Asebter amenzawi

Tuzzya i Udrar n Lweḥc yewɛeṛ ugar n lebni n Ubrid n Ccerq-Lɣerb

QSENṬINA – Lebni n ubrid ad d-yennḍen i Udrar n Lweḥc deg Qsenṭina « yewɛeṛ ugar » n usenfar n lebni n ubrid amazzal n Ugmuḍ-Ataram, yerna d tikebbaniyin tiɣelnawin ay d-yelhan d lebni-a, ɣef wakken ay d-yenna ass n ttlata umaru amatu n uɣlif n yimuhal (acɣal) inagduden, Ali Hami.

Abrid n tunnḍa ɣef udrar-a ɣezzif 13 n yikilumitren yerna ur tessaweḍ ara tkebbanit tabeṛṛanit n COJAAL ad tefru ugur-a, ɣef wakken ay d-yenna umasay-a (lmes’ul) deg yijifeṛ n yiwet n terzi n ussefqd n usenfar ay iga ɣer yidis n uwali n Qsenṭina, Hocine Ouadah.

D acu kan, tagara n wayyur n Tubeṛ n 2015 d netta ay d akud ay d-yettwassefran i ufaki n lebni-a, ɣef wakken ay d-iwekked Mass Hami, ay d-yernan d akken ixeddimen n ussersi n yigalisen (lafitat) d tuẓut n ttjuṛ n ucebbeḥ yessefk ad d-bdun « war leɛḍil ».

Mi ara yettwaqbel usenfar deg wakud ay as-d-yettwaḥudden, meḥsub ass n 31 Tubeṛ 2015, asenfar-a « ad yettunefk i yiduba n twilayt n Qsenṭina ad yefken lameṛ akken ad yebdu ad yettwaɣellat imir-nni kan, deffir ma ttwakksen akk yiɛewwiqen ay izemren ad ilin. » Lemmer ad d-yaweḍ wass-nni yerna werɛad ur ifuk ara ccɣel, asenfar-a « ad tenqes lfayda-nnes », ɣef wakken ay d-yenna umaru amatu n uɣlif n yimuhal inagduden i tkebbaniyin ay d-yelhan d lebni.

Deg wayen yerzan iɛeḍḍilen ay d-yellan deg wayyuren yezrin, tikebbaniyin n lebni nnant-d d akken ugur ay d-igan aya netta d aɛeḍḍel deg uxelleṣ n uxeddim, imi s yidrimen-nni n lexlaṣ ay zemrent ad d-aɣent tinegwa (mawadd) n lebni yerna ad ḍemnent akemmel n uxeddim.