Asebter amenzawi

CAN-2017: Lezzayer ad turar s uzegzaw

MASERU – Taɣlamt taɣelnawt n Lezzayer ad turar, deg temlilit-nnes d Lesotho ass n lḥedd (ɣef 3s00 n tmeddit) deg Maseru s yiceḍḍiḍen-nnes izegzawen, yerna timlilit-a i lmend n uɛeddi ɣer Teqbuct n Tefriqt n Yiɣlanen n 2017 ad d-tili deg wass wis sin n wurar n tegrawt J aydeg tettekka Lezzayer.

Ṛṛay-a yeffeɣ-d deg yiwet n temlilit n yimḍebbren itekniyen ay d-yellan ass n ssebt tameddit deg usensu n « The Lesotho Sun », s uḥdaṛ n yimwekkel n temlilit d yigensasen (wid yettmettilen) taɣlamt tadzayrit d tin n Lesotho. Seg yidis-nsen, imariren n Lesotho ad d-lsen iceḍḍiḍen-nsen imellalen.

Timlilit-a ad tt-yesseddu unefray anamibi Jackson Pavaza, yerna ad t-ɛawnen sin n warraw n tmurt-nnes: Isaskar Boois d Christoph Alfred Vries.

Deg temlilit niḍen n tcirt n uḍar ara d-yilin deg tegrawt J, Ityupya tedda ɣer Seychelles akken ad turar mgal teɣlamt n tmurt-a yerna tfuk timlilit-nnes s 1 ɣer 1.

S temlilit-a, Ityupya d nettat ay d tamezwarut deg tegrawt J s 4 n tenqiḍin, ma d Lezzayer d tis snat deg tegrawt s 3 tenqiḍin. Seychelle d tis 3 s 1 n tenqiḍt, ma d Seychelles d taneggarut yerna ur tesɛi ula d yiwet n tenqiḍt.