Asebter amenzawi

Taqbuct n umaḍal n 2018: akcaf n yismawen n lesṭadat aydeg ara d-yili wurar (FIFA)

ZURICH – Temsefham Tdifiṛalit Tagraɣlant n Tcirt n Uḍar (FIFA) d Useqqamu n Ussuddes n Teqbuct n Umaḍal n Rusya n 2018 ɣef yismawen n yisariren (lesṭadat) n Teqbuct n Umaḍal n 2018, ɣef wakken ay d-tenna ass n lexmis tfidiṛalit.

Deg usarir mechuṛen n Loujniki ara d-ilint temlilit tamezwarut d temlilit taneggarut n Teqbuct n umaḍal n 2018, yerna asarir-a semman-as ɣef ugmam-nni (ḥayy) n Musku aydeg ay d-yezga.

Asarir niḍen ay d-yettwafernen deg tmaneɣt d asarir n Spartak ay yettwasemman ɣef teɣlamt-nni tarusit mechuṛen ay yetturaren deg-s. Asarir n Mordovia Arena, ay d-yezgan deg Saransk, semman-t ɣef tegduda n Muṛduvya, deg Rusya.

Deg 2018, imfeṛṛǧen ad d-lemden ugar ɣef Yimuṛduviyen yellan d yiwen seg yiɣerfan ineṣliyen imeqranen akk deg Rusya yerna sɛan tigemmi (tturat) tameṛkantit deg yidles d tutlayt-nsen.

Asarir n Fisht Stadium yezga-d deg temdint n Sochi yerna semman-as ɣef udrar n Fisht ay d-yezgan deg yidraren n Quqaz. Talɣa n usarir-a tga am tin n udrar-nni, yerna « Fisth » anamek-nnes « Iɣef Amellal » neɣ « Iɣef Ademdam » s tutlayt tadigit.

Ismawen unṣiben n yisariren n Teqbuct n Umaḍal n tcirt n uḍar n 2018 d wi:

Yekaterinburg Arena – Deg temdint n Yekaterinburg

Asarir n Fisht – Deg temdint n Sochi

Kazan Arena – Deg temdint n Kazan

Asarir n Kaliningrad – Deg temdint n Kaliningrad

Asarir n Loujniki , Asari n Spartak – Deg temdint n Musku

Asarir n Muṛduvya – Deg temdint n Saransk

Asarir n Nijni-Novgorod – Deg temdint n Nijni-Novgorod

Rostov Arena – Deg temdint n Rostov-ɣef-Don

Samara Arena – Deg temdint n Samara

Asarir n Saint-Petersburg – Deg temdint n Saint-Petersburg

Volgograd Arena – Deg temdint n Volgograd .