Asebter amenzawi

Mali: tettwakkes temnaḍt n laman ay d-yezzin ɣef temdint n Kidal

BAMAKu – Tenna-d Tuɣdaḍt n Talwit n Yiɣlanen Yeddukklen deg Mali (MINUSMA) d akken tekkes tamnaḍt-nni n tɣellist (amn) n 20 n yikilumitṛen ay d-yezzin ɣef temdint n Kidal, deg Mali. I usmekti, tamnaḍt-a n tɣellist sbedden-tt-id deg Ɣuct yezrin, mi nnuɣent gar-asent kra n tegrawin timsellḥin yemxaṣamen.

« Ṛṛay-a msefhamen fell-as yidisan ay yettekkan deg umtawa (ittifaq) n talwit d umsuɣal deg Mali deffir temlilit tateknit n tɣellist ay d-yellan ussan n 22 d 23 Tubeṛ deg Bamako », ɣef wakken ay d-tenna MINUSMA deg yiwen n lbayan ay d-yeffɣen seg melmi kan.

« Taɣtast-a (qarar) yella-d deffir ma ddant ɣer sdat lemcawṛat deg Anefis, gar tegrawin timsellḥin n ugafa (Tasemyuddest n Uzawad d Tɣerɣert) ay d-yennan d akken fran imgerraden-nsen isertiyen d yiserdasanen ».

MINUSMA tenna-d daɣ d akken « deg temlilit n Bamako, akk idisan sseknen-d lebɣi-nsen akken ad d-afen tifratin d tucrikin i temsal ay d-yellan deg lemcawṛat ay d-yellan seg wul i lmend n lebni n wayen ad d-yawin nnfeɛ », yerna « tella-d daɣ tiddit ɣer sdat deg umciweṛ ɣef yimukan anda ad qqiment tegrawin timsellḥin ».

Tabdammast (wasaṭa) tagraɣlant ay d-yebdan deg 2014 ddaw ṛṛay n Lezzayer, ssawḍent deg Mayu d Yunyu n 2015 ɣer ustenyi n « Umtawa i talwit d umsuɣal deg Mali » gar unabaḍ n Mali, Tiɣerɣert d Tsemyuddest n Yimussa n Uzawad.