Asebter amenzawi
Timlilit deg Geneve ɣef utɛeddi isṛayili
LEZZAYER TAMANEɣT – Deg yiwet n temlilit tuzzigt (xaṣṣa) ay iga Useqqamu n Yizerfan n Umdan deg Geneve ass n laṛebɛa ɣef tegnit deg yikalen ifalesṭiniyen yettwaḍḍfen, iɛawed uselway afalesṭini Mahmoud Abbas iger-d tiɣri i uḥuddu agraɣlan n uɣref afalesṭini ayɣef la ttemmɣen Yisṛayiliyen, d ccwal ay yeglan s tudert n wugar n 50 n Yifalesṭiniyen.
Mass Abbas iger-d tiɣri i umɣiwan (muǧtamaɛ) agraɣlan akken ad d-yessebded war leɛḍil « ttawil agraɣlan n uḥuddu n uɣref afalesṭin », yerna iwet-d deg yiɣallen isṛayiliyen ay yettekkan deg tmenɣiwin yeffɣen i ccṛeɛ.
« Yessefk yal yiwen ad yeg ccɣel-nnes uqbel ma ifut lḥal, yerna qesdeɣ-d ladɣa Iɣlanen Yeddukklen (…) d tmura yettekkan deg Yiɣlanen Yeddukklen », ɣef wakken ay d-yenna Mass Abbas deg temlilit tuzzigt ay ssutren Yifalesṭiniyen, yerna d ta ay d timlilit tuzzigt tis snat ad d-yilin deg tnegga-a (wakala) n Yiɣlanen Yeddukklen seg wasmi ay d-tennulfa deg 2006.
Seg wasmi ay d-yennulfa 9 n yiseggasen aya, Aseqqamu n Yizerfan n Umdan yemlal ala yiwet n tikkelt deg « temlilit tuzzigt », yerna yella-d waya i lmend n tisin n tselwayt n Cili, Michelle Bachlet ɣer Useqqamu-a deg 2007.
« Timlilit-a n leḥdaqa » i lmend n Yifalesṭiniyen tella-d ula ma ur as-yeɛjib ara lḥal i ugensas (mumattil) iṣrayili deg Yiɣlanen Yeddukklen deg Geneve, ay d-yennan d akken timlilit-a ad tettwatthem deg-s daɣ Isṛayil d akken d nettat ay yellan deffir akk uguren.
Mass Abbas iɛawed yessuter aḥbas n ussehres (istiɛmar) isṛayili deg Ugemmaḍ Utrim yettwaḍḍfen uqbel ma uɣalent-d lemcawṛat n talwit gar Falesṭin d Isṛayil.
Lemcawṛat n talwit gar sin-a n yidisan ḥebsen deg Meɣres n 2014b deffir 9 n wayyuren n wawal ur yessawḍen ɣer wacemma.
