Asebter amenzawi

Talɣuɣa n umaḍal n tatlitit n yimeɛdaṛ: 2 n cciɛat i Lezzayer

DDUḤA – Taɣlamt tadzayrit n tatlitit n yimeɛdaṛ terna-d 2 n tzalɣiwin timaynutin, yiwet n wureɣ, tayeḍ n ubṛunz, ass n ttlata deg usarir n Suhaim Bin Hamad deg Dduḥa (Qaṭar), deg wass wis 5 n Telɣuɣa n Umaḍal ad ifaken ass n ssebt.

Tazalɣi n wureɣ terbeḥ-itt-id Nassima Saifi deg uzelli n uḍebsi (taserkemt n F57) s uzelli n 34,31 n lmitrat deg yiwen n umsizwer aydeg ttekkant 12 n texṣimin. Ma d tazalɣi n uẓref, deg umsizwer-a, terbeḥ-itt-id Tbulgaṛit Stela Eneva (32,35 n lmitrat), terna-d deffir-s Orla Barry (29,82 n lmitrat) s tzalɣi n ubṛunz.

Safia Djalal d nettat ay d Tadzayrit niḍen ay yettekkan deg umsizwer-a n uzelli n uḍebsi, maca ur tessaweḍ ara ad tili gar tmezwura, imi ay tessaweḍ kan ɣer 27,89 n lmitrat deg uneɛruḍ-nnes amezwaru.

Seg yidis-nnes, anaddal Mohamed Berrahal yewwi-d tazalɣi n ubṛunz deg tneggarut n temsizzelt n 100 n lmitrat (taserkemt n T51), s wakud n 21.89 n tsinin (tawani). Berrahal iga-d daɣ aklis (raqm qiyasi) amaynu i Tefriqt deg temsizzelt-a.

Tazalɣi n wureɣ, deg 100 n lmitrat n T51 yewwi-tt unaddal amaynu abiljiki Peter Geynin s 20.93 n tsinin (d aklis amaynu deg telɣuɣa), ma d tazalɣi n uẓref yewwi-tt ulɣuɣ n umaḍal n tikkelt yezrin, Afinlandi Toni Piispanen (21.43).

Mi tfuk tneggarut-nni, Berrahal iban-d yettwaxeyyeb s ugmuḍ-nnes d umkan wis 3 ay t-id-iṣaḥen. « D ayen ibanen ur umareɣ ara s wayen giɣ. Ḥeṛseɣ mliḥ iman-inu deg uxeddim aseggas-a akken ad d-awiɣ igmaḍ igerrzen ugar. Ur ẓriɣ ara d acu ay iyi-yeḍran. Ɛyiɣ yerna ɛeyyu-nni yewweḍ-d deg yir taswiɛt. »