Asebter amenzawi

Yenqes waǧaw n tkeṛṛusin deg 9 n wayyuren imezwura n useggas-a

LEZZAYER TAMANEɣT – Aǧaw n tkeṛṛusin yesqam-d 2,76 n yimelyaṛen n yidulaṛen deg 9 n wayyuren imezwura n useggas n 2015, yili ilindi yesqam-d 4,03 n yimelyaṛen n yidulaṛen deg tallit-nni n 2014. S waya, yenqes waǧaw n tkeṛṛusin s 31,5%, ɣef wakken ay d-tenna tedwant i Tnegga n Yisalan n Lezzayer.

Amḍan (ɛadad) n tkeṛṛusin ay d-yettwaǧwen deg 9 n wayyuren imezwura n useggas-a yewweḍ ɣer 232.935, yili ilindi, 309.945 n tkeṛṛusin ay d-yettwaǧwen deg tallit-nni (-24,85%), ɣef wakken ay d-yenna Wammas Aɣelnaw n Taddadanin n Tedwant (CNIS).

Leḥsab n tedwant iḥuza-d azal n 50 n tkebbaniyin ay yesnuzuyen tikeṛṛusin d yikamyunen deg ssuq aɣelnaw, yerna yessken-d anqas amatu ladɣa deg waǧaw n tkeṛṛusin tuṛufiyin am tkeṛṛusin tifṛensisin d talmaniyin.

Anqas-a n waǧaw n tkeṛṛusin yebda-d deg 2014, yerna yella-d deffir ma yelha-d unabaḍ (lḥukuma) s uṣeggem n ssuq n tkeṛṛusin, ladɣa imi ssuq-a banen-d deg-s aṭas n leɛyub d tɣawsiwin yeffɣen i lqanun, ɣef wakken ay d-tekcef yiwet n tezrawt (diṛasa) n uɣlif n tnezzut.

Deg 2014, aǧaw n tkeṛṛusin yesqam-d 6,34 n yimelyaṛen n yidulaṛen, ma deg 2013, tuǧew-d Lezzayer 7,33 n yimelyaṛen n yidulaṛen n tkeṛṛusin. Azal n waǧaw yenqes-d s 13,56% deg 2014. Deg useggas n 2013, udfent-d 554.263 n tkeṛṛusin ɣer Lezzayer, ma deg 2014, udfent-d 439.637 n tkeṛṛusin, s waya, yenqes umḍan n tkeṛṛusin ay d-yettwaǧwen s 20,68% deg useggas-nni.