Asebter amenzawi

Yaman: bɣan yixṣimen ad d-uɣalen ɣer lemcawṛat

LEZZAYER TAMANEɣT – Ixṣimen yemgerraden n taluft n Yaman banen-d bɣan ad gen talwit gar-asen imi ay d-nnan dakken sɛan nneyya ad uɣalen ɣer lemcawṛat, ladɣa imi ay d-iban dakken ama d iɣallen n unabaḍ (ḥukuma), ama d Iḥutiyen, heyyan akken ad qeblen assumer (iqtiraḥ) n Yiɣlanen Yeddukklen i ussefɛel n tneɣtust (qarar) 2216.

Tenced-d Tuddsa n Yiɣlanen Yeddukklen, ass n ssebt, anabaḍ ayamani d yiɣewwaɣen (mutamarridin) izaydiyen iḥutiyen akken ad ttekkin deg tuzzya tis snat n lemcawṛat i lmend n ufaki n taluft tayamanit ay inekren 7 n wayyuren aya.

« Neḍḍef-d aneɛruḍ sɣur umaru amatu n Yiɣlanen Yeddukklen, Ban Ki-moon, yessaweḍ-aɣ-t-id umazun-nnes uzzig (mabɛut xaṣṣ) i Yaman, Ismail Ould Cheikh Ahmed, akken ad neg tuzzya tis snat n lemcawṛat d Yiḥutiyen d Ali Abdallah Saleh (aselway aqbur yerna d ameddakel n Yiḥutiyen) i lmend n ussefɛel n tneɣtust 2216 » n Useqqamu n Tɣellist n Yiɣlanen Yeddukklen, ɣef wakken ay d-yenna uneṭṭaq Rajeh Badi.

Taneɣtust 2216 tessefray ad jebden yiɣewwaɣen iman-nsen seg temnaḍin ay ḍḍfen. Ula ma werɛad ur d-yelli ara umsefham ɣef umkan d wakud aydeg ad d-ilint lemcawṛat-a, yenna-d unabaḍ ayamani dakken ad d-yerr « s ubrid unṣib » (ṛasmiyyan) i uneɛruḍ n Yiɣlanen Yeddukklen.

D acu kan, Iɣlanen Yeddukklen ssaramen ad yuɣal unabaḍ ayamani d yiɣewwaɣen iḥutiyen ɣer lemcawṛat n talwit uqbel tgara n Tubeṛ, ɣef wakken ay d-yenna umalal n umaru amatu n Tuddsa-a, Jan Eliasson.

Seg yidis niḍen, nnant-d temlicin tiḥutiyin d yimsisan-nsent (ḥulafa’) dakken qeblent assefɛel n tneɣtust 2216 n Yiɣlanen Yeddukklen uqbel ma bdant-d lemcawṛat n unabaḍ, dɣa d aya ay d-yesskanayen lebɣi n tiddit ɣer sdat i ufaki n yimenɣi-a.