ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵙⴻⵍⵍⴰⵍ ⴷⴻⴳ ⵜⴱⴻⵙⴽⴻⵔⵜ: ⵜⴻⵙⵙⴻⴼⴽ ⵜⴷⴰⵎⵙⴰ ⴰⴷ ⴷ-ⵢⴻⴼⴽⴻⵏ ⵍⴼⴰⵢⴷⴰ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⵉⵔⵣⵉ ⵏ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⴰⵙⵙ ⵏ ⵍⴰⵕⴻⴱⵄⴰ ⵖⴻⴼ ⵜⴱⴻⵙⴽⴻⵔⵜ ⵜⴻⵍⵍⴰ-ⴷ ⴷ ⵜⴰⴳⵏⵉⵜ ⵉ ⵓⵙⵙⵉⵡⴻⴹ ⵏ ⵍⴻⵡⵚⴰⵢⴰ ⵉⴱⴰⵏⴻⵏ ⴷ ⵓⵡⴻⴽⴽⴻⴷ ⵏ ⵍⴻⴱⵖⵉ ⵏ ⵓⵡⴰⵏⴰⴽ (ⴷⴷⵓⵍⴰ) ⵉ ⵍⴻⴱⵏⵉ ⵏ ⵜⴷⴰⵎⵙⴰ ⴰⵢⴷⴻⴳ ⵜⴻⵍⵍⴰ ⵍⴼⴰⵢⴷⴰ ⵢⴻⵔⵏⴰ ⴷ ⵜⵉⵏ ⴰⵢⴷⴻⴳ ⴰⴷ ⵜⵜⴻⴽⴽⵉⵏⵜ ⴰⵎⴰ ⴷ ⵜⵉⴽⴻⴱⴱⴰⵏⵉⵢⵉⵏ ⵏ ⵓⵡⴰⵏⴰⴽ, ⴰⵎⴰ ⴷ ⵜⵉⴽⴻⴱⴱⴰⵏⵉⵢⵉⵏ ⵜⵓⵙⵍⵉⴳⵉⵏ, ⵢⴻⵔⵏⴰ ⴷ ⵜⴰⴷⴰⵎⵙⴰ ⴰⴷ ⵢⴻⵜⵜⵉⵅⵔⴻⵏ ⵉ ⵓⵒⵉⵜⵕⵓⵍ ⴷⴻⴳ ⵜⴻⴳⵏⵉⵜ-ⴰ ⴰⵢⴷⴻⴳ ⵜⴻⵏⵇⴻⵙ ⵙⵙⵓⵎⴰ-ⵏⵏⴻⵙ.
ⵎⴰⵙⵙ ⵙⴻⵍⵍⴰⵍ ⵢⴻⵏⵏⴰ-ⴷ ⴰⵢⴰ ⴷⴻⴳ ⵜⴻⵎⵍⵉⵍⵉⵜ ⵜⵉⵙ 18 ⴰⵢ ⴷ-ⵢⴻⵍⵍⴰⵏ ⴳⴰⵔ ⵓⵏⴰⴱⴰⴹ, ⵉⵏⵎⵓⵍⴰ (ⵏⵏⴰⵇⴰⴱⴰⵜ) ⴷ ⵢⵉⵎⴹⴻⴱⴱⵔⴻⵏ ⵏ ⵜⴽⴻⴱⴱⴰⵏⵉⵢⵉⵏ, ⴷ ⵜⵉⵎⵍⵉⵍⵉⵜ ⴰⵢⴷⴻⴳ ⴷ ⵏⴻⵜⵜⴰ ⴰⵢ ⴷ ⴰⵙⴻⵍⵡⴰⵢ, ⵢⴻⵔⵏⴰ ⵉⵃⴻⵜⵜⴻⵜ-ⴷ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵃⴰⵕⴻⴱ ⵏ ⵜⵊⵓⵄⴰⵍ ⴷ ⵜⵓⴽⴻⵔⴹⴰ ⵏ ⵢⵉⴷⵔⵉⵎⴻⵏ ⴷ ⵜⵜⴰⵡⵉⵍⴰⵜ ⵏ ⵜⴽⴻⴱⴱⴰⵏⵉⵢⵉⵏ, ⵍⴰⴷⵖⴰ ⵉⵎⵉ ⴰⵢⴰ ⵉⴳⴻⵍⵍⵓ-ⴷ ⵙ ⵢⵉⵅⴻⵚⵚⴰⵔⴻⵏ ⴷ ⵉⵎⴻⵇⵔⴰⵏⴻⵏ ⵖⴻⴼ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.
ⵉⵡⴻⴽⴽⴻⴷ-ⴷ ⵎⴰⵙⵙ ⵙⴻⵍⵍⴰⵍ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⴰⴷ ⴷ-ⵜⴻⵔⴱⴻⵃ ⴰⵟⴰⵙ ⵙⴻⴳ ⵓⵜⵜⵉⵅⴻⵔ ⵉ ⵓⵒⵉⵜⵕⵓⵍ ⵢⴻⵔⵏⴰ ⵜⴻⵙⵄⴰ ⴰⵢⴻⵏ ⴰⵢⵢⴻⵙ ⴰⴷ ⵜⴱⴻⴷⴷⴻⵍ ⵜⴰⴷⴰⵎⵙⴰ-ⵏⵏⴻⵙ ⵢⴻⵔⵏⴰ ⴰⴷ ⴷ-ⵜⴻⵔⴱⴻⵃ ⵉⴷⵔⵉⵎⴻⵏ ⴰⵎ ⵡⴰⴽⴽⴻⵏ ⴰⴷ ⵜⴻⴼⴽ ⴰⵅⴻⴷⴷⵉⵎ ⵉ ⵎⴻⴷⴷⴻⵏ, ⵢⴻⵔⵏⴰ ⵉⴳⴻⵔ-ⴷ ⵜⵉⵖⵔⵉ ⵉ ⵡⵉⴷ ⴰⵢ ⵢⴻⵜⵜⴳⴻⵏ ⵜⴰⵏⴻⵣⵣⵓⵜ (ⵜⵜⵉⴵⴰⵕⴰ) ⵡⴰⵔ ⵍⴻⴽⵡⴰⵖⴻⴹ ⴰⴽⴽⴻⵏ ⴰⴷ ⵙⵙⴻⵔⵙⴻⵏ ⵉⴷⵔⵉⵎⴻⵏ-ⵏⵙⴻⵏ ⴷⴻⴳ ⵜⴱⴰⵏⴽⵉⵡⵉⵏ, « ⴰⴷ ⴳⴻⵏ ⵍⴰⵎⴰⵏ » ⴷⴻⴳ ⵜⴱⴰⵏⴽⵉⵡⵉⵏ ⵢⴻⵔⵏⴰ ⴰⴷ ⵙⵏⴻⴽⴷⴻⵏ (ⴰⴷ ⵙⵙⵓⵔⵉⵏ) ⵉⵅⴻⴷⴷⴰⵎⴻⵏ-ⵏⵙⴻⵏ.
ⴰⵏⴰⴱⴰⴹ (ⵍⵃⵓⴽⵓⵎⴰ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⵢⴻⵙⵙⴽⴻⵏ-ⴷ ⵉ ⵢⵉⵛⵔⵉⴽⴻⵏ ⴷ ⵡⵉⴷ ⵡⵓⴽⵓⴷ ⵢⴻⵜⵜⴻⵎⵛⴰⵡⴰⵕ ⴰⴽⴽ ⵜⵜⴼⴰⵚⵉⵍ ⵢⴻⵔⵣⴰⵏ ⵜⴰⴷⴰⵎⵙⴰ ⴷ ⵜⴻⴷⵔⵉⵎⵜ ⵏ ⵜⵎⵓⵔⵜ, ⴷ ⵡⴰⴽⴽ ⵜⵜⴼⴰⵚⵉⵍ ⵢⴻⵔⵣⴰⵏ ⴰⵎⴻⴽ ⴰⵢ ⵍⴰ ⵢⴻⵙⵙⴻⴼⵔⴰⵢ ⴰⴷ ⵢⴻⵎⵎⴰⴳⴻⵔ ⵜⴰⴳⵏⵉ-ⴰ ⴰⵢⴷⴻⴳ ⵜⴻⵏⵇⴻⵙ ⵙⵙⵓⵎⴰ ⵏ ⵓⵒⵉⵜⵕⵓⵍ ⴷⴻⴳ ⵙⵙⵓⵇ ⴰⴳⵔⴰⵖⵍⴰⵏ.
ⵉⵙⵡⵉ ⵏ ⵡⴰⵢⴰ ⵏⴻⵜⵜⴰ ⴷ « ⴰⵙⵙⴻⵡⵊⴻⴷ ⵏ ⵢⵉⵖⴰⵍⵍⴻⵏ ⵏ ⵓⵅⴻⴷⴷⵉⵎ ⵏ ⵜⵎⵓⵔⵜ ⴰⴽⴽⴻⵏ ⴰⴷ ⵎⵎⴰⴳⵔⴻⵏ ⵓⴳⵓⵔⴻⵏ ⴰⵢ ⴰⵖ-ⵢⴻⴳⴳⵓⵏⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ ⴷ ⴰⴽⴽⴻⵏ ⴰⵔⴽⴰⵡⴰⵍ (ⵉⵜⵜⵉⴼⴰⵇ) ⴰⵖⴻⵍⵏⴰⵡ ⴰⴷⴰⵎⵙⴰⵏ ⴷ ⵓⵏⵎⴻⵜⵜⵉ ⵢⴻⵔⵙ ⴷⴻⴳ-ⵙ ⵓⵎⵙⴻⴼⵀⴰⵎ ⴳⴰⵔ ⵢⵉⵎⴹⴻⴱⴱⵔⴻⵏ ⵏ ⵜⴽⴻⴱⴱⴰⵏⵉⵢⵉⵏ, ⵉⵏⵎⵓⵍⴰ ⴷ ⵓⵏⴰⴱⴰⴹ ⵉ ⵍⵎⴻⵏⴷ ⵏ ⵍⴻⴱⵏⵉ ⵏ ⵜⴷⴰⵎⵙⴰ ⴰⵢ ⵍⴰ ⵢⴻⵜⵜⵏⴻⵔⵏⵉⵏ, ⵢⴻⵔⵏⴰ ⴰⵢⴰ ⴷ ⵢⵉⵡⴻⵜ ⵙⴻⴳ ⵜⴳⴻⵊⴷⴰ ⵜⵉⵍⴻⵎⵎⴰⵙⵉⵏ ⵏ ⵡⴰⵀⵉⵍ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ.
