Asebter amenzawi

Aman: amsefham gar yidis adzayri d Gelssenwasser

LEZZAYER TAMANEɣT – Tadzayrit n Waman (ADE) d Udiwan Aɣelnaw n Ussizdeg (ONA) ssawḍen ad msefhamen ɣef umtawa (ittifaq) n tkebbanit talmanit n Gelssenwasser akken ad frun taluft ayɣef ur msefhamen ara deg wayen yerzan leɛqed n ussefrek d ussizdeg n waman deg Ɛennaba d Ṭṭaref.

Idisan adzayri d walmani stenyan, ass n lexmis deg Lezzayer Tamaneɣt, yiwen n uneggaf (pruṭukul) n umtawa aydeg « idisan-a ad faken amɛawen-nsen war ma yeɣrem ula d yiwen n yidis idrimen i wayeḍ », ɣef wakken ay d-yenna yimkellef n teɣwalt deg tkebbanit n Tdzayrit n Waman.

ɣef leḥsab n uneggaf-a n umtawa, takebbanit-nni talmanit ad tsemmeḥ deg ḍḍmana-nni n ufaki n uxeddim (amelyun n wuṛuten) d yidrimen ay tettalas deg lexlaṣ-nnes (4,5 n yimelyunen n wuṛuten) deg yixeddimen-nni d ssrabes ay tga.

Seg yidis-nnes, idis adzayri yessuter seg tkebbanit-nni talmanit ad as-d-teɣrem 4,5 n yimelyunen n yidulaṛen.

Ma d ḍḍmana-nni n ufaki n uxeddim, idis adzayri yenna-d d akken yefka-as-tt ccṛeɛ yerna ur d-yeggri ara wawal ɣef wanect-a.

« Deffir lemcawṛat d tiɣezfanin, yella-d umsefham akken Gelssenwasser ad tsemmeḥ ama deg ḍḍmana-nni, ama deg lexlaṣ-nnes. Seg yidis niḍen, idis adzayri ad isemmeḥ deg ussuter-nni n uɣram », ɣef wakken ay d-tenna Tdzayrit n Waman.