ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⵛⵉⵔⵜ ⵏ ⵓⴹⴰⵔ ⵓⵔ ⵜⴻⵙⵙⵓⵜⵓⵔ ⴰⵔⴰ ⵍⴻⵎⵄⴰⵡⵏⴰ ⵏ ⴷⴷⵓⵍⴰ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ - ⵜⴻⴼⵔⴰ-ⵜⵜ-ⵉⴷ ⵜⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⵛⵉⵔⵜ ⵏ ⵓⴹⴰⵔ ⴰⴽⴽⴻⵏ ⴰⴷ ⵜⴻⵃⴱⴻⵙ ⴰⵙⵙⵓⵜⴻⵔ ⵏ ⵍⴻⵎⵄⴰⵡⵏⴰ ⴰⵢ ⴰⵙ-ⴷ-ⵢⴻⵜⵜⴰⴽⴼ ⵓⵡⴰⵏⴰⴽ (ⴷⴷⵓⵍⴰ) ⵢⴰⵍ ⴰⵙⴻⴳⴳⴰⵙ ⵉⵎⵉ ⴰⵢ ⵜⴻⵙⵙⴰⵡⴻⴹ « ⴰⴷ ⴷ-ⵜⴻⴽⴼⵓ ⵉⵎⴰⵏ-ⵏⵏⴻⵙ ⵙⴻⴳ ⵢⵉⴷⵉⵙ ⵏ ⵢⵉⴷⵔⵉⵎⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵍⴱⴰⵢⴰⵏ ⵏ ⵜⴼⵉⴷⵉⵕⴰⵍⵉⵜ-ⴰ ⴷⴻⴳ ⵜⴳⴰⵔⴰ ⵏ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⴰⵙⵙ ⵏ ⵍⴰⵕⴻⴱⵄⴰ.
« ⵉⵎⵉ ⴰⵢ ⴷ-ⵜⴻⴽⴼⴰ ⵉⵎⴰⵏ-ⵏⵏⴻⵙ ⵙⴻⴳ ⵢⵉⴷⵉⵙ ⴰⴷⵔⵉⵎⴰⵏ, ⵜⴻⵖⵜⴻⵙ (ⵉⵇⴻⵔⵔⴻⵔ) ⵜⵏⴰⵔⵉⵜ ⵜⴰⴼⵉⴷⵉⵕⴰⵍⵉⵜ ⴰⴷ ⵜⴻⵃⴱⴻⵙ ⴰⵙⵙⵓⵜⴻⵔ ⵏ ⵍⴻⵎⵄⴰⵡⵏⴰ ⵏ ⵓⵡⴰⵏⴰⴽ. ⵜⴰⵏⴰⵔⵉⵜ ⵜⴻⵜⵜⴰⵔⵔⴰ ⵜⴰⵊⵎⵉⵍⵜ ⴷ ⵜⴰⵎⴻⵇⵔⴰⵏⵜ ⵉ ⵢⵉⴷⵓⴱⴰ ⵉⵏⴰⴳⴷⵓⴷⴻⵏ ⵖⴻⴼ ⵓⵄⴰⵡⴻⵏ-ⵏⵙⴻⵏ ⵉ ⵓⵙⵏⴻⵔⵏⵉ ⵏ ⵜⵛⵉⵔⵜ ⵏ ⵓⴹⴰⵔ ⵜⴰⵖⴻⵍⵏⴰⵡⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵍⴱⴰⵢⴰⵏ-ⵏⵏⵉ ⴰⵢ ⴷ-ⵢⴻⴼⴼⵖⴻⵏ ⴷⴻⴳ ⵓⵙⵎⴻⵍ ⵓⵏⵚⵉⴱ ⵏ ⵉⵏⵜⴻⵔⵏⴻⵜ ⵏ ⵜⴼⵉⴷⵉⵕⴰⵍⵉⵜ.
ⵜⴰⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⵛⵉⵔⵜ ⵏ ⵓⴹⴰⵔ ⵜⴻⵍⵍⴰ ⵜⴻⵙⴼⴰⵢⴷⴰⵢ-ⴷ ⵙⴻⴳ ⵍⴻⵎⵄⴰⵡⵏⴰ ⵏ 300 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵉ ⵓⵙⴻⴳⴳⴰⵙ. ⴷⴻⴳ ⵓⴳⵔⴰⵡ ⴰⵎⴰⵜⵓ ⴰⵏⵓⵎⴰⵏ (ⵄⴰⴷⵉ) ⴰⵏⴻⴳⴳⴰⵔⵓ ⴰⵢ ⵜⴳⴰ ⵜⴼⵉⴷⵉⵕⴰⵍⵉⵜ ⴷⴻⴳ ⵎⴻⵖⵔⴻⵙ ⵏ 2015, ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⴼⵉⴷⵉⵕⴰⵍⵉⵜ, ⵎⵧⵀⴰⵎⴻⴷ ⵔⴰⵧⵓⵔⴰⵧⵓⴰ ⴷ ⴰⴽⴽⴻⵏ ⵍⴻⵎⵄⴰⵡⵏⴰ ⴰⵢ ⴷ-ⵢⴻⵜⵜⴰⴽⴼ ⵓⵡⴰⵏⴰⴽ ⵜⴻⵇⵇⵉⵎ ⵜⴼⵉⴷⵉⵕⴰⵍⵉⵜ ⵓⵔ ⵜⵜ-ⵜⴻⵙⵙⴻⵇⴷⴻⵛ ⴰⵔⴰ « 5 ⵏ ⵢⵉⵙⴻⴳⴳⴰⵙⴻⵏ ».
ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2015, ⵔⵏⴰⵏ ⵎⵍⵉⵃ ⵢⵉⴷⵔⵉⵎⴻⵏ ⴷⴻⴳ ⵍⴻⵣⵏⴰ ⵏ ⵜⴼⵉⴷⵉⵕⴰⵍⵉⵜ, ⵢⴻⵔⵏⴰ ⵉⴷⵔⵉⵎⴻⵏ-ⴰ « ⴽⴽⴰⵏ-ⴷ ⵙⴻⴳ ⵢⵉⴳⵓⵜⴰ (ⵄⵓⵇⵓⴷ) ⵏ ⵜⴽⴻⴱⴱⴰⵏⵉⵢⵉⵏ ⵏ ⵓⵙⵒⵓⵏⵙⵓⵕ ⴷ ⵢⵉⵣⴻⵔⴼⴰⵏ ⵏ ⵓⵙⵄⴻⴷⴷⵉ ⵏ ⵜⴻⵎⵍⵉⵍⵉⵢⵉⵏ ⴷⴻⴳ ⵜⵍⵉⵥⵔⵉ » ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵍⴱⴰⵢⴰⵏ-ⵏⵏⵉ ⴰⵢ ⴷ-ⵢⵓⴳⵎⴻⵏ ⵍⴻⵃⵙⴰⴱⴰⵜ ⵙⴻⴳ ⵢⵉⵡⴻⵏ ⵏ ⵓⵕⴰⴱⵓⵍ ⵏ ⵜⴻⴷⵔⵉⵎⵜ ⵏ ⵜⴼⵉⴷⵉⵕⴰⵍⵉⵜ.
ⴰⵕⴰⴱⵓⵍ-ⴰ ⵢⴻⴽⵛⴻⴼ-ⴷ ⴷ ⴰⴽⴽⴻⵏ ⵉⴷⵔⵉⵎⴻⵏ ⴰⵢ ⵜⴻⵙⵄⴰ ⵜⴼⵉⴷⵉⵕⴰⵍⵉⵜ ⴷⴻⴳ ⵜⵄⴻⵣⵣⵓⵍⵜ-ⵏⵏⴻⵙ ⴷⴻⴳ 30 ⵛⵜⴻⵎⴱⴻⵕ ⵏ 2015 « ⵙⵙⴽⴰⵏⴰⵢⴻⵏ-ⴷ ⵜⴰⴳⵏⵉⵜ ⵜⴰⴷⵔⵉⵎⴰⵏⵜ ⵉⴳⴻⵔⵔⵣⴻⵏ » ⴰⵢⴷⴻⴳ ⵜⴻⵍⵍⴰ ⴷ ⵓⵇⴰⴷⴻⵔ ⵏ ⵢⵉⵙⵡⴰⵏ ⵡⵓⵖⵓⵔ ⵜⴻⵙⵙⴻⴼⵔⴰ ⴰⴷ ⵜⴰⵡⴻⴹ ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⴱⴷⴰ ⵓⵙⴻⴳⴳⴰⵙ-ⴰ.
