Asebter amenzawi

Ametthum ameqran n txazzabit n 2007 ad iɛeddi deg ccṛeɛ deg Nwembeṛ

LEZZAYER TAMANEɣT – Fateh Bouderbala, ametthum ameqran n txazzabiyin n 2007 ay iḥuzan Leqṣer n Unabaḍ (ḥukuma) d wammas n temsulta n Bab Zzewwaṛ, ad iɛeddi deg ccṛeɛ ass n 16 Nwembeṛ deg uxxam n ccṛeɛ n tejrimt n Lezzayer Tamaneɣt, ɣef wakken ay d-yekcef wumuɣ n ccṛuɛat n tejrimin n 2015.

Ɣef leḥsab n lameṛ n uwexxer n ccṛeɛ, ametthum-a ay yerran iman-nnes d « lamir » n tuddsa tarebrabt n « Lqaɛida deg Lmeɣreb Islaman » deg Lezzayer Tamaneɣt, yesteɛṛef d akken yeḍfer s usawal irebraben-nni ay inehṛen tikeṛṛusin yendin armi ay wwḍen ɣer yimukan aydeg sṭerḍqen iman-nsen (Leqṣer n Unabaḍ d wammas n temsulta n Bab Zzewwaṛ), yerna d netta ay asen-yefkan lameṛ ad sṭerḍqen lbumbat-nsen.

Taxazzabit n Leqṣer n Unabaḍ tenɣa 20 n yimdanen yerna tejreḥ 222 niḍen, ma d tin n Bab Zzewwaṛ tenɣa 11 n yimdanen yerna tejreḥ azal n 100 niḍen.

Imeẓla (maṣaliḥ) n tɣellist ssawḍen, s yisalan ay asen-d-yefka umetthum, ad awḍen armi d imukan anda ay llan tteffren yirebraben-nni yerna ufan-d din ifexsayen (mutafaǧǧirat) d kra n leslaḥat ifessasen.

Deg umkan amezwaru n tuffra ay d-yezgan deg uɣaram (ḥayy) n Djaafri deg Rrɣaya (Lezzayer Tamaneɣt), ufan-d yimsulta 92 n yikilugṛamen n yifexsayen, ma deg umkan wis sin ay d-yezgan deg Bni Dawed, deg Bumerdas, ufan-d imzelli n tmeẓdiyin, sin n yiqraben yeččuṛen d ifexsayen, 3 n lbumbat yettwaxedmen s ufus d 21 n yisṭerḍaqen.