Asebter amenzawi

Timlilit n uḍfar gar Lezzayer d Tunes: yella lebɣi i usseǧhed n umɛawen

TUNES TAMANEɣT – Tadwilt tis 18 n Useqqamu n Uḍfar gar Lezzayer d Tunes tesskanay-d lebɣi n uselway, Abdelaziz Bouteflika, d umtil-nnes atunsi, Beji Caid Essebsi, akken rnun ad ssalin aswir n wassaɣen (lɛalaqat) ucriken, ɣef wakken ay d-yenna ass n lexmis deg Tunes Tamaneɣt uneɣlaf n tɣawsiwin n Lmeɣreb, n Tdukli Tafriqit d Temɣunt Taɛṛabt, Abdelkader Messahel.

Tadwilt-a d aḥric seg ussewjed i temlilit n Tseqqamut tameqrant tuxliḍt ara d-yilin deg Lezzayer Tamaneɣt deg 25 d 26 Tubeṛ ddaw tselwit n uneɣlaf amenzu, Abdelmalek Sellal d yiɣef n unabaḍ atunsi, Habib Essid, ɣef wakken ay d-yenna Mass Messahel.

Yumar (yefṛeḥ) daɣ uneɣlaf s usseqdec n wakk ttawilat ucriken i ummager n wuguren n tɣellist (laman) yeqqnen ɣer rrebrab, tajrimt yettwassuddsen, assenzi n leslaḥ d yiminigen yeffɣen i lqanun, yerna yenna-d d akken tilufa-a « qesdent ad swaɣent arkad n temnaḍt-nneɣ yerna yessefk ad ttwaqablent s usdukkel n lmeǧhud akken ad d-naf amek ara tent-nefru ».

Mass Messahel yerra tajmilt, deg temsalt-a, i yisurifen imeqranen ay d-yellan deg umɛawen deg tɣellist gar Lezzayer d Tunes i yimenɣi mgal rrebrab.

Deg wayen yerzan amɛawen aserti, yenna-d uneɣlaf d akken yessefk ad ikemmel umciweṛ d uxeddim ucrik gar yimḍebbren n snat-a n tmura deg wayen yerzan timsal n nnfeɛ ucrik, ladɣa deg wayen yerzan abdad ɣer yidis n umciweṛ aserti gar Yilibiyen ay d-yellan ddaw leɛnaya n Yiɣlanen Yeddukklen i lmend n ussebded n unabaḍ (lḥukuma) n tdukli taɣelnawt ara yesseddun tamurt deg tallit n tukkit, yerna ad yebnu tisuda (lmu’assasat) ad yettqadaren lqanun.