Asebter amenzawi

Lḥukuma tefka azal i ussiweḍ n yisalan deg unẓul n tmurt

LEZZAYER TAMANEɣT – Yenna-d uneɣlaf n teɣwalt (littiṣal), Hamid Grine, ass n lexmis deg Lezzayer Tamaneɣt, d akken anabaḍ (lḥukuma) yefka « azal d ameqran » i ussiweḍ n yisalan deg unẓul (lǧanub) n tmurt, yerna yenna-d d akken ad d-tettwassebded deg 2016 yiwet n tkebbanit ad iferrqen iɣmisen deg unẓul.

« Anabaḍ yettak azal d ameqran i ussiweḍ n yisalan deg unẓul n tmurt yerna aya d aḥric seg tsuddest-nnes (istratiǧiyya) n ussiweḍ n yisalan ɣer wakk iḥricen n wakal aɣelnaw », ɣef wakken ay d-yenna Mass Grine mi d-yerra ɣef yiwet n tuttra n yiwen n umazan (nna’ib) deg Ugraw Aɣerfan Aɣelnaw deg wayen yerzan assebded n terga n tliẓri n unabaḍ s tmaceɣt i lmend n yimezdaɣen n unẓul.

Seg Dujembeṛ n 2014, tuɣal Ṛṛadyu n Tmenɣest tesɛedday-d ahilen-nnes deg yiḍ, deg wass, ama s taɛṛabt, ama s tefṛensist, ama s tmaziɣt (tamaceɣt), yerna reẓmen snat n tnariyin (lbiruwat) timaynutin n ṛṛadyu-a, yiwet deg In Gezzam, ma d tayeḍ deg Tin Zawaṭin i lmend n ussiweḍ n lmujat n ṛṛadyu-a ɣer wakk timnaḍin n twilayt, imi ay tella d ttawil i uxebber ɣef tedyanin d tlufa ay yerzan imezdaɣen, ɣef wakken ay d-yenna uneɣlaf.

Deg wayen yerzan tiliẓri tanagdudt (ɛumumiyya), yenna-d Mass Grine d akken yessefk ad as-reẓmen tanarit deg Tmenɣest, yerna ineɣmasen n Tkebbanit Taɣelnawt n Tliẓri (ENTV) « tteddun s nnuba ɣer twilayt-a akken ad d-gen irupurṭajen, ad d-ssiwḍen tilufa n yimezdaɣen yerna ad d-xebbren ɣef tgemmi n temnaḍt-a ».

Targa tis 4 n Tkebbanit Taɣelnawt n Tliẓri ay yessawalen s tmaziɣt « tesɛedday-d aṭas n wahilen s tmaceɣt », ɣef wakken ay d-yerna uneɣlaf.