Asebter amenzawi

Amdeḥḥas n Minen yenɣa ugar n 1.200 n yimdanen

MEKKA (Tagelda Tasaɛudit) – Mmuten, ma ulac, 1.200 n yimḥuǧǧen deg umdeḥḥas-nni ay d-yellan deg Minen (sdat Mekka) 15 n wussan aya, ɣef wakken ay d-nnant 28 n tmura, yerna aya yugar s waṭas leḥsab-nni unṣib n 769 n yimettanen ay d-tenna Tgelda Tasaɛudit.

Riyaḍ werɛad ur d-tefki ara leḥsab n wid yemmuten seg yal tamurt deg twaɣit-a ay d-yellan ass n 24 Ctembeṛ.

D acu kan, ɣef leḥsab n yiwen n ujemmal ay d-tefka AFP seg leḥsabat ay d-telqeḍ seg 28 n tmura, amḍan (leɛdad) wid yemmuten yewweḍ ɣer 1.221 n yimdanen ass n lexmis.

Timura ay yesṛuḥen aṭas akk n medden d Iṛan s 464 n yimettanen, Maṣer s 148 n yimettanen, Indunisya s 120 n yimettanen, Pakistan s 76 n yimettanen, Nijirya s 64 n yimettanen, Mali s 60 n yimettanen, Sinigal s 54 n yimettanen d Lhend s 51 n yimettanen.

Seg yidis niḍen, d tiwinas (lmi’at) n yimḥuǧǧen ay d-mazal ɛerqen deffir umdeḥḥas-a ay d-yellan deg teswiɛt-nni n uṛjam n Uciṭan deg Minen, ɣef leḥsab n yinabaḍen (lḥukumat) d tseqquma tiɣelnawin n lḥiǧ.