ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵎⵉⵏⵉⴳⴻⵏ ⴰⴷ ⵣⴻⵎⵔⴻⵏ ⴰⴷ ⴷ-ⵙⵙⵓⴼⴼⵓⵖⴻⵏ ⵍⴽⴰⵖⴻⴹ ⵏ ⵊⵊⵉⵊⵎⴰⵜ ⵏ ⵛⵛⵕⴻⵄ ⵙ ⵉⵏⵜⴻⵔⵏⴻⵜ
ⵜⵉⵒⴰⵣⴰ – ⵉⴷⵣⴰⵢⵔⵉⵢⴻⵏ ⴰⵢ ⵉⵣⴻⴷⵖⴻⵏ ⴷⴻⴳ ⵓⵣⵖⴰⵔ ⴰⴷ ⵣⴻⵎⵔⴻⵏ ⴰⴷ ⴷ-ⵙⵙⵓⴼⴼⵓⵖⴻⵏ ⵍⴽⴰⵖⴻⴹ ⵏ ⵊⵊⵉⵊⵎⴰⵜ ⵏ ⵛⵛⵕⴻⵄ ⵙ ⵉⵏⵜⴻⵔⵏⴻⵜ ⵙⴻⴳ ⵡⴰⵙⵙ ⵏ 30 ⵜⵓⴱⴻⵕ ⴷ ⴰⵙⴰⵡⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵜⵉⵒⴰⵣⴰ ⵓⵏⴻⵎⵀⴰⵍ ⴰⵎⴰⵜⵓ ⵏ ⵓⵙⵙⴻⵜⵔⴻⵔ (ⵄⴰⵚⵔⴰⵏⴰ) ⵏ ⵓⵖⵍⵉⴼ ⵏ ⵜⴻⵖⴷⴻⵎⵜ, ⴰⴱⴷⴻⵍⵀⴰⴽⵉⵎ ⴰⴽⴽⴰ.
« ⵜⵜⵡⴰⴷⴷⵎⴻⵏ ⴰⴽⴽ ⵢⵉⵃⴻⵣⵣⵉⴱⴻⵏ ⵉⵜⴻⴽⵏⵉⵢⴻⵏ ⴰⴽⴽⴻⵏ ⴰⴷ ⵣⴻⵎⵔⴻⵏ ⵢⵉⴷⵣⴰⵢⵔⵉⵢⴻⵏ ⴰⵢ ⵉⵣⴻⴷⵖⴻⵏ ⴷⴻⴳ ⵢⴰⵍ ⵜⴰⵎⵓⵔⵜ ⵏ ⵓⵎⴰⴹⴰⵍ ⴰⴷ ⴷ-ⵊⴻⴱⴷⴻⵏ ⵍⴽⴰⵖⴻⴹ-ⵏⵙⴻⵏ ⵏ ⵊⵊⵉⵊⵎⴰⵜ ⵏ ⵛⵛⵕⴻⵄ ⵙ ⵉⵏⵜⴻⵔⵏⴻⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴰⴽⴽⴰ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⴷⴻⴳ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵉ ⵓⵄⵔⴰⴹ ⵏ ⵓⵛⴰⵕⴻⵄ ⵙ ⵉⵏⵜⴻⵔⵏⴻⵜ ⴷⴻⴳ ⵓⵅⵅⴰⵎ ⵏ ⵛⵛⵕⴻⵄ ⵏ ⵜⴻⵇⵍⵉⵄⵜ, ⴷⴻⴳ ⵜⵉⵒⴰⵣⴰ.
ⵢⴻⵔⵏⴰ-ⴷ ⵎⴰⵙⵙ ⴰⴽⴽⴰ ⴷ ⴰⴽⴽⴻⵏ ⵡⵉⵏ ⴰⵢ ⵢⴻⴱⵖⴰⵏ ⴰⴷ ⴷ-ⵢⴻⵙⵙⵓⴼⴼⴻⵖ ⵍⴽⴰⵖⴻⴹ-ⴰ ⵢⴻⵙⵙⴻⴼⴽ ⴰⴷ ⵢⴻⴷⴷⵓ ⵖⴻⵔ ⵜⵇⴻⵏⵚⵓⵍⵜ ⵜⴰⴷⵣⴰⵢⵔⵉⵜ ⴰⵢ ⴷ-ⵉⵇⴻⵔⴱⴻⵏ ⵖⴻⵔ ⵡⴰⵏⴷⴰ ⴰⵢ ⵢⴻⵣⴷⴻⵖ ⴰⴽⴽⴻⵏ ⴰⴷ ⵢⴻⵎⵎⴻⵕⴽⵉ ⵉⵎⴰⵏ-ⵏⵏⴻⵙ.
ⵙⴰⴽⴽⵉⵏ, ⴰⴷ ⴰⵙ-ⴷ-ⴰⵣⵏⴻⵏ ⵜⴰⴱⵕⴰⵜ ⵏ ⵓⵙⴰⵡⴰⵍ (ⴰⵙⴰⵎⴰⵙ) ⴰⵢⴷⴻⴳ ⴰⵔⴰ ⴰⵙ-ⴷ-ⴼⴽⴻⵏ ⴰⵡⴰⵍ ⵓⴼⴼⵉⵔ ⴷ ⵡⵓⴹⴹⵓⵏ ⵓⴼⴼⵉⵔ ⴰⴽⴽⴻⵏ ⴰⴷ ⵢⴰⴷⴻⴼ ⵖⴻⵔ ⵉⵏⵜⴻⵔⵏⴻⵜ ⵢⴻⵔⵏⴰ ⴰⴷ ⴷ-ⵢⴻⵊⴱⴻⴷ ⵍⴽⴰⵖⴻⴹ-ⵏⵏⴻⵙ ⵏ ⵊⵊⵉⵊⵎⴰ « ⵎⴻⵍⵎⵉ ⴰⵢ ⴰⵙ-ⵢⴻⵀⵡⴰ, ⴰⵏⴷⴰ ⴰⵢ ⴰⵙ-ⵢⴻⵀⵡⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.
« ⵛⵛⵖⴻⵍ-ⴰ ⵢⴻⵍⵍⴰ-ⴷ ⴷ ⴰⵃⵔⵉⵛ ⵙⴻⴳ ⵡⵓⵙⵙⵉⵙⴻⵏ (ⵍⵎⴻⴵⵀⵓⴷⴰⵜ) ⵏ ⵓⵙⵙⴻⵜⵔⴻⵔ ⵏ ⵜⴻⵖⴷⴻⵎⵜ ⴷ ⵓⵙⵙⴻⴼⵄⴻⵍ ⵏ ⵍⵇⴰⵏⵓⵏ ⴰⵎⴰⵢⵏⵓ ⵏ 2015 ⵉ ⵍⵎⴻⵏⴷ ⵏ ⵓⵖⴻⵍⵍⴻⵜ ⵏ ⵜⴻⵙⵏⴰⵜⵡⵉⵍⵉⵏ (ⵜⵜⵉⴽⵏⵓⵍⵓⴵⵉⵢⵢⴰⵜ) ⵜⵉⵎⴰⵢⵏⵓⵜⵉⵏ ⵏ ⵓⵅⴻⴱⴱⴻⵔ ⴷ ⵜⴻⵖⵡⴰⵍⵜ ⴷⴻⴳ ⵓⵃⵔⵉⵛ-ⴰ, ⴷⵖⴰ ⴷ ⴰⵢⴰ ⴰⵢ ⴷ-ⵢⴻⵙⵙⴰⴷⴼⴻⵏ ⴷⴰⵖ ⴰⵙⵜⴻⵏⵢⵉ ⴰⵍⵉⴽⵜⵕⵓⵏⴰⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵓⵙⵙⴻⵄⵊⴻⵍ ⵏ ⴼⴻⵔⵔⵓ ⵏ ⵛⵛⵕⵓⵄⴰⵜ ⴷ ⵜⵓⴽⵛⵉ ⵏ ⵍⴻⴽⵡⴰⵖⴻⴹ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵎⴹⴻⴱⴱⴻⵔ-ⴰ.
