Asebter amenzawi
Massa Benghabrit terẓem tuɣalin ɣer leqraya s wudem unṣib i useggas n 2015-2016
SKIKDA – Seg uɣerbaz alemmas n Aouad-Zidane (Skikda) ay tefka tneɣlaft n tteṛbeyya taɣelnawt lameṛ i beddu n wuɣal unṣib ɣer uɣerbaz taṣebḥit n wass n lḥedd.
Taneɣlaft tedda ɣer din ɣer yidis n yimḍebbren n twilayt, kra n yimḍebbren n tteṛbeyya ay ixeddmen deg uɣlif, kra n wufrinen d yimawlan n yibalmuden, am wakken ay teḥdeṛ deg yiwet n temsirt (ddeṛs) ɣef umɛawen aɣelnaw ay d-yellan d azamul i useggas-a n uɣerbaz.
Massa Benghebrit tenna-d, i lmend n waya, d akken uɣal-a ɣer uɣerbaz i useggas n 2015-2016 bdan ssewjaden-as-d deg Meɣres n useggas-a, yerna tebɣa-t ad yili d urbiḥ yerna d tagnit i beddu amaynu i usselhu n uswir n uɣerbaz adzayri. « Wa d yiwen seg yiswan ay yessefk ad ten-naweḍ yerna yessefk ad nesseqdec akk tizemmar, ama d tid n cci, tid n yimdanen d tid n yiselmaden i lmend n waya », ɣef wakken ay d-tenna.
Deg twilayt n Skikda, 204.411 n yibalmuden ay yuɣalen ɣer uɣerbaz, gar-asen 101.638 n yibalmuden n uɣerbaz amenzu, 67.206 n uɣerbaz alemmas d 35.567 n yinelmaden n tesnawit, am wakken ay llan daɣ 6.000 n yibalmuden imaynuten ay iɛeddan seg yiɣerbazen n ussewjed ɣer uɣerbaz amenzu.
Deg tmurt s umata, 8.112.475 n yibalmuden ay yuɣalen ɣer uɣerbaz, gar-asen 4.109.964 n uɣerbaz amenzu, 2.666.227 n uɣerbaz alemmas d 1.336.884 n tesnawit, yerna ad d-lhun yes-sen 400.000 n yiselmaden, gar-asen 19.000 n yiselmaden imaynuten ay yettwaqeblen deg temsizwert n yiselmaden n useggas-a.
Massa Benghebrit ad tkemmel tirzi-nnes n unrar deg twilayt-a akken ad tessefqed imukan yeqqnen ɣer uḥric-nnes yerna ad terẓem kra n yiɣerbazen imaynuten, am wakken ara temlil d kra n yimḍebbren n uḥric n tteṛbeyya ay ixeddmen deg twilayt-a.
