Asebter amenzawi

Abdad n Lezzayer d Brizil ɣer yidis n Yifalesṭiniyen d Yiṣeḥrawiyen

LEZZAYER TAMAEɣT – Yenna-d uneɣlaf adzayri n tɣawsiwin n uzɣar, Ramtane Lamamra, ass n laṛebɛa deg Lezzayer Tamaneɣt d akken Lezzayer d Brizil beddent ɣer yidis n yizerfan n Yifalesṭiniyen d Yiṣeḥrawiyen deg ferru n uzekka-nsen.

Deg yiwen n usarag ucrik n tɣemsa ay iga d umtil-nnes abrizili Mauro Lecker Vieira, yenna-d Mass Lamamra d akken adduden n Lezzayer d Brizil « wehhan ɣer yiwen n ubrid deg wayen yerzan aḥuddu n yimenɣiyen uzrifen (carɛiyya) d ubdad ɣer yidis n yizerfan n yiɣerfan akken ad tt-id-frun ɣef uzekka-nsen, akken yella lḥal d yiɣerfan n Falesṭin d Uneẓruf Utrim ».

Lezzayer d Brizil « beddent ta ɣer yidis n tayeḍ deg unrar agraɣlan deg wayen yerzan timsal tisertiyin d tdamsanin yemgerraden », ɣef wakken ay d-yenna Mass Lamamra, ay d-yernan d akken ula ma Brizil ur telli ara d yiwet seg tmura yexḍan aderrer (ɛadam al-inḥiyaz), maca « tesɛa tasertit yexḍan aderrer » deg wassaɣen-nnes d tmura niḍen n umaḍal, yerna tesseḥbibir ɣef uqader n uzarug (istiqlal) d lḥeṛma-nsent.

Deg wayen yerzan adiwenni (ḥiwar) asuddsan gar Lezzayer d Brizil, yenna-d Mass Lamamra d akken yebda-d deg 2012.

Nnig waya, msefhament snat-a n tmura akken ad sɛunt assaɣen « izaden », ɣef wakken ay d-yenna uneɣlaf, yerna yenna-d d akken adiwenni-a yettili-d dima s umbaddel n terza gar Lezzayer d Brizil d umciweṛ yezgan gar-asent.

Ɣef leḥsab n uneɣlaf adzayri n tɣawsiwin n uzɣar, tiɣimit tamezwarut aydeg ad mciwṛen ɣef llsisan n udiwenni asuddsan gar Lezzayer d Brizil « tella-d deg wakud iwatan akken ad yettwafres unrar i wassaɣen inmettiyen-idamsanen d umsefham ɣef usnefli (tanmiya) agraɣlan ».