ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵎⴰⵙⵙⴰ ⴱⴻⵏⴳⵀⴰⴱⵔⵉⵜ ⵜⴻⵔⵥⴻⵎ ⵜⵓⵖⴰⵍⵉⵏ ⵖⴻⵔ ⵍⴻⵇⵔⴰⵢⴰ ⵙ ⵡⵓⴷⴻⵎ ⵓⵏⵚⵉⴱ ⵉ ⵓⵙⴻⴳⴳⴰⵙ ⵏ 2015-2016

ⵙⴽⵉⴽⴷⴰ – ⵙⴻⴳ ⵓⵖⴻⵔⴱⴰⵣ ⴰⵍⴻⵎⵎⴰⵙ ⵏ ⴰⵧⵓⴰⴷ-ⵣⵉⴷⴰⵏⴻ (ⵙⴽⵉⴽⴷⴰ) ⴰⵢ ⵜⴻⴼⴽⴰ ⵜⵏⴻⵖⵍⴰⴼⵜ ⵏ ⵜⵜⴻⵕⴱⴻⵢⵢⴰ ⵜⴰⵖⴻⵍⵏⴰⵡⵜ ⵍⴰⵎⴻⵕ ⵉ ⴱⴻⴷⴷⵓ ⵏ ⵡⵓⵖⴰⵍ ⵓⵏⵚⵉⴱ ⵖⴻⵔ ⵓⵖⴻⵔⴱⴰⵣ ⵜⴰⵚⴻⴱⵃⵉⵜ ⵏ ⵡⴰⵙⵙ ⵏ ⵍⵃⴻⴷⴷ.

ⵜⴰⵏⴻⵖⵍⴰⴼⵜ ⵜⴻⴷⴷⴰ ⵖⴻⵔ ⴷⵉⵏ ⵖⴻⵔ ⵢⵉⴷⵉⵙ ⵏ ⵢⵉⵎⴹⴻⴱⴱⵔⴻⵏ ⵏ ⵜⵡⵉⵍⴰⵢⵜ, ⴽⵔⴰ ⵏ ⵢⵉⵎⴹⴻⴱⴱⵔⴻⵏ ⵏ ⵜⵜⴻⵕⴱⴻⵢⵢⴰ ⴰⵢ ⵉⵅⴻⴷⴷⵎⴻⵏ ⴷⴻⴳ ⵓⵖⵍⵉⴼ, ⴽⵔⴰ ⵏ ⵡⵓⴼⵔⵉⵏⴻⵏ ⴷ ⵢⵉⵎⴰⵡⵍⴰⵏ ⵏ ⵢⵉⴱⴰⵍⵎⵓⴷⴻⵏ, ⴰⵎ ⵡⴰⴽⴽⴻⵏ ⴰⵢ ⵜⴻⵃⴷⴻⵕ ⴷⴻⴳ ⵢⵉⵡⴻⵜ ⵏ ⵜⴻⵎⵙⵉⵔⵜ (ⴷⴷⴻⵕⵙ) ⵖⴻⴼ ⵓⵎⵄⴰⵡⴻⵏ ⴰⵖⴻⵍⵏⴰⵡ ⴰⵢ ⴷ-ⵢⴻⵍⵍⴰⵏ ⴷ ⴰⵣⴰⵎⵓⵍ ⵉ ⵓⵙⴻⴳⴳⴰⵙ-ⴰ ⵏ ⵓⵖⴻⵔⴱⴰⵣ.

ⵎⴰⵙⵙⴰ ⴱⴻⵏⴳⵀⴻⴱⵔⵉⵜ ⵜⴻⵏⵏⴰ-ⴷ, ⵉ ⵍⵎⴻⵏⴷ ⵏ ⵡⴰⵢⴰ, ⴷ ⴰⴽⴽⴻⵏ ⵓⵖⴰⵍ-ⴰ ⵖⴻⵔ ⵓⵖⴻⵔⴱⴰⵣ ⵉ ⵓⵙⴻⴳⴳⴰⵙ ⵏ 2015-2016 ⴱⴷⴰⵏ ⵙⵙⴻⵡⵊⴰⴷⴻⵏ-ⴰⵙ-ⴷ ⴷⴻⴳ ⵎⴻⵖⵔⴻⵙ ⵏ ⵓⵙⴻⴳⴳⴰⵙ-ⴰ, ⵢⴻⵔⵏⴰ ⵜⴻⴱⵖⴰ-ⵜ ⴰⴷ ⵢⵉⵍⵉ ⴷ ⵓⵔⴱⵉⵃ ⵢⴻⵔⵏⴰ ⴷ ⵜⴰⴳⵏⵉⵜ ⵉ ⴱⴻⴷⴷⵓ ⴰⵎⴰⵢⵏⵓ ⵉ ⵓⵙⵙⴻⵍⵀⵓ ⵏ ⵓⵙⵡⵉⵔ ⵏ ⵓⵖⴻⵔⴱⴰⵣ ⴰⴷⵣⴰⵢⵔⵉ. « ⵡⴰ ⴷ ⵢⵉⵡⴻⵏ ⵙⴻⴳ ⵢⵉⵙⵡⴰⵏ ⴰⵢ ⵢⴻⵙⵙⴻⴼⴽ ⴰⴷ ⵜⴻⵏ-ⵏⴰⵡⴻⴹ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵏⴻⵙⵙⴻⵇⴷⴻⵛ ⴰⴽⴽ ⵜⵉⵣⴻⵎⵎⴰⵔ, ⴰⵎⴰ ⴷ ⵜⵉⴷ ⵏ ⵛⵛⵉ, ⵜⵉⴷ ⵏ ⵢⵉⵎⴷⴰⵏⴻⵏ ⴷ ⵜⵉⴷ ⵏ ⵢⵉⵙⴻⵍⵎⴰⴷⴻⵏ ⵉ ⵍⵎⴻⵏⴷ ⵏ ⵡⴰⵢⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.

ⴷⴻⴳ ⵜⵡⵉⵍⴰⵢⵜ ⵏ ⵙⴽⵉⴽⴷⴰ, 204.411 ⵏ ⵢⵉⴱⴰⵍⵎⵓⴷⴻⵏ ⴰⵢ ⵢⵓⵖⴰⵍⴻⵏ ⵖⴻⵔ ⵓⵖⴻⵔⴱⴰⵣ, ⴳⴰⵔ-ⴰⵙⴻⵏ 101.638 ⵏ ⵢⵉⴱⴰⵍⵎⵓⴷⴻⵏ ⵏ ⵓⵖⴻⵔⴱⴰⵣ ⴰⵎⴻⵏⵣⵓ, 67.206 ⵏ ⵓⵖⴻⵔⴱⴰⵣ ⴰⵍⴻⵎⵎⴰⵙ ⴷ 35.567 ⵏ ⵢⵉⵏⴻⵍⵎⴰⴷⴻⵏ ⵏ ⵜⴻⵙⵏⴰⵡⵉⵜ, ⴰⵎ ⵡⴰⴽⴽⴻⵏ ⴰⵢ ⵍⵍⴰⵏ ⴷⴰⵖ 6.000 ⵏ ⵢⵉⴱⴰⵍⵎⵓⴷⴻⵏ ⵉⵎⴰⵢⵏⵓⵜⴻⵏ ⴰⵢ ⵉⵄⴻⴷⴷⴰⵏ ⵙⴻⴳ ⵢⵉⵖⴻⵔⴱⴰⵣⴻⵏ ⵏ ⵓⵙⵙⴻⵡⵊⴻⴷ ⵖⴻⵔ ⵓⵖⴻⵔⴱⴰⵣ ⴰⵎⴻⵏⵣⵓ.

ⴷⴻⴳ ⵜⵎⵓⵔⵜ ⵙ ⵓⵎⴰⵜⴰ, 8.112.475 ⵏ ⵢⵉⴱⴰⵍⵎⵓⴷⴻⵏ ⴰⵢ ⵢⵓⵖⴰⵍⴻⵏ ⵖⴻⵔ ⵓⵖⴻⵔⴱⴰⵣ, ⴳⴰⵔ-ⴰⵙⴻⵏ 4.109.964 ⵏ ⵓⵖⴻⵔⴱⴰⵣ ⴰⵎⴻⵏⵣⵓ, 2.666.227 ⵏ ⵓⵖⴻⵔⴱⴰⵣ ⴰⵍⴻⵎⵎⴰⵙ ⴷ 1.336.884 ⵏ ⵜⴻⵙⵏⴰⵡⵉⵜ, ⵢⴻⵔⵏⴰ ⴰⴷ ⴷ-ⵍⵀⵓⵏ ⵢⴻⵙ-ⵙⴻⵏ 400.000 ⵏ ⵢⵉⵙⴻⵍⵎⴰⴷⴻⵏ, ⴳⴰⵔ-ⴰⵙⴻⵏ 19.000 ⵏ ⵢⵉⵙⴻⵍⵎⴰⴷⴻⵏ ⵉⵎⴰⵢⵏⵓⵜⴻⵏ ⴰⵢ ⵢⴻⵜⵜⵡⴰⵇⴻⴱⵍⴻⵏ ⴷⴻⴳ ⵜⴻⵎⵙⵉⵣⵡⴻⵔⵜ ⵏ ⵢⵉⵙⴻⵍⵎⴰⴷⴻⵏ ⵏ ⵓⵙⴻⴳⴳⴰⵙ-ⴰ.

ⵎⴰⵙⵙⴰ ⴱⴻⵏⴳⵀⴻⴱⵔⵉⵜ ⴰⴷ ⵜⴽⴻⵎⵎⴻⵍ ⵜⵉⵔⵣⵉ-ⵏⵏⴻⵙ ⵏ ⵓⵏⵔⴰⵔ ⴷⴻⴳ ⵜⵡⵉⵍⴰⵢⵜ-ⴰ ⴰⴽⴽⴻⵏ ⴰⴷ ⵜⴻⵙⵙⴻⴼⵇⴻⴷ ⵉⵎⵓⴽⴰⵏ ⵢⴻⵇⵇⵏⴻⵏ ⵖⴻⵔ ⵓⵃⵔⵉⵛ-ⵏⵏⴻⵙ ⵢⴻⵔⵏⴰ ⴰⴷ ⵜⴻⵔⵥⴻⵎ ⴽⵔⴰ ⵏ ⵢⵉⵖⴻⵔⴱⴰⵣⴻⵏ ⵉⵎⴰⵢⵏⵓⵜⴻⵏ, ⴰⵎ ⵡⴰⴽⴽⴻⵏ ⴰⵔⴰ ⵜⴻⵎⵍⵉⵍ ⴷ ⴽⵔⴰ ⵏ ⵢⵉⵎⴹⴻⴱⴱⵔⴻⵏ ⵏ ⵓⵃⵔⵉⵛ ⵏ ⵜⵜⴻⵕⴱⴻⵢⵢⴰ ⴰⵢ ⵉⵅⴻⴷⴷⵎⴻⵏ ⴷⴻⴳ ⵜⵡⵉⵍⴰⵢⵜ-ⴰ.