ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵙⴻⵇⵇⴰⵎⵓⵜ ⵜⵉⵙ 4 ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵜⵅⴻⴷⴷⴻⵎ ⵉ ⵜⵓⴽⴽⵙⴰ ⵏ ⵓⵙⵜⴻⵄⵎⴻⵕ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴰⵙⴻⵇⵇⴰⵎⵓⵜ ⵜⵉⵙ 4 ⴷ ⵢⵉⵡⴻⵜ ⵙⴻⴳ ⵜⵙⴻⵇⵇⵓⵎⴰ ⵜⵉⵎⴻⵇⵔⴰⵏⵉⵏ ⴰⴽⴽ ⵏ ⵓⴳⵔⴰⵡ ⴰⵎⴰⵜⵓ ⵏ ⵜⵓⴷⴷⵙⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵢⴻⵔⵏⴰ ⴰⴷ ⵜⴻⵙⴼⵓⴳⴻⵍ ⴰⵎⵓⵍⵍⵉ-ⵏⵏⴻⵙ ⵡⵉⵙ 70 ⴰⵙⵙ ⵏ ⵙⵙⴻⴱⵜ ⴰⵢ ⴷ-ⵢⴻⵜⵜⴻⴷⴷⵓⵏ. ⵓⴳⴰⵔ ⵏ 50 ⵏ ⵢⵉⵙⴻⴳⴳⴰⵙⴻⵏ ⴰⵢⴰ ⵙⴻⴳ ⵡⴰⵙⵎⵉ ⴰⵢ ⵜⵅⴻⴷⴷⴻⵎ ⵜⵙⴻⵇⵇⴰⵎⵓⵜ-ⴰ ⵖⴻⴼ ⵓⵄⴰⵡⴻⵏ ⵏ ⵢⵉⵖⴻⵔⴼⴰⵏ ⵏ ⵢⵉⴽⴰⵍⴻⵏ ⵓⵔ ⵢⴻⵙⵄⵉⵏ ⴰⵔⴰ ⵜⴰⴼⵓⵍⵎⴰⵏⵜ (ⵃⵓⴽⵎ ⴷⴰⵜⵉ) ⴰⴽⴽⴻⵏ ⴰⴷ ⴷ-ⴼⵔⵓⵏ ⴰⵣⴻⴽⴽⴰ-ⵏⵙⴻⵏ, ⵢⴻⵔⵏⴰ ⵉⵚⴻⵃⵔⴰⵡⵉⵢⴻⵏ ⴷ ⵢⵉⴼⴰⵍⴻⵙⵟⵉⵏⵉⵢⴻⵏ ⵙⴻⴳ ⴳⴰⵔ ⵢⵉⵖⴻⵔⴼⴰⵏ-ⴰ ⴰⵢ ⵎⴰⵣⴰⵍ ⴷⴷⵔⴻⵏ ⴷⴷⴰⵡ ⵓⵣⴰⴳⵍⵓ ⵏ ⵓⵙⵙⴻⵀⵔⴻⵙ (ⵉⵙⵜⵉⵄⵎⴰⵕ).

ⴷⴻⴳ ⴷⵓⵊⴻⵎⴱⴻⵕ ⵏ 1960, ⵎⵉ ⴷ-ⵜⴻⴼⴼⴻⵖ ⵜⵏⴻⵖⵜⵓⵙⵜ ⵜⵉⵙ 1514 ⵖⴻⴼ ⵜⵙⴻⵖⵔⵓⵜ ⵏ ⵜⵓⴽⵛⵉ ⵏ ⵓⵣⴰⵔⵓⴳ ⵉ ⵜⵎⵓⵔⴰ ⴷ ⵢⵉⵖⴻⵔⴼⴰⵏ ⵉⵀⴻⵔⵙⴰⵏⴻⵏ, ⵜⴰⵙⴻⵇⵇⴰⵎⵓⵜ ⵜⵉⵙ 4 ⵓⵎⵉ ⵙⴻⵎⵎⴰⵏ ⵙ ⵓⴱⵔⵉⴷ ⵓⵏⵚⵉⴱ ⵜⴰⵙⴻⵇⵇⴰⵎⵓⵜ ⵏ ⵜⵖⴰⵡⵙⵉⵡⵉⵏ ⵜⵉⵙⴻⵔⵜⵉⵢⴻⵏ ⵜⵓⵣⵣⵉⴳⵉⵏ ⴷ ⵜⵓⴽⴽⵙⴰ ⵏ ⵓⵙⵙⴻⵀⵔⴻⵙ, ⵜⴻⵙⵙⵓⴳⴳⴻⵜ ⵜⵉⵎⵍⵉⵍⵉⵢⵉⵏ ⵢⴻⵔⵏⴰ ⵜⴻⵙⵙⵓⴽⴽ-ⴷ ⵜⵉⵟ ⵖⴻⴼ ⵡⴰⵟⴰⵙ ⵏ ⵜⴻⵎⵙⴰⵍ ⵢⴻⵔⵣⴰⵏ ⵜⵓⴽⴽⵙⴰ ⵏ ⵓⵙⵙⴻⵀⵔⴻⵙ.

ⴷⴻⴼⴼⵉⵔ ⵎⴰ ⵢⴻⵡⵡⵉ ⵓⵎⵓⵔ ⴰⵎⴻⵇⵔⴰⵏ ⵙⴻⴳ ⵜⵀⴻⵔⵙⵉⵏ (ⵎⵓⵙⵜⴰⵄⵎⴰⵔⴰⵜ) ⴷ ⵢⵉⴽⴰⵍⴻⵏ ⴰⵣⴰⵔⵓⴳ (ⵉⵙⵜⵉⵇⵍⴰⵍ), ⵜⴻⵍⵀⴰ-ⴷ ⵜⵙⴻⵇⵇⴰⵎⵓⵜ ⵜⵉⵙ 4 ⴷⴻⴳ 1990 ⴷ ⵜⴻⵎⵙⴰⵍ « ⵜⵉⵙⴻⵔⵜⵉⵢⵉⵏ ⵜⵓⵣⵣⵉⴳⵉⵏ » ⴰⵢ ⵜⴻⵔⵣⴰ ⵜⵓⴽⴽⵙⴰ ⵏ ⵓⵣⴰⵔⵓⴳ, ⵜⵉⵎⵙⴰⵍ ⵏ ⵢⵉⵣⵔⴰⵣⵖⴻⵏ (ⵍⴰⴵⵉ’ⵉⵏ) ⵉⴼⴰⵍⴻⵙⵟⵉⵏⵉⵢⴻⵏ ⴷ ⵢⵉⵣⴻⵔⴼⴰⵏ ⵏ ⵓⵎⴷⴰⵏ, ⴰⵃⵔⴰⵣ ⵏ ⵜⴰⵍⵡⵉⵜ, ⵜⵓⴽⴽⵙⴰ ⵏ ⵍⵎⵉⵏⴰⵜ, ⵜⵉⵖⴰⵡⵙⵉⵡⵉⵏ ⵏ ⵜⴰⵍⵍⵓⵏⵜ (ⴼⴰⴹⴰ’), ⴰⵅⴻⴱⴱⴻⵔ, ⵜⴰⵕⴰⴷⵢⵓⵔⵎⵉⴷⵜ ⴷ ⵜⴻⵙⴷⴰⵡⵉⵜ ⵏ ⵜⴰⵍⵡⵉⵜ.

ⴰⵙⴽⴰⵙⵉ (ⵏⵉⵇⴰⵛ) ⴷⴻⴳ ⵜⵙⴻⵇⵇⴰⵎⵓⵜ ⵜⵉⵙ 4 ⵉⴱⴻⴷⴷⵓ-ⴷ ⴰⴽⴽⴻⵏ ⴽⴰⵏ ⴰⴷ ⵉⴼⴰⴽ ⵓⵙⴽⴰⵙⵉ ⴷⴻⴳ ⵓⴳⵔⴰⵡ ⴰⵎⴰⵜⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⵢⴻⵜⵜⴻⵎⵍⵉⵍⵉⵏ ⴷⴻⴳ ⵛⵜⴻⵎⴱⴻⵕ ⵏ ⵢⴰⵍ ⴰⵙⴻⴳⴳⴰⵙ.

ⵜⵉⵎⵓⵔⴰ ⵢⴻⵜⵜⴻⴽⴽⴰⵏ ⴷⴻⴳ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵜⵜⴻⴽⴽⴰⵏⵜ ⴷⴰⵖ ⴷⴻⴳ ⵜⵙⴻⵇⵇⴰⵎⵓⵜ-ⴰ, ⵜⵜⴻⴽⴽⴰⵢⴻⵏⵜ ⴷⴻⴳ ⵢⵉⵙⴽⴰⵙⵉⵢⴻⵏ-ⵏⵏⴻⵙ ⴷ ⵜⵉⵔⴰ ⵏ ⵜⵏⴻⵖⵜⵓⵙⵉⵏ (ⵇⴰⵔⴰⵔⴰⵜ) ⴰⴷ ⵢⴻⵜⵜⵡⴰⵣⵏⴻⵏ ⵉ ⵓⴳⵔⴰⵡ ⴰⵎⴰⵜⵓ ⴰⴽⴽⴻⵏ ⴰⴷ ⵜⴻⵏⵜ-ⵢⴻⵙⵄⴻⴷⴷⵉ.