ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴱⴻⵔⵔⴰⵀⴰⵍ ⵢⴻⵙⵙⴰⵡⴻⴹ ⵖⴻⵔ ⵓⴽⵍⵉⵙ ⵏ ⵓⵎⴰⴹⴰⵍ ⵎⴰⵛⴰ ⵓⵔ ⴷ-ⵢⴻⵡⵡⵉ ⴰⵔⴰ ⵛⵛⵉⵄⴰ

ⴷⴷⵓⵃⴰ – ⴰⵏⴰⴷⴷⴰⵍ ⴰⴷⵣⴰⵢⵔⵉ ⵎⵧⵀⴰⵎⴻⴷ ⴱⴻⵔⵔⴰⵀⴰⵍ ⵢⴻⵙⵙⴰⵡⴻⴹ ⵖⴻⵔ ⵓⴽⵍⵉⵙ (ⵔⴰⵇⵎ ⵇⵉⵢⴰⵙⵉ) ⵏ ⵓⵎⴰⴹⴰⵍ ⴷⴻⴳ ⵓⵣⴻⵍⵍⵉ ⵏ ⵓⴹⴻⴱⵙⵉ (ⴼ51/52), ⵎⴰⵛⴰ ⵓⵔ ⴷ-ⵢⴻⵡⵡⵉ ⴰⵔⴰ ⵜⴰⵣⴰⵍⵖⵉ (ⵎⵉⴷⴰⵍⵉⵢⵢⴰ) ⴰⵙⵙ ⵏ ⵍⵃⴻⴷⴷ ⴷⴻⴳ ⴷⴷⵓⵃⴰ, ⴷⴻⴳ ⵡⴰⵙⵙ ⵡⵉⵙ 4 ⵏ ⵜⴻⵍⵖⵓⵖⴰ ⵏ ⵓⵎⴰⴹⴰⵍ ⵏ ⵜⴰⵜⵍⵉⵜⵉⵜ ⵏ ⵢⵉⵎⴻⵄⴷⴰⵕ.

ⵎⵧⵀⴰⵎⴻⴷ ⴱⴻⵔⵔⴰⵀⴰⵍ (ⴼ51) ⵢⴻⵙⵙⴰⵡⴻⴹ ⴰⴷ ⵉⵣⴻⵍⵍⵉ ⴰⴹⴻⴱⵙⵉ ⵖⴻⵔ 13,17 ⵏ ⵍⵎⵉⵜⵔⴰⵜ ⴷⴻⴳ ⵓⵏⴻⵄⵔⵓⴹ-ⵏⵏⴻⵙ ⴰⵏⴻⴳⴳⴰⵔⵓ. ⴰⵎⵙⵉⵣⵡⴻⵔ-ⴰ ⵢⴻⵔⴱⴻⵃ-ⵉⵜ ⴰⵒⵉⵏⵉⵙ ⴰⵉⴳⴰⵔⵙ (ⵙⴻⴳ ⵍⵉⵜⵡⴰⵏⵢⴰ) ⵙⴻⴳ ⵜⵙⴻⵔⴽⴻⵎⵜ ⵏ ⴼ52, ⵙ ⵓⵣⴻⵍⵍⵉ ⵏ 21,41 ⵏ ⵍⵎⵉⵜⵔⴰⵜ. ⵎⴰ ⴷ ⵡⵉⴷ ⵙⵉⵏ ⴷⴻⴳ ⵓⵎⵙⵉⵣⵡⴻⵔ-ⴰ ⴷ ⴰⵒⵓⵍⵓⵏⵉ ⵔⵧⴱⴻⵔⵜ ⵊⴰⵛⵀⵉⵎⵧⵡⵉⵛⵣ (17,33 ⵏ ⵍⵎⵉⵜⵔⴰⵜ) ⵢⴻⵔⵏⴰ ⵢⴻⵡⵡⵉ ⵜⴰⵣⴰⵍⵖⵉ ⵏ ⵓⵥⵔⴻⴼ. ⵡⵉⵙ 3 ⴷ ⴰⴽⵕⵓⵡⴰⵜⵉ ⵙⴰⵏⴷⵧⵔ ⵠⴻⵍⵉⵎⵉⵔ ⴰⵢ ⵉⵔⴻⴱⵃⴻⵏ ⵜⴰⵣⴰⵍⵖⵉ ⵏ ⵓⴱⵕⵓⵏⵣ (16,95 ⵏ ⵍⵎⵉⵜⵔⴰⵜ).

« ⵜⵉⴷⴻⵜ ⴽⴰⵏ, ⴰⵢⴰ ⴷ ⵍⴱⴰⵟⴻⵍ ⵢⴻⵔⵏⴰ ⴷ ⵜⵉⵣⵣⴻⵍⴳⵉ ⵉⵎⵉ ⴰⵙⴻⵇⵇⴰⵎⵓ ⵓⵍⵉⵎⵒⵉ ⴰⴳⵔⴰⵖⵍⴰⵏ ⵏ ⵢⵉⵎⴻⵄⴷⴰⵕ) ⵉⴳⴰ ⴰⵢⴰ. ⵎⴰⵛⵉ ⴷ ⵕⵕⴰⵢ ⵍⴻⵎⵎⴻⵔ ⴰⵏⴰⴷⴷⴰⵍ ⴰⴷ ⵢⴻⵙⵙⵉⵡⴻⴹ ⵖⴻⵔ ⵓⴽⵍⵉⵙ ⵏ ⵓⵎⴰⴹⴰⵍ ⴷⴻⴳ ⵓⵎⵙⵉⵣⵡⴻⵔ ⴰⵎⴰⴹⵍⴰⵏ ⵢⴻⵔⵏⴰ ⵓⵔ ⴰⵙ-ⵜⵜⴰⴽⴼⴻⵏ ⴰⵔⴰ ⵜⴰⵣⴰⵍⵖⵉ ⵉⵎⵉ ⴰⵢ ⴷⴷⵓⴽⴽⵍⴻⵏⵜ ⵜⵙⴻⴽⵎⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⵍⴻⵖⵎⴰⵢ (ⵎⵓⴷⴰⵔⵔⵉⴱ) ⴰⵖⴻⵍⵏⴰⵡ ⵏ ⵢⵉⵏⴰⴷⴷⴰⵍⴻⵏ ⵉⵎⴻⵄⴷⴰⵕ, ⴰⴱⴷⴻⵍⵀⴰⴽ ⴽⴰⵙⵙⵧⵓⵔⵉ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ « ⴰⵢⴰ ⴷ ⵜⵜⴱⴻⵀⴷⵉⵍⴰ » ⵢⴻⵔⵏⴰ « ⵎⴻⴷⴷⴻⵏ ⴰⴽⴽ ⵢⴻⵍⵍⴰⵏ ⴷⴰ ⵙⵜⴻⵄⵕⴼⴻⵏ ⵙ ⵡⴰⵢⴰ ».

ⵎⴰ ⴷ ⴰⵏⴰⴷⴷⴰⵍ ⴱⴻⵔⵔⴰⵀⴰⵍ ⵢⴻⵏⵏⴰ-ⴷ ⴷ ⴰⴽⴽⴻⵏ ⵓⵔ ⴷ-ⵢⴻⵛⵍⵉⴳ ⴰⵔⴰ, ⵢⴻⵔⵏⴰ ⴰⵡⵉ-ⴷ ⴽⴰⵏ ⵉⵎⵉ ⴰⵢ ⵢⴻⵙⵙⴰⵡⴻⴹ ⵖⴻⵔ ⵢⵉⵙⵡⵉ ⴰⵢⵖⴻⴼ ⴰⵢ ⴷ-ⵢⵓⵙⴰ ⵖⴻⵔ ⴷⴷⵓⵃⴰ (ⵇⴰⵟⴰⵔ).

« ⵅⴻⴷⵎⴻⵖ ⴰⵟⴰⵙ ⴰⴽⴽⴻⵏ ⴰⴷ ⵙⵙⵉⵡⴹⴻⵖ ⵖⴻⵔ ⵓⴽⵍⵉⵙ ⵏ ⵓⵎⴰⴹⴰⵍ ⴷⴻⴳ ⵓⵣⴻⵍⵍⵉ ⵏ ⵓⴹⴻⴱⵙⵉ ⵢⴻⵔⵏⴰ ⵙⵙⴰⵡⴹⴻⵖ ⵖⴻⵔ ⵡⴰⵢⴰ. ⵉⵎⵉⵔ-ⴰ, ⵕⵕⴰⵢ ⵏ ⵜⵓⴽⵛⵉ ⵏ ⵜⵣⴰⵍⵖⵉ ⵢⴻⵇⵇⴻⵏ ⵖⴻⵔ ⵢⵉⵎⴰⵙⴰⵢⴻⵏ (ⵎⴻⵙ’ⵓⵍⵉⵏ) ⵏ ⵓⵙⴻⵇⵇⴰⵎⵓ ⵓⵍⵉⵎⵒⵉ ⴰⴳⵔⴰⵖⵍⴰⵏ ⵏ ⵢⵉⵎⴻⵄⴷⴰⵕ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴰⴷⴷⴰⵍ-ⴰ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⵎⵧⵀⴰⵎⴻⴷ ⴱⴻⵔⵔⴰⵀⴰⵍ ⵎⴰⵣⴰⵍ ⴰⴷ ⵢⴻⵔⵏⵓ ⴰⴷ ⵢⴻⵜⵜⴻⴽⴽⵉ ⴷⴻⴳ ⵙⵉⵏ ⵏ ⵢⵉⵎⵙⵉⵣⴻⵡⵔⴻⵏ ⵏⵉⴹⴻⵏ : ⵜⵉⵎⵙⵉⵣⵣⴻⵍⵜ ⵏ 100 ⵏ ⵍⵎⵉⵜⵔⴰⵜ (ⵉ ⵜⵙⴻⵔⴽⴻⵎⵜ ⴽⴰⵏ ⵏ ⴼ51) ⴰⵙⵙ ⵏ ⵜⵜⵍⴰⵜⴰ, ⴷ 400 ⵏ ⵍⵎⵉⵜⵔⵜ (ⴼ51) ⴰⵙⵙ ⵏ ⵙⵙⴻⴱⵜ.