Asebter amenzawi

Amaraṭun agraɣlan wis 6 n Imedɣasen (Tabatent): d Cheikh Naoui ay irebḥen

TABATENT – D anaddal n Lezzayer Tamaneɣt, Cheikh Naoui, ay irebḥen ass n ssebt amaraṭun agraɣlan wis 6 n Imedɣasen (Tabatent) ay d-yellan gar usuddis (muṛakkab) anaddal n 1u n Nwembeṛ d uẓekka anumidi n Imedɣasen s teɣzef n 42,195 n yikilumitren. 1.201 n yimazzalen ay yettekkan deg umaraṭun-a seg 9 n tmura (gar-asent Lezzayer), d acu kan, Cheikh Naoui yezwar-iten s waṭas deg uḥric aneggaru n temsizzelt yerna yudef-d ɣer yizirig n wawwaḍ s wakud n 2s22 n tedqiqin d 34 n tsinin.

Amkan wis sin iṣaḥ-d anaddal Slimane Moulay (seg Lezzayer Tamaneɣt) ay irebḥen amaraṭun n Imedɣasen n 2013, ma d amkan wis kraḍ d win n Uqsenṭini Tayeb Fellali.

Cheikh Naoui, ula ma yumar (yefṛeḥ) s rrbeḥ-nnes, yesḥassef cwiṭ imi ay yeǧǧa s waṭas ixṣimen-nnes yerna ula d yiwen ur d-yuzzil ɣer yidis-nnes. « Slimane Moulay yella yeǧhed mliḥ, maca lliɣ ẓriɣ d akken ad t-rnuɣ deg tazzla s tɣawla », ɣef wakken ay d-yenna. Amaraṭun-a yebda-d deg usuddis anaddal n temdint n Tbatent. Inazzalen uzzlen deg yizenqan imeqranen n Tbatent deg yiwen n lḥal yelhan, sakkin bdan tazzla deg yibriden yekkan gar yigran n twilayt-a, yerna kkan sdat Udrar n Bouɛečwan (Lmeḍher) ayseg ay qelɛen yinaddalen niḍen ay yettekkan deg uzgen n umaraṭun-nni ay d-yellan daɣ ass-nni.