ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵀⴻⵏⴷ-ⵜⴰⴼⵔⵉⵇⵜ: ⴱⴻⵍⴰⵉⴱ ⵢⴻⵜⵜⴻⴽⴽⴰ ⴷⴻⴳ ⵜⴻⵎⵍⵉⵍⵉⵜ ⵏ ⵢⵉⵏⴻⵖⵍⴰⴼⴻⵏ ⵏ ⴱⴻⵕⵕⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵜⵜⴻⴽⴽⴰ ⵓⵏⴻⵖⵍⴰⴼ ⵏ ⵜⵏⴻⵣⵣⵓⵜ (ⵜⵉⴵⴰⵔⴰ), ⴱⴰⴽⵀⵜⵉ ⴱⴻⵍⴰⵉⴱ, ⵙ ⵢⵉⵙⴻⵎ ⵏ ⵍⴻⵣⵣⴰⵢⴻⵔ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵏⴻⵡ ⴷⴻⵍⵀⵉ, ⴷⴻⴳ ⵜⴻⵎⵍⵉⵍⵉⵜ ⵏ ⵢⵉⵏⴻⵖⵍⴰⴼⴻⵏ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⴷⴻⴳ ⵜⵇⴰⵛⵓⵛⵜ ⵜⵉⵙ 3 ⵏ ⵍⵀⴻⵏⴷ-ⵜⴰⴼⵔⵉⵇⵜ (26-30 ⵜⵓⴱⴻⵕ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵍⴱⴰⵢⴰⵏ ⵏ ⵓⵖⵍⵉⴼ ⵏ ⵜⵏⴻⵣⵣⵓⵜ.

ⵜⴻⵍⵍⴰ-ⴷ ⵜⴻⵎⵍⵉⵍⵉⵜ-ⴰ ⵉ ⵍⵎⴻⵏⴷ ⵏ ⵓⵇⴻⵢⵢⴻⵎ ⵏ ⵜⵉⵛⵛⵓⵔⴽⴰ ⵜⴰⵙⵓⴷⴷⵙⴰⵏⵜ (ⵉⵙⵜⵔⴰⵜⵉⴵⵉⵢⵢⴰ) ⴳⴰⵔ ⵍⵀⴻⵏⴷ ⴷ ⵜⴻⴼⵔⵉⵇⵜ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵍⵍⴰ ⵜⵇⴰⵛⵓⵛⵜ ⵜⵉⵙ ⵙⵏⴰⵜ ⵏ 2011 ⴷⴻⴳ ⴰⴷⴷⵉⵙ-ⴰⴱⴻⴱⴰ (ⵉⵜⵢⵓⵒⵢⴰ).

ⵢⴻⵍⵍⴰ-ⴷ ⴷⴰⵖ ⵡⴰⵡⴰⵍ, ⴷⴻⴳ ⵜⴻⵎⵍⵉⵍⵉⵜ-ⴰ, ⵖⴻⴼ ⵡⴰⵢⴻⵏ ⴰⵢ ⵍⴰ ⵙⵙⴻⴼⵔⴰⵢⴻⵏ ⴰ ⵜ-ⴳⴻⵏ ⵉ ⵓⵙⵏⴻⵔⵏⵉ ⵏ ⵡⴰⵙⵙⴰⵖⴻⵏ (ⵄⴰⵍⴰⵇⴰⵜ) ⴳⴰⵔ ⵜⵙⵓⴷⴰ, ⴷⴻⴳ ⵜⴷⴰⵎⵙⴰ ⴷ ⵜⵖⴰⵡⵙⵉⵡⵉⵏ ⵢⴻⵔⵣⴰⵏ ⵜⵉⵎⴻⵜⵜⵉ ⵉ ⵓⵙⵙⴻⴵⵀⴻⴷ ⵏ ⵜⵉⵛⵛⵓⵔⴽⴰ ⴷⴻⴳ ⵢⵉⵏⵓⵔⴰⵔ ⵢⴻⵎⴳⴻⵔⵔⴰⴷⴻⵏ ⴳⴰⵔ ⵍⵀⴻⵏⴷ ⴷ ⵜⴻⴼⵔⵉⵇⵜ.

ⴷⴻⴳ ⵜⵉⵏⴰⵡⵜ-ⵏⵏⴻⵙ (ⴽⴰⵍⵉⵎⴰ) ⵉ ⵍⵎⴻⵏⴷ ⵏ ⵜⴻⵎⵍⵉⵍⵉⵜ-ⴰ, ⵢⴻⵏⵏⴰ-ⴷ ⴱⴻⵍⴰⵉⴱ ⴷ ⴰⴽⴽⴻⵏ ⵜⴰⴷⵢⴰⵏⵜ-ⴰ ⵜⴻⵙⵄⴰ ⴰⵣⴰⵍ ⴰⵎⴻⵇⵔⴰⵏ ⵉⵎⵉ ⴰⵢ ⴷ-ⵜⴻⵍⵍⴰ ⴷⴻⴳ ⵜⴰⵍⵍⵉⵜ ⴰⵢⴷⴻⴳ ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵜⴻⵙⵄⴻⴷⴷⴰ ⴰⵀⵉⵍ-ⵏⵏⴻⵙ ⵏ 2063 ⵢⴻⵔⵏⴰ ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵍⴰ ⴷ-ⵜⵜⵀⴻⵢⵢⵉⵏ ⴰⵀⵉⵍ ⵏ ⵓⵙⵏⴻⵔⵏⵉ ⵉ 2030.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⵏⴻⵣⵣⵓⵜ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵎⵄⴰⵡⴰⵏⴻⵏⵜ ⵍⵀⴻⵏⴷ ⴷ ⵜⴻⴼⵔⵉⵇⵜ ⵉ ⵓⵃⵔⴰⵣ ⵏ ⵡⴰⵢⴻⵏ ⴰⵢ ⴷ-ⵃⴻⵕⵕⴻⵏⵜ ⵙⴻⴳ ⵓⵙⵙⵓⴼⴼⴻⵖ ⵏ ⵓⵙⵙⴻⵀⵔⴻⵙ (ⵍⵉⵙⵜⵉⵄⵎⴰⵕ) ⴷ ⵢⵉⵎⴻⵏⵖⵉ ⵎⴳⴰⵍ ⵎⴻⵃⵢⴰⴼ ⵉ ⵍⵎⴻⵏⴷ ⵏ ⵓⵙⵙⴻⴱⴷⴻⴷ ⵏ ⵓⵃⴽⴰⵎ ⴰⴷ ⵢⴻⵜⵜⵇⴰⴷⴰⵔⴻⵏ ⵓⴳⴰⵔ ⵜⵓⴳⴷⵓⵜ.

ⵎⵉ ⵜⴼⵓⴽ ⵜⴻⵎⵍⵉⵍⵉⵜ-ⴰ, ⵎⵙⴻⴼⵀⴰⵎⴻⵏ ⵢⵉⵏⴻⵖⵍⴰⴼⴻⵏ ⵖⴻⴼ ⵢⵉⵡⴻⵏ ⵏ ⵓⵙⴻⵏⴼⴰⵔ ⵏ ⵓⵎⵄⴰⵡⴻⵏ ⴰⵙⵓⴷⴷⵙⴰⵏ ⴳⴰⵔ ⵍⵀⴻⵏⴷ ⴷ ⵜⴻⴼⵔⵉⵇⵜ ⴷ ⵜⵙⴻⵖⵔⵓⵜ (ⵜⴰⵚⵔⵉⵃ) ⵏ ⵓⵏⵎⴰⴳⴻⵔ ⴰⴷ ⵢⴻⵜⵜⵡⴰⵇⴻⴱⵍⴻⵏ ⴷⴻⴳ ⵜⴻⵎⵍⵉⵍⵉⵜ ⵜⴰⵎⴻⵇⵔⴰⵏⵜ ⵏ ⵜⵇⴰⵛⵓⵛⵜ-ⴰ.