Asebter amenzawi

Tamesgida Tameqrant n Lezzayer ad teḥrez tamussni d ddin n Yidzayriyen

LEZZAYER TAMANEɣT – Tamesgida Tameqrant n Lezzayer « maci ala d acebbeḥ ad tcebbeḥ tamaneɣt neɣ yiri n lebḥeṛ, maca ad teḥrez ula d tameddurt taggagant (fikriyya) d ddin n Yidzayriyen », ɣef wakken ay d-yenna ass n laṛebɛa deg Lezzayer Tamaneɣt uneɣlaf n tɣawsiwin n ddin d lḥubus, Mohamed Aissa.

Yenna-d uneɣlaf aya mi t-id-ttren ɣef ukemmel n lebni n tmesgida-a ula ma teɣli ssuma n upitṛul.

« Ur nebɣi ara ad nesɛu sin n yiswiren n tinneslemt, wala Lislam unṣib d Lislamn tenmegla (muɛaraḍa) d uzbu (muqawama), dɣa ɣef waya ay neḥwaj tamesgida-a tameqrant ad yilin d azamul », ɣef wakken ay d-yenna uneɣlaf deg unmager n uɣmis n Liberte.

ɣef leḥsab n Mass Aissa, lbenyan-a ad yili amzun « d 'limam n tmesgidiwin niḍen’. Ad yili deg-s useqqamu n lfetwa, aseqqamu aɣelnaw n uwelleh d useqqamu aɣelnaw n usselmed n Leqran, ammas adelsan ad yilin d tawelha deg Lezzayer, tamkarḍit n ddin ad yilin d tawelha deg Lezzayer, d tesdawit n Leqran ad d-yessuffuɣen limamat (imaynuten) », am wakken ay d-iwekked d akken yessefk ad tesɛu tmurt tawelha tunnigt ad iwellhen tisuda niḍen deg temsal n ddin.

Dɣa, deg temsalt-a, yenna-d Mass Aissa d akken tamurt teḥwaj aɣerbaz i yimassanen (ɛulama) n ddin « ay iɛewwlen ad xedmen, ḥemmlen tamurt-nsen yerna sɛan assileɣ (takwin) yelhan deg usseddu n temsal n ddin, akken ad gen Yidzayriyen laman deg udabu-nsen asɣanan (sulṭa diniyya). »