Asebter amenzawi

Assenger n rrebrab deg Surya ad iḥudd timura niḍen seg uxeṣṣar-a

LEZZAYER TAMANEɣT – Iɛeyyen-d uselway asuri, Bachar al-Assad, i tmura n leǧnas d akken ala timerniwt n rrebrab deg tmurt-nnes ad izemren ad tḥudd timura niḍen seg uxeṣṣar-a yerna ad yefru taluft n Surya s ubrid aserti.

« Timerniwt n rrebrab maci ala d Surya ad iḥudd, wanag akk timura niḍen », ɣef wakken ay d-yenna uselway asuri mi yemmiger yiwet n tmagla (wafd) n yiwamniyen irusiyen ass n lḥedd deg Dimecq.

I lmend n ferru n taluft tasurit, yenna-d al-Assad d akken ad d-ilint tefranin ireẓmen aydeg ad ttekkin akk yiɣallen isertiyen n tmurt.

Mass al-Assad « yewjed ad yessuddes tifranin s uttekki n wakk iɣallen isertiyen ay yebɣan ad thenni Surya », ɣef wakken ay d-yenna Alexandre Iouchtchenko, yiwen seg wid yettekkan deg tmagla-nni tarusit ay yemmuger uselway asuri.

« Tifranin-a ur zemmrent ara ad d-ilint arma tettwaslelli Surya [seg tegrawt tarebrabt ay isemman i yiman-nnes Awanak Islaman/Daɛec], yerna Mass al-Assad yessefray ad yettekki deg-sent ma ur yugi ara uɣref », ɣef wakken ay d-yenna Mass Iouchtchenko.

Aselway asuri yettwali d akken tifrat-a « ad teḥrez tanaya (siyada) n tmurt-nnes, azarug-nnes d tummda n wakal-nnes ». Tirzi n tmagla-a tasurit ɣef Dimecq tella-d 5 n wussan deffir terzi n Mass al-Assad ɣef Musku.