Asebter amenzawi

Yemmuger uselway Bouteflika aneɣlaf n tɣawsiwin n uzɣar n Brizil

LEZZAYER TAMANEɣT – Yemmuger uselway n tegduda, Abdelaziz Bouteflika, ass n laṛebɛa deg Lezzayer Tamaneɣt, aneɣlaf n tɣawsiwin n uzɣar n Brizil, Mauro Lecker Vieira.

« Tṣaḥ-iyi-d tegnit, ass-a, ad d-ssiwḍeɣ i uselway Bouteflika afrayen n tammidwa d tegmat n uɣref d unabaḍ n Brizil, ladɣa n tselwayt Dilma Roussef, am wakken ay t-nesnemmir ɣef uneɛruḍ-nnes i tselwayt akken ad d-terzu ɣef Lezzayer deg 2016 », ɣef wakken ay d-yenna Mass Vieira deg yiwet n tseɣrut (taṣriḥ) i tɣemsa mi ifuk umyager-nnes d uselway n tegduda.

Yesnemmer daɣ Mass Vieira tamurt n Lezzayer imi ay temmuger akken igerrez aṭas n Yibriziliyen ay d-irewlen ɣer tmurt-a asmi ay tella Brizil deg yiseggasen-nnes iweɛṛen, yerna iwekked-d d akken aya « d llsas i tammidwa (ṣadaqa) tameqrant gar snat-a n tmura ».

Mass Vieira yumar s wassaɣen (ɛalaqat) ay yellan gar snat-a n tmura, yerna yenna-d d akken tirzi-nnes ɣef Lezzayer tella-d telha yerna amyager-nnes d uselway n tegduda yella-as-d d « iseɣ ».

« Umareɣ (feṛḥeɣ) yerna yella-iyi-d d iseɣ imi ay iyi-yemmuger uselway Bouteflika i tikkel tis snat, deffir umyager-nni n 2003 ay d-yellan i lmend n temlilit n Tegrawt n 7 deg Evian (Fṛansa) », d timlilit ay as-d-yeggran d ccfawat yelhan, ɣef wakken ay d-yenna.

Amyager-a yella-d s uḥdaṛ n uneɣlaf adzayri n tɣawsiwin n uzɣar, Mass Ramtane Lamamra.