Asebter amenzawi

Talɣuɣa taɣelnawt n ubyaṛ: rebḥen Okbani (imeqranen) d Djeraf (ilemẓiyen)

TABATENT – D imariren n ubyaṛ Nadim Okbani (Wehṛan – imeqranen) d Aymen Djeraf (Barika, ilemẓiyen) ay irebḥen ass n ssebt talɣuqa taɣelnawt tamezwarut n ubyaṛ deg tneggarut ay d-yellan deg tzeqqa takkaddalt n wammas n tedhut n uɣaram (ḥayy) n Kechida, deg Tbatent.

Nadim Okbani yerna s lḥif d ameqran Yahiaoui Ammar n CSA Barika (Tabatent) s ugmuḍ n 6 ɣer 5 deg yiwet n temlilit n wazal n 3 n tsaɛtin d uzgen.

Ɣer yilemẓiyen, deg taggayt (fi’a) n 21 n yiseggasen, d Aymen Djeraf d Islam Triki n CSA Barika ay yernan akk ixṣimen-nsen, yerna zgan-d deg sin n yimukan imezwura n taggayt-nsen.

Tessuddes Tfidiṛalit Taɣelnawt n Ṛṛafl n ubyaṛ talɣuɣa-a i lmend n usfugel n umulli wis 54 n tmesbaniyin n 17 Tubeṛ 1961 s umɛawen d temɣunt (rabiṭa) n ubyaṛ n Tbatent, d tmehla n twilayt n yilemẓiyen d waddal.

Abyaṛ « yesɛa tisellat (sumɛa) yelhan d umezruy s wazal-nnes deg temdint n Barika », ɣef wakken ay d-nnan yimḍebbren n temehla n yilemẓiyen d waddal n Tbatent, yerna taɣlamt (fariq) n temdint-a d nettat ay d talɣuɣt n Ldzayer deg 2013, am wakken ay d-tewwi taqbuct n Ldzayer deg 2014.

Aselway n Tfidiṛalit Tadzayrit n Ṛṛafl d Ubyaṛ, Mohamed-Lamine Maïdi, yefṛeḥ, ula d netta, s uswir n telɣuɣa-a aydeg ttwaqadren akk yilugan igraɣlanen ayɣef d-tweṣṣa Tfidiṛalit Tagraɣlant n Ubyaṛ, yerna aswir atekni « yettwaqbal mliḥ », s umata.