Asebter amenzawi

Imnadiyen ibriṭaniyen wten-d deg urkaḍ n yizerfan n Yifalesṭiniyen

LuNDuN – Ugar n 340 n yimnadiyen isdawanen ibriṭaniyen ay ibedden, ass n ttlata, ɣer yidis n yimenɣi afalesṭini s uɣanzu n tesdawiyin tisṛayiliyin akken ad yili waya d tamesbanit mgal « urkaḍ ur yettwaḥmalen n yizerfan n umdan n wakk aɣref afalesṭini ».

« S yisem-nneɣ, d imnadiyen icriken d tesdawiyin tibriṭaniyin, tcewwel-aɣ s telqey tuḍḍfa tisṛayilit yeffɣen i lqanun deg yikalen ifalesṭiniyen, arkaḍ ur yettwaḥmalen n yizerfan n umdan n wakk aɣref afalesṭini d uggami n tifrat (sɣur Iṣrayil) » ɣef wakken ay d-uran 343 n yisdaanen deg yiwet n tebṛat ireẓmen ay d-yeffɣen ass n ttlata deg uɣmis n The Guardian.

« S tririt i teɣri ay d-tger tmetti taɣarimt tafalesṭinit, ad d-nini, ihi, d akken ur nqebbel ara ineɛruḍen n tsuda tisdawanin tisṛayiliyin (…) yerna ur nettekkay ara deg yisaragen ay d-yewwin idrimen sɣur-sent, gant-ten tsuda-a neɣ d llan-d ddaw leɛnaya-nsent », ɣef wakken ay d-nnan.

Amur ameqran seg yisdawanen ay yestenyan tabṛat-a xeddmen deg kra seg tesdawiyin yesɛan cciɛa tameqrant akk deg Briṭanya Tameqrant am tin n Oxford, Cambridge, LES d UCL.

« Aɣanzu-a d ccɣel ameẓyan akken ad d-nini taɣawsa d tameqrant: yessefk ad d-tili tgadda (musawat) d teɣdemt s tidet, yerna yessefk ad yettwaqader lqanun agraɣlan », ɣef wakken ay d-yenna yiwen seg wid yestenyan, apṛufisur Conor Gearty n LSE.

Ugar n 1000 n Yifalesṭiniyen ay ḍḍfen yiserdasen n tuḍḍfa tisṛayilit seg wasmi ay d-yebda, deg tezwara n Tubeṛ, ccwal d ameqran deg Ugemmaḍ Utrim, Lquds d Ɣezza, d win aydeg mmuten ugar n 50 n Yifalesṭiniyen.