ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵍⵖⵓⵖⴰ ⵜⴰⵖⴻⵍⵏⴰⵡⵜ ⵜⴰⵙⴻⵔⴷⴰⵙⴰⵏⵜ ⵏ ⵢⵉⵛⴰⵀⴻⵏ: 22 ⵏ ⵜⴻⵖⵍⴰⵎⵉⵏ ⴷⴻⴳ ⵜⴻⵇⵍⵉⵄⵜ (ⵜⵉⵒⴰⵣⴰ)

ⵜⵉⵒⴰⵣⴰ – 22 ⵏ ⵜⴻⵖⵍⴰⵎⵉⵏ ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵜⴻⵍⵖⵓⵖⴰ ⵜⴰⵖⴻⵍⵏⴰⵡⵜ ⵜⴰⵙⴻⵔⴷⴰⵙⴰⵏⵜ ⵏ ⵢⵉⵛⴰⵀⴻⵏ (ⵛⵉⵟⵔⴰⵏⴵ) (ⵉⵔⴳⴰⵣⴻⵏ ⴷ ⵜⵍⴰⵡⵉⵏ) ⴰⵢ ⴷ-ⵢⴻⴱⴷⴰⵏ ⴰⵙⵙ ⵏ ⵍⵃⴻⴷⴷ ⴷⴻⴳ ⵓⵖⴻⵔⴱⴰⵣ ⵓⵏⵏⵉⴳ ⵏ ⵜⵙⵉⵡⴹⵉⵏ ⴰⴱⴷⴻⵍⵀⴰⴼⵉⴷ-ⴱⵧⵓⵙⵙⵧⵓⴼ ⵏ ⵜⴻⵇⵍⵉⵄⵜ (ⵜⵉⵒⴰⵣⴰ).

ⴰⴷ ⵜⵜⴻⴽⴽⵉⵏ ⴷⴻⴳ ⵜⴻⵍⵖⵓⵖⴰ-ⴰ ⵢⵉⵙⴻⵔⴷⴰⵙⵉⵢⴻⵏ ⵙⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵜⵉⵙⴻⵔⴷⴰⵙⴰⵏⵉⵏ ⵏ ⵍⴻⵣⵣⴰⵢⴻⵔ (6 ⵏ ⵜⴻⵎⵏⴰⴹⵉⵏ), ⴷ ⵢⵉⵎⴰⵔⵉⵔⴻⵏ ⵙⴻⴳ ⵜⴼⴻⴽⴽⵉⵡⵉⵏ ⴷ ⵢⵉⵏⵣⴰⴹⴻⵏ (ⵇⵉⵢⴰⴷⴰⵜ) ⵢⴻⵎⴳⴻⵔⵔⴰⴷⴻⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ. ⵜⴰⵍⵖⵓⵖⴰ-ⴰ ⴰⴷ ⵜⴻⴹⴹⴻⴼ ⵙⵉⵏ ⵏ ⵡⵓⵙⵙⴰⵏ ⵢⴻⵔⵏⴰ ⴰⴷ ⴷ-ⴼⵔⵓⵔⵉⵏ ⵙⴻⴳ-ⵙ ⴰⵎⴰ ⴷ ⵉⵜⴻⵔⵔⴰⵙⴻⵏ, ⴰⵎⴰ ⴷ ⵜⵉⵖⵍⴰⵎⵉⵏ.

ⴰⵙⵙ ⴰⵎⴻⵣⵡⴰⵔⵓ ⵏ ⵓⵎⵙⵉⵣⵡⴻⵔ ⵜⵜⴻⴽⴽⴰⵏ ⴷⴻⴳ-ⵙ 48 ⵏ ⵢⵉⵎⴰⵔⵉⵔⴻⵏ ⵉ ⵍⵎⴻⵏⴷ ⵏ ⵡⴰⴼⴼⴰⵙ (ⵜⴰⵚⴼⵉⵢⴰ) ⴷⴻⴳ 5 ⵏ ⵜⵓⵣⵣⵢⵉⵡⵉⵏ, ⵢⴻⵔⵏⴰ ⵍⵍⴰⵏⵜ 8 ⵏ ⵜⵍⴰⵡⵉⵏ ⴳⴰⵔ ⵡⵉⴷ ⵢⴻⵜⵜⴻⴽⴽⴰⵏ. ⵜⴰⵍⵖⵓⵖⴰ-ⴰ ⴰⴷ ⵜⴽⴻⵎⵎⴻⵍ ⴰⵙⵙ ⵏ ⵍⴻⵜⵏⵉⵢⴻⵏ ⵙ ⵙⵏⴰⵜ ⵏ ⵜⵓⵣⵣⵢⵉⵡⵉⵏ ⴰⵢⴷⴻⴳ ⴰⴷ ⴷ-ⴼⵔⵓⵏⵉⵏ ⵢⵉⵍⵖⵓⵖⴻⵏ ⵏ 2015-2016 (ⴰⵎⴰ ⴷ ⵉⵜⴻⵔⵔⴰⵙⴻⵏ, ⴰⵎⴰ ⴷ ⵜⵉⵖⵍⴰⵎⵉⵏ).

ⴷ ⴰⵎⴻⵏⵣⴰⴹ (ⵇⴰ’ⵉⴷ) ⵏ ⵓⵖⴻⵔⴱⴰⵣ, ⴰⵊⵉⵏⵉⵕⴰⵍ ⴼⴰⵔⵉⴷ ⴱⴻⴷⵊⴻⵔⵉⵜ, ⴰⵢ ⵉⵔⴻⵥⵎⴻⵏ ⵜⴰⵍⵖⵓⵖⴰ-ⴰ ⵙ ⵢⵉⵙⴻⵎ ⵏ ⵓⵎⴻⵏⵣⴰⴹ ⵏ ⵜⴻⵎⵏⴰⴹⵜ ⵜⴰⵙⴻⵔⴷⴰⵙⴰⵏⵜ 1ⵓⵜ, ⵢⴻⵔⵏⴰ ⵢⴻⴱⴷⴻⵔ-ⴷ ⴰⵣⴰⵍ ⴰⵢ ⵢⴻⵙⵄⴰ ⵡⴰⴷⴷⴰⵍ-ⴰ « ⵉ ⵍⴱⴰⵍ ⴷ ⵓⵅⴻⵎⵎⴻⵎ » ⵏ ⵢⵉⵙⴻⵔⴷⴰⵙⴻⵏ, ⴰⵛⴽⵓ ⴰⴷⴷⴰⵍ-ⴰ ⵢⴻⵙⵄⴰ « ⴰⵙⵙⴰⵖ ⴷ ⵜⵜⴰⴽⵜⵉⵜ ⵜⴰⵙⴻⵔⴷⴰⵙⴰⵏⵜ ⴷ ⵓⵀⴻⵢⵢⵉ ⵏ ⵢⵉⵖⴰⵡⴰⵙⴻⵏ (ⵎⵓⵅⴰⵟⵟⴰⵟⴰⵜ) ».

« ⵜⴰⵍⵖⵓⵖⴰ-ⴰ ⴰⴷ ⴷ-ⵜⵉⵍⵉ ⴷⴰⵖ ⴷ ⵜⴰⴳⵏⵉⵜ ⵉ ⵓⵙⵙⴻⴵⵀⴻⴷ ⵏ ⵓⵎⵜⴰⵡⴰ (ⵉⵏⵙⵉⴵⴰⵎ) ⴳⴰⵔ ⵢⵉⵙⴻⵔⴷⴰⵙⴻⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵊⵉⵏⵉⵕⴰⵍ ⴱⴻⴷⵊⴻⵔⵉⵜ ⴰⵢ ⴷ-ⵢⴻⵏⵏⴰⵏ ⴷⴰⵖ ⴷ ⴰⴽⴽⴻⵏ ⴰⴽⴽ ⵜⵉⴳⵏⴰⵜⵉⵏ ⵜⵜⵡⴰⵀⴻⵢⵢⴰⵏⵜ-ⴷ ⵉ ⵙⵙⴻⵔⴱⴻⵃ ⵏ ⵜⴻⴷⵢⴰⵏⵜ-ⴰ ⴷ ⵓⵙⵏⴻⵔⵏⵉ ⵏ ⵡⴰⴷⴷⴰⵍ ⴷⴻⴳ ⵢⵉⴳⴻⵏ.