Asebter amenzawi

Iṣeḥrawiyen ṣebren ula ma atni deg tegnit taweɛṛant (imḍebber)

CHAHID EL-HAFED (imaziren iṣeḥrawiyen) – Izarzaɣen (laǧi’in) iṣeḥrawiyen ṣebren « ula ma atni deg tegnit taweɛṛant » deg tmeddurt-nsen, ɣef wakke ay aɣ-d-yenna ass n laṛebɛa uneɣlaf aṣeḥrawi n tɣawsiwin n daxel, Hamma Salama.

« Tudert la d-tettuɣal cwiṭ, cwiṭ ɣer wakken tella deg yimaziren n yizrazaɣen iṣehṛawiyen, s lemɛawna ay la d-yettawḍen sɣur yimeggiyen yemgerraden n tmetti taɣarimt tadzayrit, d Tazzirt Tazewwaɣt Tadzayrit, Tiddukla n Yimassanen Inselmen Idzayriyen, iduba n twilayt n Tinduf d yimeẓla (maṣaliḥ) n Uḥuddi Aɣarim adzayri », ɣef wakken ay d-yenna uneɣlaf aṣeḥrawi.

Ɣef leḥsab n yimḍebber-a, anabaḍ (ḥukuma) aṣeḥrawi la yessefray, deg 10 n wussan ay d-yetteddun, ad d-yerr s 80% lecɣal n tkebbaniyin d temṣukiwin (hayakil) tinmettiyin daxel yimaziren n yizrazaɣen. Nnig waya, s uɛawen n medden d tsuda (mu’assasat), ur mmuten ara medden deg wussan-nni n ugeffur d lḥal ixeṣren.

Mass Salama yerra tajmilt i lemɛawna n yizrazaɣen iṣeḥrawiyen deg tallit-a iweɛṛen, yerna yenna-d d akken mazal Iṣeḥrawiyen la ttṛajun lemɛawna-nni ay d-ṛeggment tuddsiwin (munaḍḍamat) tigraɣlanin d ternabaḍin, deg wakud aydeg ala d lemɛawna n Lezzayer ay d-yewwḍen.

Ɣef leḥsab n uneɣlaf aṣeḥrawi n tɣawsiwin n daxel, « imaziren n yizrazaɣen mazal ḥwaǧen lemɛawna, yerna menɣir tuččit, ḥwaǧen ttawilat i uṣeggem n lbenyanat-nsen, ladɣa iɣerbazen d yimukan n udawi ay iḥebsen, taswiɛt-a, ɣef lǧal n waman n ugeffur ay igellelen deg-sen ».