ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⵍⵓⴼⵜ ⵏ ⵍⵉⴱⵢⴰ: « ⴰⴷ ⴽⴻⵎⵎⵍⴻⵏⵜ » ⵍⴻⵎⵛⴰⵡⵕⴰⵜ (ⵍⴻⵧⵏ)
ⵜⵓⵏⴻⵙ – ⵢⴻⵏⵏⴰ-ⴷ ⵓⵎⴰⵣⵓⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵍⵉⴱⵢⴰ, ⴱⴻⵔⵏⴰⵔⴷⵉⵏⵧ ⵍⴻⵧⵏ, ⴰⵙⵙ ⵏ ⵍⴰⵕⴻⴱⵄⴰ, ⴷⴰⴽⴽⴻⵏ ⵍⴻⵎⵛⴰⵡⵕⴰⵜ « ⴰⴷ ⴽⴻⵎⵎⵍⴻⵏⵜ » ⵓⵍⴰ ⵎⴰ ⴰⵟⴰⵙ ⵏ ⵢⵉⴷⵉⵙⴰⵏ ⵉⵍⵉⴱⵉⵢⴻⵏ ⵓⴳⵉⵏ ⴰⵖⴰⵡⴰⵙ (ⵎⵓⵅⴰⵟⵟⴰⵟ) ⵏ ⵜⴰⵍⵡⵉⵜ ⵏ ⵜⵓⴷⴷⵙⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⴰⴷ ⴷ-ⵉⵍⵉⵏⵜ ⵜⴻⵎⵍⵉⵍⵉⵢⵉⵏ ⵜⵉⵎⴰⵢⵏⵓⵜⵉⵏ ⵉ ⵍⵎⴻⵏⴷ ⵏ ⵡⴰⵢⴰ « ⴷⴻⴳ ⵡⵓⵙⵙⴰⵏ ⴰⵢ ⴷ-ⵢⴻⵜⵜⴻⴷⴷⵓⵏ ».
« ⴰⴽⴰⵍⴰ (ⵎⴰⵙⴰⵕ) (ⵏ ⵍⴻⵎⵛⴰⵕⴰⵜ) ⴰⴷ ⵉⴽⴻⵎⵎⴻⵍ. ⵜⵉⴼⵔⴰⵜ ⵜⴰⵙⴻⵔⵜⵉⵜ ⴷ ⵏⴻⵜⵜⴰⵜ ⴰⵢ ⴷ ⴰⴱⵔⵉⴷ ⴰⵡⵃⵉⴷ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵍⴻⵧⵏ ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴷⴻⴳ ⵓⵅⵅⴰⵎ ⵏ ⵜⵓⵖⴷⴰⴹⵜ (ⴱⵉⵄⵜⴰ) ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵜⵓⵏⴻⵙ.
« ⴰⵡⴰⵍ ⵍⴰ ⵢⴻⵜⵜⴽⴻⵎⵎⵉⵍ. ⵏⴻⵙⵙⴰⵔⴰⵎ ⴷⴰⴽⴽⴻⵏ ⵓⵔ ⵢⴻⵜⵜⵄⴻⴹⴹⵉⵍ ⴰⵔⴰ ⴰⴷ ⴷ-ⵢⵉⵍⵉ ⵓⵏⴰⴱⴰⴹ ⴰⵢ ⴷ-ⵢⴻⵜⵜⵡⴰⵙⵙⵓⵎⵔⴻⵏ ⴷⴻⴳ ⵟⵔⴰⴱⵍⴻⵙ (…) ⴰⴽⴰⵍⴰ ⵎⴰⵣⴰⵍ-ⵉⵜ ⵢⴻⴷⴷⴻⵔ ⵢⴻⵔⵏⴰ ⴰⴷ ⴷ-ⵜⵉⵍⵉ ⵜⵉⴼⵔⴰⵜ ⵜⴰⵙⴻⵔⵜⵉⵜ ⵉ ⵍⵉⴱⵢⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. ⴷ ⴰⵛⵓ ⴽⴰⵏ, ⵓⵍⴰ ⵎⴰ ⵢⴻⵏⵏⴰ-ⴷ ⴷⴰⴽⴽⴻⵏ ⴰⴷ ⴷ-ⵉⵍⵉⵏⵜ ⵜⴻⵎⵍⵉⵍⵉⵢⵉⵏ ⴷⴻⴳ ⵡⵓⵙⵙⴰⵏ ⴰⵢ ⴷ-ⵢⴻⵜⵜⴻⴷⴷⵓⵏ, ⵓⵔ ⴷ-ⵢⴻⴼⴽⵉ ⴰⵔⴰ ⵓⴳⴰⵔ ⵏ ⵜⵜⴼⴰⵚⵉⵍ ⵖⴻⴼ ⵡⴰⵢⴰ.
ⵙⵉⵏ ⵏ ⵢⵉⴷⵓⴱⴰ ⵉⵙⴻⵔⵜⵉⵢⴻⵏ ⴰⵢ ⵍⴰ ⵢⴻⵜⵜⵏⴰⵖⴻⵏ ⵖⴻⴼ ⵍⴻⵃⴽⴻⵎ ⴷⴻⴳ ⵍⵉⴱⵢⴰ ⵙⴻⴳ ⵢⵉⵍⵉⵏⴷⵉ. ⵢⵉⵡⴻⵏ ⵏ ⵓⴷⴰⴱⵓ ⴰⵜⴰⵏ ⴷⴻⴳ ⵟⵔⴰⴱⵍⴻⵙ, ⵎⴰ ⴷ ⵡⴰⵢⴻⴹ, ⵡⵉⵏ ⴰⵢⵢⴻⵙ ⵢⴻⵙⵜⴻⵄⵕⴻⴼ ⵓⵎⵖⵉⵡⴰⵏ (ⵎⵓⴵⵜⴰⵎⴰⵄ) ⴰⴳⵔⴰⵖⵍⴰⵏ, ⴰⵜⴰⵏ ⴷⴻⴳ ⵟⵓⴱⵔⵓⵇ, ⴷⴻⴳ ⵓⴳⵎⵓⴹ (ⵛⵛⴻⵔⵇ) ⵏ ⵜⵎⵓⵔⵜ.
ⴰⵙⵙ ⵏ ⵍⴻⵜⵏⵉⵢⴻⵏ, ⴰⵎⵏⵉ (ⴱⴰⵕⵍⴰⵎⴰⵏ) ⵏ ⵟⵓⴱⵔⵓⵇ ⵢⵉⴳⵉ ⴰⵖⴰⵡⴰⵙ-ⵏⵏⵉ ⵏ ⵜⴰⵍⵡⵉⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⴷ-ⵢⴻⵙⵙⵓⵎⵔⴻⵏ (ⵉⵇⵜⴰⵔⴰⵃⴰ) ⴰⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ. ⴰⵎⵏⵉ ⵏ ⵟⵓⴱⵔⵓⵇ ⵢⴻⵏⵏⴰ-ⴷ ⴷⴰⴽⴽⴻⵏ ⴰⵖⴰⵡⴰⵙ-ⵏⵏⵉ « ⵓⵔ ⵢⴻⵜⵜⵇⴰⴷⴰⵔ ⴰⵔⴰ ⵍⵓⴼⴻⵇ ⴰⵢ ⵢⴻⵜⵜⵡⴰⵡⴻⵎⵎⵕⴻⵏ ⴷⴻⴳ ⵓⵙⴻⵏⴼⴰⵔ ⵡⵉⵙ 4 » ⵏ ⵓⵙⵙⵓⴼⴼⴻⵖ ⵏ ⵍⵉⴱⵢⴰ ⵙⴻⴳ ⵜⴰⵍⵓⴼⵜ.
ⵎⴰ ⴷ ⴰⵎⵏⵉ ⵏ ⵟⵔⴰⴱⵍⴻⵙ (ⴰⵙⵡⵉⵔ ⴰⵎⴰⵜⵓ ⴰⵖⴻⵍⵏⴰⵡ) ⵢⵓⴳⵉ ⵢⴰⴳⵉ ⴰⵖⴰⵡⴰⵙ-ⴰ ⵓⵇⴱⴻⵍ.