ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵎⴷⴻⵃⵃⴰⵙ ⵏ ⵎⵉⵏⴻⵏ: 43 ⵏ ⵢⵉⵎⵃⵓⴵⴻⵏ ⵉⴷⵣⴰⵢⵔⵉⵢⴻⵏ ⴰⵢ ⵢⴻⵎⵎⵓⵜⴻⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵎⴹⴰⵏ (ⵍⴻⵄⴷⴰⴷ) ⵏ ⵢⵉⵎⵃⵓⴵⴻⵏ ⵉⴷⵣⴰⵢⵔⵉⵢⴻⵏ ⴰⵢ ⵢⴻⵎⵎⵓⵜⴻⵏ ⴷⴻⴳ ⵎⵉⵏⴻⵏ (ⵎⴻⴽⴽⴰ) ⵢⴻⵡⵡⴻⴹ ⵖⴻⵔ 43, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ ⵍⴻⵃⵙⴰⴱ ⴰⵏⴻⴳⴳⴰⵔⵓ ⴰⵢ ⴷ-ⵢⴻⵙⵙⵓⴼⴼⴻⵖ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⴰⵙⵙ ⵏ ⵍⴻⵜⵏⵉⵢⴻⵏ.
ⵍⴻⵃⵙⴰⴱ-ⴰ ⵢⴻⵙⵙⴻⴷⴷⴰ-ⴷ ⴷⴰⵖ 4 ⵏ ⵢⵉⵎⵃⵓⴵⴻⵏ ⵉⵎⴻⵊⵔⴰⵃ ⴰⵢ ⵎⴰⵣⴰⵍ ⴷⴻⴳ ⵓⵙⴱⵉⵟⴰⵔ, ⴷⴻⴳ ⵡⴰⴽⵓⴷ ⴰⵢⴷⴻⴳ 6 ⵏ ⵢⵉⵎⵃⵓⴵⴻⵏ ⵏⵉⴹⴻⵏ ⵎⴰⵣⴰⵍ-ⵉⵜⴻⵏ ⵄⴻⵔⵇⴻⵏ ⴰⵔ ⴰⵙⵙ-ⴰ.
ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⵉⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵓⵎⵓⵖ (ⵇⴰ’ⵉⵎⴰ) ⵏ ⵢⵉⵎⵃⵓⴵⴻⵏ ⵢⴻⵎⵎⵓⵜⴻⵏ, ⵡⵉⴷ ⵢⴻⵍⵍⴰⵏ ⴷⴻⴳ ⵓⵙⴱⵉⵟⴰⵔ ⵏⴻⵖ ⵡⵉⴷ ⴰⵢ ⵉⵄⴻⵔⵇⴻⵏ ⴰⵜⴰⵏ ⵢⴻⵡⵊⴻⴷ ⵖⴻⵔ ⵜⵙⴻⵇⵇⴰⵎⵓⵜ ⴰⵢ ⴷ-ⵢⴻⵍⵀⴰⵏ ⴷ ⵜⴰⵍⵓⴼⵜ-ⴰ ⴷⴻⴳ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ.
ⵜⴰⵙⴻⵇⵇⴰⵎⵓⵜ ⵏ ⵜⴰⵍⵓⴼⵜ-ⴰ ⵍⴰ ⵜⴻⵜⵜⴻⵎⵄⴰⵡⴰⵏ ⴷ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⴷⴷⵉⵏ « ⵢⴻⵔⵏⴰ ⵍⴰ ⵜⴻⵜⵜⴽⴻⵎⵎⵉⵍ ⵜⴻⵜⵜⴹⴰⴼⴰⵔ ⵉⵙⴰⵍⴰⵏ ⵉⵏⴻⴳⴳⵓⵔⴰ ⵖⴻⴼ ⵜⵡⴰⵖⵉⵜ ⴰⵢ ⵢⴻⴹⵔⴰⵏ ⴷⴻⴳ ⵎⵉⵏⴻⵏ ⴷ ⵡⴰⵎⴻⴽ ⴰⵢ ⵜⵃⵓⵣⴰ ⵉⵎⵃⵓⴵⴻⵏ-ⵏⵏⴻⵖ ». ⵜⴰⵙⴻⵇⵇⴰⵎⵓⵜ-ⴰ ⵜⴻⵣⴳⴰ ⵜⴻⵙⵄⴰ ⴰⵏⴻⵔⵎⵉⵙ (ⵉⵜⵜⵉⵚⴰⵍ) ⴷ ⵓⵇⴻⵏⵚⵓⵍ ⴰⵎⴰⵜⵓ ⵏ ⵍⴻⵣⵣⴰⵢⴻⵔ ⴷⴻⴳ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ ⴷ ⵢⵉⵅⴻⴷⴷⴰⵎⴻⵏ ⴰⵢ ⴷ-ⵢⴻⵍⵀⴰⵏ ⵙ ⵓⴱⴷⴰⴷ ⵉ ⵢⵉⵎⵃⵓⴵⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ.
« ⴰⵖⵍⵉⴼ ⵉⴳⴻⵔ-ⴷ ⵜⵉⵖⵔⵉ ⵉ ⵡⴰⴽⴽ ⵉⴷⵉⵙⴰⵏ ⴰⴽⴽⴻⵏ ⴰⴷ ⵀⴻⴷⴷⵏⴻⵏ ⵉⵎⴰⵏ-ⵏⵙⴻⵏ, ⵍⴰⴷⵖⴰ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ, ⴰⴽⴽⴻⵏ ⵓⵔ ⵔⴻⵏⵏⵓⵏ ⴰⵔⴰ ⴰⴷ ⵙⵃⴻⵣⵏⴻⵏ ⵉⵎⴰⵡⵍⴰⵏ ⵏ ⵡⵉⴷ ⵢⴻⵏⴹⴻⵔⵔⴻⵏ, ⵍⴰⴷⵖⴰ ⵉⵎⵉ ⵉⵙⴰⵍⴰⵏ ⴰⵢ ⴷ-ⵜⴻⵜⵜⴰⴽⴼ ⵜⵙⴻⵇⵇⴰⵎⵓⵜ ⵏ ⵜⴰⵍⵓⴼⵜ ⴽⴽⴰⵏ-ⴷ ⵙⴻⴳ ⵢⵉⴷⵉⵙⴰⵏ ⵓⵏⵚⵉⴱⴻⵏ ⵢⴻⵔⵏⴰ ⵢⴻⵍⵍⴰ ⴷⴻⴳ-ⵙⴻⵏ ⵍⴰⵎⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ. ⵏⵏⵉⴳ ⵡⴰⵢⴰ, ⵜⴰⵙⴻⵇⵇⴰⵎⵓⵜ-ⴰ « ⵜⴻⵣⴳⴰ ⵜⴻⵙⵄⴰ ⴰⵏⴻⵔⵎⵉⵙ ⴷ ⵜⵡⴰⵛⵓⵍⵉⵏ ⵏ ⵡⵉⴷ ⵢⴻⵏⴹⴻⵔⵔⴻⵏ, ⵍⴰⴷⵖⴰ ⵜⵉⴷ ⵢⴻⵙⵄⴰⵏ ⵉⵎⵃⵓⴵⴻⵏ ⴰⵢ ⵉⵄⴻⵔⵇⴻⵏ. ⴰⵟⴰⵙ ⵏ ⵜⵡⴰⵛⵓⵍⵉⵏ ⴰⵢ ⵎⵎⵓⴳⵔⴻⵏ ⴷⴻⴳ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ».
« ⵜⴰⵙⴻⵇⵇⴰⵎⵓⵜ ⵏ ⵜⴰⵍⵓⴼⵜ ⵜⵄⴻⵣⵣⴰ ⵜⵉⵡⴰⵛⵓⵍⵉⵏ ⵏ ⵢⵉⵎⴻⵕⵃⵓⵎⴻⵏ ⵢⴻⵔⵏⴰ ⵜⴻⵙⵙⴰⵔⴰⵎ ⴰⴷ ⵊⵊⵉⵏ ⴰⴽⴽ ⵢⵉⵎⴻⵊⵔⴰⵃ, ⴰⵎ ⵡⴰⴽⴽⴻⵏ ⴰⵢ ⵜⴻⵜⵜⵖⵉⵎⵉ ⵜⴻⵡⵊⴻⴷ ⴰⴽⴽⴻⵏ ⴰⴷ ⴷ-ⵜⴻⵔⵔ ⵖⴻⴼ ⵡⴰⴽⴽ ⵜⵓⵜⵜⵔⵉⵡⵉⵏ ⴰⵢ ⵉⵛⴻⵖⴱⴻⵏ ⵜⵉⵡⴰⵛⵓⵍⵉⵏ ⴰⵢ ⵜⵃⵓⵣⴰ ⵜⵡⴰⵖⵉⵜ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ (ⴱⴰⵢⴰⵏ) ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ.
