Asebter amenzawi

Lluzinat n Lḥeǧǧaṛ: Bouchouareb iwekked-d ɣef uṣeggem n ufarnu wis sin deg lawan

ƐENNABA – Ixeddimen n uṣeggem d ussetrer (ɛaṣrana) n ufarnu wis sin n lluzinat n Lḥeǧǧaṛ (Ɛennaba) yessefk ad d-ilin « s uqader n lweqt ay d-yettwabedren deg leɛqed » akken ad d-yuɣal ufarnu-a ɣer uxeddim « ma aṭas, deg Meɣres n 2016 », ɣef wakken ay d-yenna ass n laṛebɛa uneɣlaf n temguri (ṣṣinaɛa) d lminat, Abdeslam Bouchouareb.

Yenna-d daɣ uneɣlaf, mi yessefqed timacinin n ulebbeḍ n wuzzal (yeḥman neɣ semmḍen), d akken assewjed n uɣawas (leblan) n ussefti ad yessemɣer lɣella n wuzzal ɣer 1,2 d amelyun n yiṭunen deg useggas, yerna ad taweḍ lɣella-a ɣer 2 n yimelyunen n yiṭunen deg useggas seg-a ɣer 2017, yerna d aya ara yeǧǧen Lezzayer ad tekfu iman-nnes seg yidis n wuzzal.

Aɣawas-a n ussefti ad d-yesqam amelyaṛ n yidulaṛen, gar-asen 355 n yimelyunen i uɣellet n lluzinat d uxelleṣ n ḍḍlaba-nsent, d 720 n yimelyunen n yidulaṛen i ussefti d uṣeggem n ttawilat n uxeddim, d 76 n yimelyunen n yidulaṛen i ussetrer n lminat n wuzzal n Lwenza d Buxeḍra deg twilayt n Tbessa, ɣef wakken ay d-yenna uneɣlaf deg yiwen n uneskin (ɛarḍ) ay d-yettwaqeddmen i uneɣlaf.

Aɣawas-a ay yeḍfer isurifen yemgerraden seg-a ɣer Dujembeṛ, akken ad d-tuɣal temnaḍt n ussefsi n wuzzal ɣer uxeddim deg 3 n wayyuren imezwura n 2016, ɣef wakken ay d-yenna uneskin-nni, am wakken ay d-yebder iḥezziben yeqqnen ɣer usseddu n yixeddamen deg tegnit-a n uṣeggem.

Aneɣlaf yessefqed daɣ lluzin n tkebbanit n Ferrovial ay d-ixeddmen ttawilat yeqqnen ɣer ubrid n tmacint, yerna yenna-d d akken yella uɣawas i uxdam n 380 n yifaguten n tmacint i lmend n ussiweḍ n ufusfaṭ.