Asebter amenzawi

Burkina Fasu tessebded-d taseqqamut n uḥtac ɣef tuttya-nni taserdasit

wAGADUGU – Tettwassebded-d s wudem unṣib tseqqamut n uḥtac ass n letniyen deg Ouagadougou, i unadi deg temsalt n tuttya taserdasit n 16 Ctembeṛ deg Burkina Faso, yerna tesɛa tseqqamut-a 30 n wussan akken ad tfak aḥtac-nnes, ɣef wakken ay d-nnan yiduba (suluṭat) n tmurt-a.

Taseqqamut n uḥtac ɣef tuttya taserdasit yettwazeglen n 16 Ctembeṛ llan deg-s 8 n yimaslaḍen (aɛḍa’) ɣef wakken ay d-yenna uneɣlaf amenzu Isaac Zida deg yiwet n tfugla ay d-yellan i lmend n ussebded-nnes.

Ass n 16 Ctembeṛ, ẓedmen-d yiserdasen n tɣellist (laman) n uselway (iɛessasen iqburen n uselway yeɣlin Blaise Compaoré) ɣef leqṣer n tselwit deg teswiɛt-nni aydeg yella yettili-d useqqamu n yineɣlafen, yerna ḍḍfen akk ineɣlafen d imeṛhan. Sakkin, azekka-nni kan, nnan-d d akken gan tuttya taserdasit.

Taseqqamut-a yessebded-itt-id unabaḍ ass n 25 Ctembeṛ yerna ccɣel-nnes d tifin n wanwa ay igan tuttya-a taserdasit d wanwi ay yettekkan deg-s, ama seg yiserdasen neɣ seg yiɣarimen (madaniyyin).

Aselway n Tseqqamut-a d Simplice Poda, yerna ixeddem d abugaṭu amatu deg ccṛeɛ n truẓi. Poda yesɛa ayyur akken « ad d-yessers aṛabul-nnes ».