Asebter amenzawi

Ttejṛiba n ḍḍmana n yixeddamen deg Lezzayer ur tesɛi tamtilt deg tmura taɛṛabin

LEZZAYER TAMANEɣT – Tenna-d Tnarit Tagraɣlant n Uxeddim ass n letniyen deg Lezzayer Tamaneɣt d akken ttejṛiba tadzayrit deg ḍḍmana tanmettit (iǧtimaɛiyya) d umciweṛ d ssandikat ur tesɛi tamtilt deg tmura taɛṛabin d Tefriqt.

« Ttejṛiba tadzayrit deg uḥuddu anmetti d umciweṛ anmetti ur yesɛi tamtilt ma nquren-it ɣer tmura taɛṛabin d tefriqiyin », ɣef wakken ay d-yenna unemhal n Tnarit Tagraɣlant n Uxeddim deg Lezzayer Tamaneɣt, Mohamed Ali Deyahi, deg usarag amnaḍan (iqlimi) n umɛawen anẓul-anẓul deg unrar n ḍḍmana n yixeddamen.

Mass Deyahi yerna-d d akken Lezzayer tga-d igmaḍ yelhan deg unrar deg wayen yerzan ḍḍmana n yixeddamen d twaculin, yerna « aḥuddu anmetti d yiwen seg llsisan ayɣef ad tettwabnu tmetti tuɣdimt (ɛadila) yerna d tamneknayt (mutawazina) ».

Aḥuddu aɣarim « d allal s wazal-nnes deg ussenqes n lexṣaṣ d tergadda (ɛadam lmusawat), yerna yesduqqus-d annerni aydeg ad ttekkin akk medden, am wakken ay yesselhay tadawsa (ṣṣiḥḥa) d tezmert n yimdanen uḍɛifen akken ad ttekkin s tidet deg tukci n lɣella d usnefli n tdamsa taɣelnawt », ɣef wakken ay d-yenna.

Seg yidis niḍen, Mass Deyahi yeckeṛ-d « aɛewwel » n Lezzayer akken ad d-tebnu tadamsa n temsetlelt (taḍamun) d usnulfu n uxeddim ay terra Lezzayer d ccerḍ s wazal-nnes deg usnefli amatu ad idumen.