Asebter amenzawi

Tipaza: asarag agraɣlan amezwaru ɣef ussismeḍ azedgan deg Busmaɛil

TIPAZA – Asarag agraɣlan amezwaru n tesnatwilin (ttiknulujiyyat) tizedganin n ussismeḍ yebda-d ass n ttlata deg Busmaɛil yerna tessuddes-it Tayunt (lwiḥda) n Usnefli n Ttawil n Tafukt (UDES). Asarag-a ad ttekkin deg-s yimazzayen (lxubara’) d yimnadiyen ama n Tefriqt n Ugafa, ama n Tuṛuft.

Amyager-a ad mlilent deg-s tesdawiyin, ammasen idzayriyen n unadi, imazzayen ifṛensisen, ispenyuliyen d yiswisiyen, yerna ad nadin deg-s ɣef yinagrawen (l’anḍima) timaynutin n ussismeḍ (imsisemḍen, isnezwayen [lmukayyifat] d tesbuḥrutin) d lateṛ usrid ay yesɛa ttawil n ussismeḍ ɣef twennaḍt, ɣef wakken ay d-yenna uselway n usarag-a, amnadi Mohamed Abbas, i Tnegga n Yisalan n Lezzayer.

Imttekkiyen ad d-ssiwlen daɣ ɣef « tesnatwilin timaynutin n ussismeḍ ay sseqdacen deg lbenyanat » d « dduṛ n tẓewrin (ṭṭaqat) tizedganin deg ussenqes n tfatuṛt n teẓwert, ladɣa tafatuṛt n trisiti ay yezgan trennu deg unebdu deg temnaḍin tiḥmayanin », ɣef wakken ay d-yenna.

Mass Abbas yebder-d leḥsabat ineggura ay d-yessuffeɣ uɣlif n teẓwert, d wid aydeg ay d-iban d akken asseqdec n trisiti yerna s 14% ɣef leḥsab n yiseggasen yezrin.

Seg yidis-nnes, anemhal n UDES, Aduktur Bouzidi, yenna-d d akken asarag-a amezwaru seg ṣṣenf-nnes deg Lezzayer yesɛa azal, yerna ad yili d « amkan aydeg ara d-mlilen yimazzayen n Tefriqt n Ugafa d Yilel Agrakal akken ad mbaddalen ttejṛibat-nsen yerna ad d-qeddmen isnulfuyen-nsen imaynuten ineggura deg unrar n ussismeḍ d tẓewrin tizedganin ».