Asebter amenzawi

Talɣuɣa taɣelnawt taserdasant n yicahen: 22 n teɣlamin deg Teqliɛt (Tipaza)

TIPAZA – 22 n teɣlamin ad yettekkin deg Telɣuɣa Taɣelnawt Taserdasant n yicahen (ciṭranǧ) (irgazen d tlawin) ay d-yebdan ass n lḥedd deg Uɣerbaz Unnig n Tsiwḍin Abdelhafid-Boussouf n Teqliɛt (Tipaza).

Ad ttekkin deg telɣuɣa-a yiserdasiyen seg wakk timnaḍin tiserdasanin n Lezzayer (6 n temnaḍin), d yimariren seg tfekkiwin d yinzaḍen (qiyadat) yemgerraden n Yigen Aɣelnaw Aɣerfan. Talɣuɣa-a ad teḍḍef sin n wussan yerna ad d-frurin seg-s ama d iterrasen, ama d tiɣlamin.

Ass amezwaru n umsizwer ttekkan deg-s 48 n yimariren i lmend n waffas (taṣfiya) deg 5 n tuzzyiwin, yerna llant 8 n tlawin gar wid yettekkan. Talɣuɣa-a ad tkemmel ass n letniyen s snat n tuzzyiwin aydeg ad d-frunin yilɣuɣen n 2015-2016 (ama d iterrasen, ama d tiɣlamin).

D amenzaḍ (qa’id) n uɣerbaz, ajiniṛal Farid Bedjerit, ay ireẓmen talɣuɣa-a s yisem n umenzaḍ n Temnaḍt Taserdasant 1ut, yerna yebder-d azal ay yesɛa waddal-a « i lbal d uxemmem » n yiserdasen, acku addal-a yesɛa « assaɣ d ttaktit taserdasant d uheyyi n yiɣawasen (muxaṭṭaṭat) ».

« Talɣuɣa-a ad d-tili daɣ d tagnit i usseǧhed n umtawa (insiǧam) gar yiserdasen n Yigen Aɣelnaw Aɣerfan », ɣef wakken ay d-yenna ujiniṛal Bedjerit ay d-yennan daɣ d akken akk tignatin ttwaheyyant-d i sserbeḥ n tedyant-a d usnerni n waddal deg yigen.