Asebter amenzawi

Berrahal yessaweḍ ɣer uklis n umaḍal maca ur d-yewwi ara cciɛa

DDUḤA – Anaddal adzayri Mohamed Berrahal yessaweḍ ɣer uklis (raqm qiyasi) n umaḍal deg uzelli n uḍebsi (F51/52), maca ur d-yewwi ara tazalɣi (midaliyya) ass n lḥedd deg Dduḥa, deg wass wis 4 n Telɣuɣa n Umaḍal n Tatlitit n Yimeɛdaṛ.

Mohamed Berrahal (F51) yessaweḍ ad izelli aḍebsi ɣer 13,17 n lmitrat deg uneɛruḍ-nnes aneggaru. Amsizwer-a yerbeḥ-it Apinis Aigars (seg Litwanya) seg tserkemt n F52, s uzelli n 21,41 n lmitrat. Ma d wid sin deg umsizwer-a d Apuluni Robert Jachimowicz (17,33 n lmitrat) yerna yewwi tazalɣi n uẓref. Wis 3 d Akṛuwati Sandor Velimir ay irebḥen tazalɣi n ubṛunz (16,95 n lmitrat).

« Tidet kan, aya d lbaṭel yerna d tizzelgi imi Aseqqamu Ulimpi Agraɣlan n Yimeɛdaṛ) iga aya. Maci d ṛṛay lemmer anaddal ad yessiweḍ ɣer uklis n umaḍal deg umsizwer amaḍlan yerna ur as-ttakfen ara tazalɣi imi ay ddukklent tsekmin », ɣef wakken ay d-yenna usleɣmay (mudarrib) aɣelnaw n yinaddalen imeɛdaṛ, Abdelhak Kassouri, am wakken ay d-yerna d akken « aya d ttbehdila » yerna « medden akk yellan da steɛṛfen s waya ».

Ma d anaddal Berrahal yenna-d d akken ur d-yeclig ara, yerna awi-d kan imi ay yessaweḍ ɣer yiswi ayɣef ay d-yusa ɣer Dduḥa (Qaṭar).

« Xedmeɣ aṭas akken ad ssiwḍeɣ ɣer uklis n umaḍal deg uzelli n uḍebsi yerna ssawḍeɣ ɣer waya. Imir-a, ṛṛay n tukci n tzalɣi yeqqen ɣer yimasayen (mes’ulin) n Useqqamu Ulimpi Agraɣlan n Yimeɛdaṛ », ɣef wakken ay d-yenna unaddal-a i Tnegga n Yisalan n Lezzayer.

Mohamed Berrahal mazal ad yernu ad yettekki deg sin n yimsizewren niḍen : timsizzelt n 100 n lmitrat (i tserkemt kan n F51) ass n ttlata, d 400 n lmitrt (F51) ass n ssebt.