Asebter amenzawi
Falesṭin ad teccetki i Ccṛeɛ Agraɣlan ɣef « tejrimin n ṭṭrad » n Yisṛayiliyen
RAMALLAH – Yenna-d yiwen n umasay (mes’ul) unnig afalesṭini ass n ttlata d akken Falesṭin ad teccetki i Ccṛeɛ n Uɛaqeb Agraɣlan ɣef tmenɣiwin ay nɣan yiɣallen n tuḍḍfa isṛayiliyen Ifalesṭiniyen, d timenɣiwin ay tettwali Falesṭin d « tijrimin n ṭṭrad aydeg ttekkan yimharsen (mustawṭinin) d yiɣallen n tɣellist ».
« Neɣtes (nqerrer) ad d-neg akaram akken ad neccetki war leɛḍil i Ccṛeɛ n Uɛaqeb Agraɣlan ɣef tmenɣiwin-a yeffɣen i ccṛeɛ » ay d-yellan mgal Yifalesṭiniyen, ɣef wakken ay d-yenna Saeb Erakat, imḍebber ameqran wis sin n Tuddsa n Uslelli n Falesṭin.
« Ccṛeɛ n Uɛaqeb Agraɣlan ur yettcaṛaɛ ara iwanaken (ddulat), wanag yettcaṛaɛ imdanen, yerna d aneɣlaf amenzu n Isṛayil, Benjamin Netanyahu, ay nettwali d amednub ɣer yidis n uneɣlaf-nnes n temḥaddit Moshe Yaalon d yiɣallen isṛayiliyen n tɣellist », ɣef wakken ay d-yenna Mass Erakat deg yiwen n usarag n tɣemsa deg Ramallah anda ay d-yusa uxxam n Udabu Afalesṭini deg Ugemmaḍ Utrim.
Dɣa, deg temsalt-a, yebder-d yimḍebber-a afalesṭini liḥalat-nni yeggten n Yifalesṭiniyen ay yettwenɣan deg lbaṭel s rrṣaṣ n yiɣallen isṛayiliyen.
« Nger-d tiɣri i umesṛabul uzzig n yizerfan n umdan n Yiɣlanen Yeddukklen, akken ad d-yas ad yeḥtec war leɛḍil. Nessutur aḥuddu agraɣlan seg Yiɣlanen Yeddukklen aḥuddu agraɣlan i uɣref-nneɣ war leɛḍil », ɣef wakken ay d-yenna, am wakken ay d-yerna d akken ayen ay d-yeḍren d « tijrimin n ṭṭrad ay gan yimharsen d yiɣallen n tɣellist (l’amn) ».
Atɛeddi n Yisṛayiliyen ɣef Yifalesṭiniyen yegla s wugar n 20 n tmeddurin tifalesṭiniyin seg tezwara n Tubeṛ. Nnig waya, iɣallen isṛayliyen n tuḍḍfa jerḥen ugar n 150 n Yifalesṭiniyen am wakken ay ḍḍfen tiwinas (mi’at) niḍen.
