ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵏⵇⴻⵙ ⵡⴰⴵⴰⵡ ⵏ ⵜⴽⴻⵕⵕⵓⵙⵉⵏ ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⴵⴰⵡ ⵏ ⵜⴽⴻⵕⵕⵓⵙⵉⵏ ⵢⴻⵙⵇⴰⵎ-ⴷ 2,76 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ ⵏ 2015, ⵢⵉⵍⵉ ⵉⵍⵉⵏⴷⵉ ⵢⴻⵙⵇⴰⵎ-ⴷ 4,03 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ ⵜⴰⵍⵍⵉⵜ-ⵏⵏⵉ ⵏ 2014. ⵙ ⵡⴰⵢⴰ, ⵢⴻⵏⵇⴻⵙ ⵡⴰⴵⴰⵡ ⵏ ⵜⴽⴻⵕⵕⵓⵙⵉⵏ ⵙ 31,5%, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⴷⵡⴰⵏⵜ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⴰⵎⴹⴰⵏ (ⵄⴰⴷⴰⴷ) ⵏ ⵜⴽⴻⵕⵕⵓⵙⵉⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ ⵢⴻⵡⵡⴻⴹ ⵖⴻⵔ 232.935, ⵢⵉⵍⵉ ⵉⵍⵉⵏⴷⵉ, 309.945 ⵏ ⵜⴽⴻⵕⵕⵓⵙⵉⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⴷⴻⴳ ⵜⴰⵍⵍⵉⵜ-ⵏⵏⵉ (-24,85%), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵜⴰⴷⴷⴰⴷⴰⵏⵉⵏ ⵏ ⵜⴻⴷⵡⴰⵏⵜ (ⵛⵏⵉⵙ).

ⵍⴻⵃⵙⴰⴱ ⵏ ⵜⴻⴷⵡⴰⵏⵜ ⵉⵃⵓⵣⴰ-ⴷ ⴰⵣⴰⵍ ⵏ 50 ⵏ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⵙⵏⵓⵣⵓⵢⴻⵏ ⵜⵉⴽⴻⵕⵕⵓⵙⵉⵏ ⴷ ⵢⵉⴽⴰⵎⵢⵓⵏⴻⵏ ⴷⴻⴳ ⵙⵙⵓⵇ ⴰⵖⴻⵍⵏⴰⵡ, ⵢⴻⵔⵏⴰ ⵢⴻⵙⵙⴽⴻⵏ-ⴷ ⴰⵏⵇⴰⵙ ⴰⵎⴰⵜⵓ ⵍⴰⴷⵖⴰ ⴷⴻⴳ ⵡⴰⴵⴰⵡ ⵏ ⵜⴽⴻⵕⵕⵓⵙⵉⵏ ⵜⵓⵕⵓⴼⵉⵢⵉⵏ ⴰⵎ ⵜⴽⴻⵕⵕⵓⵙⵉⵏ ⵜⵉⴼⵕⴻⵏⵙⵉⵙⵉⵏ ⴷ ⵜⴰⵍⵎⴰⵏⵉⵢⵉⵏ.

ⴰⵏⵇⴰⵙ-ⴰ ⵏ ⵡⴰⴵⴰⵡ ⵏ ⵜⴽⴻⵕⵕⵓⵙⵉⵏ ⵢⴻⴱⴷⴰ-ⴷ ⴷⴻⴳ 2014, ⵢⴻⵔⵏⴰ ⵢⴻⵍⵍⴰ-ⴷ ⴷⴻⴼⴼⵉⵔ ⵎⴰ ⵢⴻⵍⵀⴰ-ⴷ ⵓⵏⴰⴱⴰⴹ (ⵍⵃⵓⴽⵓⵎⴰ) ⵙ ⵓⵚⴻⴳⴳⴻⵎ ⵏ ⵙⵙⵓⵇ ⵏ ⵜⴽⴻⵕⵕⵓⵙⵉⵏ, ⵍⴰⴷⵖⴰ ⵉⵎⵉ ⵙⵙⵓⵇ-ⴰ ⴱⴰⵏⴻⵏ-ⴷ ⴷⴻⴳ-ⵙ ⴰⵟⴰⵙ ⵏ ⵍⴻⵄⵢⵓⴱ ⴷ ⵜⵖⴰⵡⵙⵉⵡⵉⵏ ⵢⴻⴼⴼⵖⴻⵏ ⵉ ⵍⵇⴰⵏⵓⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⴽⵛⴻⴼ ⵢⵉⵡⴻⵜ ⵏ ⵜⴻⵣⵔⴰⵡⵜ (ⴷⵉⵕⴰⵙⴰ) ⵏ ⵓⵖⵍⵉⴼ ⵏ ⵜⵏⴻⵣⵣⵓⵜ.

ⴷⴻⴳ 2014, ⴰⴵⴰⵡ ⵏ ⵜⴽⴻⵕⵕⵓⵙⵉⵏ ⵢⴻⵙⵇⴰⵎ-ⴷ 6,34 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ, ⵎⴰ ⴷⴻⴳ 2013, ⵜⵓⴵⴻⵡ-ⴷ ⵍⴻⵣⵣⴰⵢⴻⵔ 7,33 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⵏ ⵜⴽⴻⵕⵕⵓⵙⵉⵏ. ⴰⵣⴰⵍ ⵏ ⵡⴰⴵⴰⵡ ⵢⴻⵏⵇⴻⵙ-ⴷ ⵙ 13,56% ⴷⴻⴳ 2014. ⴷⴻⴳ ⵓⵙⴻⴳⴳⴰⵙ ⵏ 2013, ⵓⴷⴼⴻⵏⵜ-ⴷ 554.263 ⵏ ⵜⴽⴻⵕⵕⵓⵙⵉⵏ ⵖⴻⵔ ⵍⴻⵣⵣⴰⵢⴻⵔ, ⵎⴰ ⴷⴻⴳ 2014, ⵓⴷⴼⴻⵏⵜ-ⴷ 439.637 ⵏ ⵜⴽⴻⵕⵕⵓⵙⵉⵏ, ⵙ ⵡⴰⵢⴰ, ⵢⴻⵏⵇⴻⵙ ⵓⵎⴹⴰⵏ ⵏ ⵜⴽⴻⵕⵕⵓⵙⵉⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵙ 20,68% ⴷⴻⴳ ⵓⵙⴻⴳⴳⴰⵙ-ⵏⵏⵉ.