocha.
Yiwen seg yiswan imeqranen n umtawa-a netta d asbani n wazal azamulan ay tesɛa temdint n Tɣernaḍt (Spenyul - ay d-tessebded teslalt tamaziɣt n Yiziriyen deg 1013) deg wayen yerzan tanḍa tadelsant d tmeddurt n yidelsan wa ɣer yidis n wayeḍ d dduṛ amezruyan n temdint-a deg umbaddel gar Lezzayer d Spenyul.
Seg yidis niḍen, amtawa-a d win ay d-yellan i usseǧhed n ticcurka tasdawant d tdelsant yebnan ɣef udiwenni, ambaddel, assileɣ d usɛeddi n tmussni yeqqnen ɣer tutlayt d yidles imaziɣen, d lebni n ticcurka ara idumen s ussebded n uẓeḍḍa n yimazzayen d yimnadiyen deg yinurar ay yerzan sin-a n yidisan.
Deg ukatar n umtawa-a, la ssefrayen sin-a n yidisan ay yettekkan deg-s ad gen aṭas n yimuhal (ixeddimen) am umbaddel n tsufiɣin, acrak n telɣa ɣef yimuhal ay ttgen deg unrar n tutlayt d yidles amaziɣ d umɛawen ussnan d udelsan, assuffeɣ ucrik n yimuhal isdawanen d wid n unadi, ladɣa wid ara d-yefrurin seg temliliyin ara d-yilin gar sin-a n yidisan.
Sin-a n yidisan la ssefrayen daɣ ad d-yili usseqdec ucrik n teṛcibin d teɣbula tumḍinin d tfetrawin, am wakken ara ttunefkent taggazin i yinelmaden ara yeddun ad gerrzen aswir-nsen neɣ ad gen anadi s uttekki deg yissilɣen d yisaragen yemmuzzgen.
Tasbeddit Tuṛufit-Taɛṛabt n Tezrawin Tunnigin tesɛa tanarit-nnes deg Tɣernaḍt yellan d tamdint tamezruyant yerna d azamul n udiwenni gar yidelsan gar Tuṛuft d umaḍal islaman. Tennulfa-d Tesbeddit-a s yiwet n tneɣtust n Umni Uṛufi ay sɛeddan ass n 30 Meɣres 1984, yerna iswi-nnes d lebni n tallunin n udiwenni d umɛawen gar tmura n Tdukli Tuṛufit d tmura n Ugmuḍ Alemmas d Tefriqt n Ugafa.
